Bible achangé fini ti azo

NYEN la apusu mbeni maseka-wali ti kiri na yâ ti vorongo so lo kono dä si lo dö lani lege ni lo zia? Diko tënë so lo tene.

“Mbi yeke na ngia mingi fadeso na yâ ti gigi ti mbi.”​—LISA ANDRÉ

NGU SO A DÜ LO NA NI: 1986

KODORO SO A DÜ LO DÄ: LUXEMBOURG

MBAÏ TI LO: MOLENGE SO AGIRISA LEGE

GIGI TI MBI ÂNDÖ: Mbi kono na yâ ti kete gbata ti Bertrange, so ayeke na Luxembourg. A yeke mbeni ndo so ayeke kpô nga pendere mingi. A dü e amolenge oku, na mbi yeke tanga ni. Babâ na mama ti mbi ayeke aTémoin ti Jéhovah, na ala sara kue ti fa na mbi nga na aita ti mbi anzoni sarango ye ti aChrétien.

Tongana mbi wara ngu 12 tongaso, mbi to nda ti duti na kite na ndo ti aye so aTémoin ti Jéhovah afa. Mbi sara sanka ni kozo, me yeke na yeke mabe ti mbi ayeke woko. Babâ na mama ti mbi asara kue ti kiri na mbi na ndo ti nzoni lege, me mbi ke. Nga, na hondengo ni, mbi sara kamarade na amaseka so ayeke sara ye kirikiri. Mbi ye lani ti sara ye ti bê ti mbi tongana ala. E yeke sara afête mingi, e yeke gi tere, e yeke nyon mbangi nga e yeke nyon sämba ahon ndo ni. Na tongo nda ni, tere ti mbi anzere ti duti na tere ti azo so ayeke sara vie.

Me ti tâ tënë ni, mbi yeke lani na ngia pëpe na tere ti akamarade ti mbi so, nga ala yeke pensé na ye oko pëpe. Nde na ala, mbi yeke gi bê ti mbi na ndo ti ambeni ye so ayeke si na yâ ti dunia so, na tapande sarango ye ti kirikiri so azo ayeke sara so. Nga, tongana ngoi ayeke hon, nzara ti gigi asigigi na yâ ti mbi.

LEGE SO BIBLE ACHANGÉ FINI TI MBI: Mbeni lâ, tongana mbi yeke na ngu 17, vundu ahon ndo ti mbi. Na bango mbi tongaso, mama ti mbi ahunda mbi ti kiri ti manda Bible. Lo wa mbi ti bâ aye so Bible ni afa nga ti mû desizion mbi wani ti sara ye ague oko na ni wala pëpe. So lo tene tënë na mbi polele tongaso amû maboko na mbi mingi. Mbi yeda ti tene yaya ti mbi, Caroline, na koli ti lo, Akif, amanda Bible na mbi. A dü Akif na yâ ti sewa ti aTémoin ti Jéhovah pëpe, me lo kono kue awe si lo ga ni. Ye so asara si mbi fa atënë ti bê ti mbi na lo polele, na a yeke ye so mbi yeke lani tâ na bezoin ni.

Mbi hinga so dutingo ti mbi akpa ti Témoin pëpe, me mbi bâ ti mbi lani so ye so mbi sara  abâ gi mbi. Ye oko, tongana mbi yeke manda Bible, mbi ga ti bâ so sarango ye ti mbi anzere na Jéhovah pëpe (Psaume 78:40, 41; aProverbe 27:11). Mbi ga nga ti bâ so a sara nzoni na ambeni zo nga pëpe.

Nga, tongana mbi yeke gue na li ni na yâ ti mandango Bible ni, mbi bâ so tâ raison ayeke dä ti bâ Bible ni tongana tënë ti yanga ti Nzapa. Na tapande, mbi manda so gbâ ti aprophétie ti Bible aga tâ tënë na yâ ti anzene nzene ye kue. Mandango ye so amû maboko na mbi ti zi kite so ayeke lani na bê ti mbi so.

Ngu oko tongaso na peko ti so mbi yeda ti manda Bible, mbi na babâ na mama ti mbi e gue na filiale ti aTémoin ti Jéhovah ti Zamani ti bâ yaya ti mbi ti koli so asara kua kâ. Na bango ngia so ita ti mbi ni ayeke na ni, a pika bê ti mbi mingi. Ngia so mbi yeke gi depuis so la! A nzere nga na mbi ti bâ ngia so ambeni Témoin ti filiale ni so ayeke na ni. Ala yeke tâ nde mingi na akamarade ti mbi so ayeke sara ye gi kirikiri sân ti gbu li na ye so alingbi ti ga na pekoni. Kete na pekoni, mbi zi bê ti mbi na Jéhovah na yâ ti sambela, mbi mû yanga na lo ti mû tanga ti fini ti mbi kue ti sara gi na lo. Tongana mbi wara ngu 19, mbi mû batême.

NZONI YE SO MBI WARA NA PEKONI: Mbi yeke na ngia mingi fadeso na yâ ti gigi ti mbi. Mbi yeke nga na ngia ti fa Bible na azo, ti mû maboko na ala ti manda ye na ndo ti Jéhovah nga na ndo ti aye so lo mû zendo ti sara ande. Sewa ti mbi nga awara nzoni na pekoni: ala gi bê ti ala mbeni pëpe na ndo ti mbi.

Mbi hinga sioni so mbi sara lani, me mbi yeke sara kue ti zia li ti mbi na ndo ni pëpe. Nde na so, li ti mbi ayeke gi na ndo ti pardon ti Jéhovah nga na ndoye so lo yeke na ni na mbage ti mbi. Mbi bâ so tënë ti aProverbe 10:22 so ayeke tâ tënë, a tene: “Tënë nzoni ti L’Éternel asara si zo awara mosoro, na Lo zia vundu dä pëpe.”

[Kete tënë na lembeti 10]

“E yeke sara afête mingi, e yeke gi tere, e yeke nyon mbangi nga e yeke nyon sämba ahon ndo ni”

[Kete tënë na lembeti 11]

“Mbi hinga sioni so mbi sara lani, me mbi yeke sara kue ti zia li ti mbi na ndo ni pëpe”