4. Azo aye amba ti ala zo pëpe

“Azo . . . andoye asongo ti ala pëpe.”​—2 TIMOTHÉE 3:1-3, La Sainte Bible en Sango.

● Chris ayeke sara kua na yâ ti mbeni bungbi so ayeke mû maboko na azo so a sara ye ti ngangu na ala na yâ ti sewa na Galles ti Banga. Lo tene: “Mbi dabe ti mbi na mbeni wali so aga lani, a pika lo tâ sioni mingi asara si mbi hinga même mbi tene a yeke lo la pëpe. Ambeni wali ayeke dä so vundu ahon ndo ti ala mingi, ye so asara si a yeke ngangu na ala ti bâ lê ti zo.”

AYE SO ASI AFA NYEN? Na yâ ti mbeni kodoro ti Afrika, tongana a mû awali ota, a lango na mbeni oko awe na ngangu na ngoi so lo de molenge. Mbeni gingo nda ti ye afa so gi na yâ ti oko kodoro so, tongana a mû akoli ota, oko na popo ni atene so a yeke na lege ni ti pika wali ti lo. Ye oko, a yeke gi awali la a yeke sara ye ti ngangu na ala na yâ ti sewa pëpe. Na tapande, na Canada, tongana a mû akoli bale-oko, ota tongaso na popo ni ayeke bâ pasi na lege so awali ti ala ayeke pika ala.

TËNË WA AZO AYEKE TENE KA MINGI? Ngbene ye giriri la a yeke sara ngangu na zo na yâ ti sewa so. Me, laso la azo abi bê ti ala na ndo ni mingi ahon ti giriri.

TËNË SO ALA TENE AYEKE NA LEGE NI? A yeke gi na yâ ti angu so ahon ade ti ninga pëpe la azo asara tënë mingi na ndo ti ngangu so azo ayeke sara na amba ti ala na yâ ti sewa. Me so azo asara tënë mingi na ndo ti sarango ngangu na zo na yâ ti sewa asara si a kiri na peko? Ên-ën, a kiri na peko pëpe. Laso, azo mingi andoye amba ti ala zo pëpe. Kpale so akiri ague na li ni mingi.

MO TENE TI MO NYEN? Tënë so ayeke na 2 Timothée 3:1-3 ayeke ga tâ tënë? Azo mingi andoye pëpe afami ti ala so ala lingbi fade ti ndoye ala?

Oku prophétie ni so andu sese ndo ti duti ti e ayeke ga tâ tënë na ndembe so. Bâ tënë so Bible atene na ndo ni.

[Kete tënë na lembeti 7]

“Sarango ngangu na zo na yâ ti sewa ayeke mbeni ye so a hinga ni tongana oko ti aye ti sioni so a yeke sara ka tënë ni mingi pëpe. Mbeni wali ayeke ku juska koli ti lo apika lo fani 35 awe si lo yeke gue ti sara tënë ni na azo ti lapolice.”​—LO SO AYEKE SARA TËNË NA IRI TI BUNGBI SO AYEKE MÛ MABOKO NA AZO TI GALLES SO A SARA YE TI NGANGU NA ALA NA YÂ TI SEWA.