Michéline: Tongana nyen Sophie?

Sophie: Ye ayeke ape.

Michéline: Mbi yeke na ngia ti wara mo na yanga-da.

Sophie: Mbi kue.

Michéline: Lani, e sara tënë na ndo ti bango ndo ti Nzapa na ndo ti apasi ti e. * Mo tene lani so a yeke mbeni ye so mo yeke hunda tere ti mo dä depuis la, mbilimbili na peko ti so mama ti mo asara accident na oto. Tere ti mama ti mo ni tongana nyen?

Sophie: Mbeni lâ lo duti nzoni, mbeni lâ lo duti nzoni ape. Me ti laso, lo yeke nzoni.

Michéline: A nzere na mbi ti mä tongaso. Mara ti ye ni so a yeke kete ye ape.

Sophie: Tâ tënë. A sara si mbi yeke hunda tere ti mbi na ambeni ngoi, mbi tene, lawa la si pasi ti lo ni ayeke hunzi?

Michéline: Mo yeke na raison. Me lani na hunzingo ti lisoro ti e, mbi zia na mo mbeni hundango tënë, mbi tene, ‘Tongana Nzapa ayeke biani na ngangu ti zi pasi ti azo, ka ngbanga ti nyen si lo zia si e ngbâ gi ti bâ pasi?’

Sophie: En, mbi dabe ti mbi na ni.

Michéline: Kozo ti tene e bâ kiringo tënë ti Bible na ndo ni, zia e kiri kete ti bâ ambeni tënë so e sara lisoro na ndo ni lani.

Sophie: Nzoni.

Michéline: Kozoni kue, e manda lani so même mbeni kota wakua ti Nzapa ândö ahunda tere ti lo na ndani so Nzapa azia si e yeke bâ pasi so. Me Nzapa asuku na lo ndali ni ape; nga lo tene na lo ti duti gi na mabe awe ape.

Sophie: Ti mbi, hingango ni lani la.

Michéline: E manda nga lani so apasi so e yeke bâ asara Jéhovah Nzapa nzoni ape. Na tapande, Bible atene na e so lani na ngoi so azo ti Nzapa awu pono, “lo wu pono nga”. * Ti hinga so tongana e yeke bâ pasi asara Nzapa nzoni ape, a dë bê ti e ape?

Sophie: A dë bê ti e biani.

Michéline: Na hunzingo ni lani e bâ nga so, so Nzapa, Lo so asara e, ayeke na kota ngangu, lo yeke nga na ngangu ti sara mbeni ye ti hunzi apasi ti e.

Sophie: Mbage so la mbi hinga li ti mbi na ni nzoni ape. Tongana Nzapa ayeke na ngangu ti kanga lege na asioni ye so kue so ayeke si so, ndali ti nyen si lo sara ni ape?

Michéline: Ti wara kiringo tënë ni, e yeke gue na Genèse, kozo buku ti Bible. Mo hinga ka mbaï ti Adam na Ève nga na ti lê ti keke so Nzapa ake na ala ti te ni so?

Sophie: En, mbi manda ni na classe-batême. Nzapa ake na ala ti te lê ti keke ni, me ala mä ape, ala te ni.

Michéline: Ni la. Fadeso, zia e bâ aye so ague na Adam na Ève ti sara siokpari so. Aye ni so la ayeke tâ na gunda ti pasi ti e. Mo ye ti diko Genèse chapitre 3, versê 1 ti si na 5?

Sophie: Nzoni. A tene: “Ngbo ayeke na mayele ti handa ahon anyama kue ti benyama so L’Éternel Nzapa asara. Lo tene na wali, Biani, Nzapa atene, Mo lingbi te le-keke kue ti yaka pëpe? wali ni atene na ngbo ni, E lingbi te lê ti keke nde nde ti yaka; me lê ti keke so ayeke na bê yaka, Nzapa atene, I lingbi te pëpe, i ndu pëpe, wala tongaso i kui. Na ngbo ni atene na wali ni, I lingbi kui biani pëpe, teti Nzapa ahinga na lâ ni so i te lê ni, fade lê ti i alungula, na i ga tongana Nzapa, i hinga nzoni na sioni.”

Michéline: Merci. Zia e bâ aversê ni kete si. Kozoni kue, mbeni ngbo la asara tënë na Ève. Me na yâ ti mbeni versê ni nde a tene a yeke lani Satan Zabolo la asara tënë na Ève na lege ti ngbo ni so. * Satan ni ahunda Ève na ndo ti ndia so Nzapa amû na ala na ndo ti mbeni lê ti keke. Nzapa atene nyen la ayeke si na Adam na Ève tongana ala te lê ti keke ni?

Sophie: Lo tene, ala yeke kui.

Michéline: Ni la. Na yâ ti atënë so aga na pekoni, Satan abi mbeni kota tënë na li ti Nzapa. Bâ tënë so lo tene: “I lingbi kui biani pëpe.” Satan aye ti fa so Nzapa ayeke zo ti mvene!

Sophie: Ade mbi mä mbage so lâ oko ape.

Michéline: Tongana Satan airi Nzapa zo ti mvene, a yeke mbeni kota tënë la lo bi na sese so, na a hunda ngoi ti leke tënë ni. Mo hinga ngbanga ti nyen?

