TONGANA mo diko atënë use so, ti so wa la ague oko na bango ndo ti mo? Azo mingi abâ atënë ti Saul ti Tarse, so a iri lo nga bazengele Paul, tongana mbeni tënë ti dengo bê nga mbeni nzoni wango (Kusala 17:26, 27). A yeke wara gbâ ti ambeni tënë ti dengo bê tongaso na yâ ti Bible. Na tapande, Jésus atene lani mbeni sambela so na yâ ni a yeke wara ambeni atënë so afa so adisciple ti lo apeut ti hinga Nzapa nga ti wara tufa ti lo.—Jean 17:3.

Me, ambeni wandara ayeke nga na ambeni bango ndo nde, tongana ti Philon so. Ala fa so e azo e lingbi lâ oko ape ti hinga Nzapa, ngbanga ti so zo alingbi ti hinga li ti lo na lo Nzapa ni ape. Me vrai tënë ni ayeke so wa?

Bible afa polele so ambeni ye na ndo ti Nzapa ayeke dä so ayeke ngangu na zo ti hinga ni kue. Na tapande, ngu ti lo, hingango ndo ti lo nga na kota ti ndara ti lo. Aye ota so ahon gbungo li ti zo. Atâa so kue, aye ni so akanga lege pëpe na e ti hinga Nzapa. Ni la, gbungo li na ndo ti aye ni so ayeke mû maboko na e ti “ga nduru na Nzapa”. (Jacques 4:8). Zia e bâ ambeni tapande ti aye so azo alingbi ti gbu ndani ape. Na pekoni, e yeke bâ ambeni ye na ndo ti Nzapa so e peut ti gbu ndani.

NGU TI LO: Bible atene so “giriri kozoni, na lakue lakue,” Nzapa ayeke gi dä (Psaume 90:2). Tënë so aye ti fa so, Nzapa ayeke na tongo nda ni ape nga lo yeke na kongo nda ni ape. Na bango ndo ti azo, “zo alingbi hinga nda ti ngu ti fini ti Lo pëpe”.—Job 36:26.

Nzoni ye ni ayeke so: Nzapa amû zendo ti fini ti lakue lakue na ala so ahinga lo (Jean 17:3). Tongana nyen la e lingbi ti mä na bê na mara ti zendo tongaso, tongana fade Nzapa ni wani ayeke pëpe na fini lakue lakue? A yeke gi Nzapa, so ayeke “Gbia ti lakue lakue,” la apeut ti sara si mara ti zendo ni so aga tâ tënë.—1 Timothée 1:17.

HINGANGO NDO TI NZAPA: Bible afa so “zo alingbi pëpe ti hinga aye kue so Nzapa ahinga,” ngbanga ti so apensé ti lo ayeke kota ahon ti e (Ésaïe 40:28; 55:9, FD). Ni la, Bible ahunda tënë so, a tene: “Zo wa si ahinga bibe ti Jéhovah si lo fa ye na lo?”—1 aCorinthien 2:16.

Nzoni ye ni ayeke so: Nzapa ayeke na ngangu ti mä asambela ti azo kutu mingi na oko ngoi (Psaume 65:3). Même tongana mbeni kete ndeke oko atï na sese, lo yeke hinga. Eskê a peut ti si so mbeni lâ Nzapa apeut encore ape ti pensé na mo nga ti mä asambela ti mo, ngbanga ti so aye ayeke mingi na yâ ti li ti lo? Oko ape, ngbanga ti so mbeni ye ti karango lo ayeke dä ape. Nga, Bible atene so, na lê ti Nzapa, “ngere ti [e] ahon ngere ti gbâ ti anzêrë.”—Matthieu 10:29, 31.

AYE KUE SO NZAPA ASARA: Bible afa so zo alingbi ti “hinga pëpe nda ti kusala so Nzapa asara, a komanse na lâ ti kozoni juska na lâ ti nda ni [wala “ti londo na ngoi so lo to nda ti sara ye ti si na ngoi so lo hunzi ni”, FD].” (Zo-ti-fa-tene 3:11) Tongaso, e lingbi lâ oko ape ti hinga aye kue na ndo ti Nzapa. Ndara so ayeke na peko ti aye so Nzapa asara, “zo alingbi nga ti hinga” ni ape (aRomain 11:33). Me, Nzapa aye ti fa aye so lo sara na azo so aye ti nzere na lê ti lo.—Amos 3:7.

Nzoni ye ni ayeke so: Tongana mo yeke diko Bible nga mo yeke manda ni, mo yeke ngbâ ande lakue ti hinga afini ye na ndo ti Nzapa nga na aye so lo ye ti sara. Ye so aye ti fa so, e yeke ngbâ ande lakue lakue ti ga nduru na Babâ ti e ti yayu.

