Bible afa na e so, na ngoi ti nda ni, futingo ayeke duti ande dä: “Fade mbeni kota ye ti vundu ayeke si, ye ti vundu so mara ni ade ti si lâ oko pëpe ngbene ye so dunia abâ gigi juska fadeso.  . . . Biani, tongana fade a kiri na alango ni so nduru pëpe, ka mitele oko ayeke sö kuâ pëpe.” (Matthieu 24:21, 22). Me Nzapa amû zendo so fade azo mingi ayeke sö kuâ ande, lo tene: “Dunia so angbâ ti hon. . . . Me zo so asara ye so bê ti Nzapa aye, lo ngbâ lakue lakue.”—1 Jean 2:17.

Tongana mo ye ti sö kuâ ande na ti ‘ngbâ lakue lakue’ na ngoi so dunia so ayeke hon, nyen la mo doit ti sara? Eskê mo doit ti bata gbâ ti amosoro ndali ti kekereke wala ti leke ambeni ye nde? Ên-ën. Bible afa na e ambeni ye so e doit ti sara. A tene: “So aye so kue ayeke ga tongana ngu so, a yeke nzoni ala bâ wala dutingo ti ala ayeke tongana nyen na lege ti sarango ye so ayeke nzoni-kue nga na akusala so afa so ala gbu tënë ti Nzapa ngangu; ala ku na ala bata na li ti ala ngoi so lâ ti Jéhovah ayeke si na ayeke duti dä.” (2 Pierre 3:10-12). Na popo ti “aye so kue” so ayeke ga ande tongana ngu so, a yeke wara agouvernement kue ti sioni dunia so nga na azo kue so asoro ti mû peko ti ala ahon ti mû peko ti Nzapa. A yeke polele so, tongana e gi ti bata gbâ ti amosoro ndali ti kekereke, e lingbi ande ti sö kuâ pëpe na yâ ti mara ti futingo ye ni so.

Tongaso, mbeni ye so e lingbi ti sara tongana e ye ti sö kuâ ande ayeke ti mû tere ti e ti sara na Jéhovah Nzapa nga ti gi ti hinga amara ti sarango ye wa la anzere na lo (Sophonie 2:3). Ahon ti mû peko ti azo ti laso nga ti sara sanka ti aye so afa na e so ngoi ti nda ni ayeke nduru, a yeke nzoni e ‘bata na li ti e ngoi so lâ ti Jéhovah ayeke si na ayeke duti dä’. A-Témoin ti Jéhovah apeut ti fa na mo, na yâ ti Bible, tongana nyen la mo lingbi ti sö kuâ na yâ ti ngoi ti futingo ni so ande.