Sophie: Mbi hinga ape.

Michéline: Bon, mbi yeke mû na mo mbeni tapande. Bâ so mbeni lâ mbi ga mbi tene na mo so mbi yeke ngangu ahon mo. Mo yeke sara tongana nyen ti fa so a yeke mvene?

Sophie: Mbi yeke tara ngangu ti mo.

Michéline: Tâ gi ni la. Peut-être e yeke soro mbeni nengo ye, na e yeke bâ zo wa la ayeke na ngangu ti yô ni. Biani, zo abezoin ti gue ayo ape ti hinga zo wa la ayeke na ngangu.

Sophie: Tâ tënë.

Michéline: Me fadeso, e zia tënë ti ngangu nde. Tongana mbi tene mbi yeke mbilimbili ahon mo, hingango ni ayeke hio, wala a yeke mû ngoi?

Sophie: A yeke mû ngoi.

Michéline: A bezoin ti tene a tara ngangu ti mbi awe si a hinga a tene mbi yeke mbilimbili?

Sophie: Oko ape.

Michéline: Ti leke tënë so, a hunda ti zia ngoi ahon si azo abâ na lê ti ala wani zo wa na popo ti mbi na mo ayeke mbilimbili ahon mba ti lo.

Sophie: Mo yeke na raison.

Michéline: Fadeso, e kiri e bâ tënë so ayeke na Genèse so. Satan atene ni yeke ngangu ahon Nzapa?

Sophie: Ên-en.

Michéline: So ni so, a yeke ngangu pëpe na Nzapa ti fa mvene ti Satan na lê ni lê ni. Nde na so, Satan atene ni la ni yeke mbilimbili ahon Nzapa. A yeke mo bâ mo tene lo tene na Ève, lo tene, ‘Nzapa ahanda mo handango, me mbi, mbi tene ti mbi tâ tënë.’

Sophie: Tënë ni alï mingi.

Michéline: Ni la, teti so Nzapa ayeke na ndara mingi, lo hinga so ti leke mara ti tënë ni so, a yeke nzoni lo zia ngoi ahon. Tongaso la si azo alingbi ti hinga zo so atene tâ tënë na zo so atene mvene.

Sophie: Me Ève akui-aa! Ye so afa so Nzapa la atene tâ tënë ape?

Michéline: Lo tene tâ tënë. Me, nda ti tënë ti  Satan ni alï mingi. Kiri mo bâ versê  5 ni. Mo bâ mbeni tënë so Satan atene na Ève ge?

Sophie: Lo tene tongana Ève ate lê ti keke ni, lê ti lo ayeke zi.

Michéline: Ni la. Lo tene nga so lo yeke ‘ga tongana Nzapa, lo yeke hinga nzoni na sioni.’ Satan aye ti fa so Nzapa agbanzi mbeni nzoni ye na azo.

Sophie: Ni la.

Michéline: So kue ayeke mbeni kota tënë la.

Sophie: Mo ye ti tene nyen la?

Michéline: Na yâ ti tënë ti Satan so, lo ye ti tene so Ève nga na azo kue alingbi ti duti nzoni sân komandema ti Nzapa. Ge kue, Jéhovah ahinga so nzoni lege ti leke tënë ni a yeke ti zia lege na Satan ti fa ni. Ni la, lo zia ngoi na Satan ti komande dunia ni ti bâ. A yeke ndali ti komandema ti Satan la si e yeke bâ pasi ahon ndo ni so, me ti Nzapa ape. * Me mbeni nzoni tënë ayeke dä.

Sophie: Nzoni tënë ni so ayeke so wa?

Michéline: Bible afa na e apendere tâ tënë use na ndo ti Nzapa. Kozo ni ayeke so, tongana e bâ pasi, a yeke sara Jéhovah nzoni ape. Na tapande, bâ tënë so Gbia David atene na Psaume 31:8. David abâ lani pasi mingi na yâ ti gigi ti lo, me bâ tënë so lo tene na Nzapa na yâ ti sambela. Mo ye ti diko ni?

Sophie: Nzoni. Versê ni atene: “Mbi yeke na ngia na mbi duti na ngia teti nzobe ti Mo; teti Mo bâ vundu ti mbi, na Mo hinga vundu ti âme ti mbi.”

Michéline: Atâa so David abâ pasi mingi, bê ti lo adë ndali ti so lo hinga lo tene Jéhovah ayeke bâ aye kue so asi na lo so. Ti hinga so Jéhovah ayeke bâ aye kue so ayeke si na e, même avundu ti yâ ti bê ti e so azo alingbi ti hinga ti ala ni kue ape, adë bê ti mo ape?

Sophie: A dë bê ti mbi.

Michéline: Use pendere tënë ni ayeke so Nzapa ayeke zia si e bâ gi pasi ni ngbii ape. Bible atene na yâ ti kete ngoi lo yeke ga ti futi sioni komandema ti Satan ni. * Nga lo yeke zi asioni ye kue so ayeke si so biaku biaku, même aye so asi na mo na mama ti mo so kue. Mo ye ti tene mbi ga ti peko ti fa na mo ye so afa biani so Nzapa aga nduru ti hunzi apasi ti e so?

Sophie: Mo ga senge.