So e lingbi pëpe ti hinga ambeni ye na ndo ti Nzapa, a ye ti tene pëpe so e peut pëpe ti hinga lo. A yeke wara na yâ ti Bible gbâ ti asango so apeut ti mû maboko na e ti hinga Nzapa. Bâ ambeni tapande ni:

IRI TI NZAPA: Bible afa na e so Nzapa wani la azia iri na ndo ti lo. Lo tene: “Mbi yeke [Jéhovah, FD], so ayeke iri ti Mbi.” Iri ti Nzapa asigigi fani 7000 tongaso na yâ ti Bible, ahon tanga ti iri ti azo kue.—Ésaïe 42:8.

Nzoni ye ni ayeke so: Jésus atene na yâ ti tapande ti sambela ti lo, lo tene: “Babâ ti e so ayeke na yayu, e ye iri ti Mo aga nzoni-kue.” (Matthieu 6:9, La Sainte Bible en sango). Mo nga kue mo peut ti di iri ti Nzapa na yâ ti sambela ti mo? Jéhovah ayeke sö azo kue so afa so ala bâ iri ti lo na nene ni.—aRomain 10:13.

NDO TI DUTI TI NZAPA: Bible afa so ndo ayeke use, mbeni oko ayeke yayu, ndo so a-ange ayeke dä, nga mbeni ayeke sese ti e so e yeke na ndo ni (Jean 8:23; 1 aCorinthien 15:44). Na yâ ti Bible, fani mingi tënë “yayu” aye ti sara tënë ti ndo so azo so ayeke na tere ti yingo ayeke duti dä. Tongaso, “ndo ti duti” ti Nzapa ayeke na “yayu”.—1 aGbia 8:43.

Nzoni ye ni ayeke so: E wara vrai bango ndo na ndo ti Nzapa. Nzapa ayeke pëpe mbeni ngangu so ayeke na ndo kue nga so ayeke na yâ ti aye kue. Jéhovah  ayeke mbeni vrai Zo nga ndo ti duti ti lo ayeke nga dä. Me, Bible atene: “Mbeni ye so Nzapa asara so ahonde na lê ti lo ayeke dä pëpe.”—aHébreu 4:13.

ASARANGO YE TI TERE TI NZAPA: Bible afa apendere sarango ye ti tere ti Jéhovah. Na tapande, “Nzapa ayeke ndoye.” (1 Jean 4:8). Lo yeke tene mvene lâ oko ape (Tite 1:2). Lo yeke sara kangbi na popo ti azo ape, lo yeke sara nzoni bê na zo, lo yeke bâ mawa ti zo nga lo yeke sara ngonzo hio hio ape (Exode 34:6; Kusala 10:34). Bê ti azo mingi adö ti bâ so Bible afa so Nzapa ayeke na nzara ti ga kamarade ti azo so ane lo.—Psaume 25:14.

Nzoni ye ni ayeke so: Mo peut ti ga kamarade ti Jéhovah (Jacques 2:23). Na pekoni, tongana mo hinga asarango ye ti tere ti Jéhovah awe, mo lingbi ti comprendre ambaï ti Bible nzoni.

Bible afa aye polele na ndo ti Jéhovah Nzapa. Nzapa aye si e hinga lo, atâa so a yeke duti aye kue la e yeke hinga ni na ndo ti lo ape. Tënë ti lo, so ayeke Bible, atene: “Tongana mo gi Lo, fade mo wara Lo.” (1 Chronique 28:9). Ngbanga ti nyen la mo tara pëpe ti hinga Nzapa na lege ti dikongo ambaï ti Bible nga na gbungo li na ndo ni? Tongana mo sara ni, Bible atene so Nzapa ayeke “ga nduru na [mo].”—Jacques 4:8.

Peut-être mo hunda tere ti mo, mo tene: ‘So mbi peut ti hinga aye kue na ndo ti Nzapa ape so, mbi peut ti ga kamarade ti lo ni tongana nyen?’ Zia e bâ ye so: Mbeni zo so aye ti ga kamarade ti mbeni docteur abezoin ti tene lo wara diplôme ti docteur si? Oko ape! Lo peut ti sara ti lo mbeni kua so ayeke tâ nde mingi na ti docteur ni. Me, ye oko akanga lege na ala pëpe ti sara kamarade na popo ti ala. Kota ye ni ayeke gi ti tene lo hinga asarango ye ti tere ti docteur ni, aye so docteur ni aye nga na aye so lo ye ape. Legeoko nga, tongana mo manda Bible, mo peut ti hinga asarango ye ti tere ti Jéhovah, na a yeke tâ gi ye so mo yeke na bezoin ni ti sara kamarade na lo la.

A hon ti tene Bible atene atënë so e hinga li ti e na ni ape na ndo ti Nzapa, Bible amû na e asango so e yeke na bezoin ni ti hinga ye na ndo ti Nzapa. Mo ye ti hinga ye na ndo ti Jéhovah Nzapa? A-Témoin ti Jéhovah ayeke manda ka Bible senge senge na azo, na da ti ala. E wa mo ti bâ aTémoin ti Jéhovah ti ndo so mo yeke dä wala ti gue na ndo ti site Internet ti e, www.dan124.com.