Akamarade ayeke sara ka lisoro na popo ti ala ti kpengba songo ti ala ni. Legeoko nga, Nzapa atisa e ti sara lisoro na lo, tongaso si e kpengba songo ti e na lo. Lo tene: “Fade i di iri ti Mbi, na i gue i sambela Mbi, na fade Mbi mä i.” (Jérémie 29:12). Tongana mo yeke sara tënë lakue na Nzapa, mo yeke “ga nduru na [lo], na fade lo yeke ga nduru na [mo].” (Jacques 4:8). Bible atene: “L’Éternel ayeke nduru na azo kue so adi iri ti Lo.” (Psaume 145:18). Tongana e yeke sambela Nzapa mingi, songo ti e na lo ayeke ga nzoni ahon ti kozo.

Jésus atene: “Na popo ti ala so, zo wa la tongana molenge ti lo ahunda na lo mapa, fade lo yeke mû na lo tênë? Wala, peut-être molenge ni ahunda na lo susu, fade lo yeke mû na lo ngbo? Tongaso, asinga ala so, . . . ala hinga tongana nyen ti mû amatabisi so ayeke nzoni na amolenge ti ala, si fade Babâ ti ala so ayeke na yayu ayeke mû anzoni ye na azo so ahunda ni na lo pëpe?” (Matthieu 7:9-11). Me, Nzapa ahunda na mo ti sambela lo ngbanga ti so “lo yeke bi bê ti lo na ndo ti [mo]” nga lo ye ti aidé mo (1 Pierre 5:7). Lo hunda même na mo ti fa akpale ti mo na lo. Bible atene: “Ala gi bê ti ala na ndo ti mbeni ye pëpe, me na yâ ti aye kue, na lege ti sambela, na lege ti vorongo tere na Nzapa nga na sambela ti kiringo singila, ala hunda na Nzapa aye so agbu bê ti ala.”—aPhilippien 4:6.

Azo ti gingo nda ti aye na ndo ti azo abâ so azo kutu mingi mingi ayeke na bezoin ti sambela. Na popo ti azo ni so, a yeke wara même ambeni zo so atene Nzapa ayeke dä ape nga na azo so ahinga mbilimbili pëpe wala biani Nzapa ayeke dä wala pëpe. * Ye so aye ti fa so e azo e bezoin Nzapa. Jésus atene: “Ngia ayeke na ala so ahinga so ala yeke na bezoin ti aye ti yingo, teti royaume ti yayu ayeke ti ala.” (Matthieu 5:3). Mbeni lege ti kaï na nzara ni so ayeke ti sara lisoro lakue na Nzapa.

Tongana e sambela Nzapa, anzoni ye wa la e peut ti wara na pekoni?