Kiringo tënë na ahunda ti azo
Bibe ti sarango sioni ye abâ gigi tongana nyen?
Zo wa la atara lani ti pusu jésus ti sara sioni ye so zo wa?—Matthieu 4:8-10
Ti tâ tënë ni, azo aye ti duti na siriri, ti sara ye na lege ni nga ti sara ye na nzoni bê. Me, ngbanga ti nyen la si e yeke bâ ka sarango ye ti ngangu na zo, dorongo adroit ti zo nga na sarango sioni na zo? Lakue e yeke mä asioni sango. Ye ni mbeni zo la si ayeke pusu azo ti sara asioni ye ni so?—Diko 1 Jean 5:19.
Nzapa asara azo lani na bibe ti sarango sioni ye? Oko ape. Jéhovah Nzapa asara lani azo na image ti lo, so ti tene lo sara azo na bibe ti tene ala sara ye na ndoye tongana lo (Genèse 1:27; Job 34:10). Me, Nzapa amû nga na azo liberté ti tene ala soro ye so ala ye. Lani, na ngoi so Adam na Ève asoro ti sara sioni ye, ala ke ti sara ye tongana Nzapa, na a sara si ala ga azo so siokpari ayeke na tere ti ala. E wara bibe ti sarango sioni ye ni so na mbage ti ala.—Diko Deutéronome 32:4, 5.
Bibe ti sarango sioni ye ni ayeke ngbâ ande gi tongaso?
Nzapa aye si e dö sese na asioni bibe ti e ni so (aProverbe 27:11). Ni la, lo fa na e aye so e lingbi ti sara ti kpe ti sara asioni ye, nga lo fa na e tongana nyen ti wara tâ ngia. Ti laso, e lingbi pëpe ti sara ye na ndoye tâ gi tongana Nzapa.—Diko Psaume 32:8.
Atâa so bibe ti sarango sioni ye ahon ndo ni laso, Nzapa azia lege na ni gi teti mbeni ngoi, tongaso si azo kue alingbi ti bâ asioni ye ti peko ni na lê ti ala wani (2 Pierre 3:7-9). Me na yâ ti kete ngoi, azo so amä yanga ti Nzapa la si ayeke mû ande ndo ti sese kue, na ala yeke duti na ngia.—Diko Psaume 37:9-11.
