So a yeke tënë so mbeni équipe ti azo so agi nda ti ye na ndö ti changement ti climat atene la. Tongana mo yeda so mbeni Wasarango ye ayeke dä so ayeke pensé na azo, tënë ti ascientifique so apeut ti dabe ti mo so Nzapa aleke sese na ngangu ti tene lo wani lo leke aye so abuba dä.

So azo abuba sese mingi, a yeke ngangu ti tene sese ni wani aleke aye so abuba dä. Ngbanga ti nyen la e peut ti duti sûr so Nzapa ayeke sara ande mbeni ye ndali ni?

Molongo ti aversê so ayeke na yâ ti encadré so adë bê ti e so sese ayeke ngbâ ande lakue nga ayeke ngbâ même nzoni.

• Nzapa la asara sese. “Na tongo nda ni Nzapa asara yayu na sese.”—Genèse 1:1

• Wa ti sese ni ayeke Nzapa. “Sese na aye kue so ayeke na ndö ni ayeke ti Jéhovah a.”—Psaume 24:1

• Nzapa aleke sese ti tene angbâ lakue. “Lo sara si sese aluti nzoni na ndö ti fondation ni; a yeke bougé na place ni lâ oko pëpe.”—Psaume 104:5

• Nzapa amû zendo so aye so ayeke na fini ayeke ngbâ ande na ndö ti sese lakue lakue. ‘Tâ Nzapa, Lo la lo leke sese . . . Lo leke ni ti tene angbâ gï senge pëpe, me lo leke ni ti tene azo aduti dä.’—Ésaïe 45:18

• Nzapa amû zendo so azo ayeke ngbâ ande na ndö ti sese lakue lakue. “Sese ayeke ga ande ye ti azo ti mbilimbili, na ala yeke ngbâ na ndö ni lakue lakue.” —Psaume 37:29

Nzapa aleke sese ti tene azo aduti na ngia na yâ ti gigi ti ala nga ti tene ye so ala yeke sara abuba ni ape. Bible atene so tongana ngoi ni alingbi, Jéhovah Nzapa ayeke hunzi ande na aye kue so azo ayeke sara ndali ti intérêt ti ala wani ti buba sese. —Apocalypse 11:18

Bible atene so Nzapa ayeke sara ande si sese aga mbeni pendere paradis nga lo yeke zi yâ ti maboko ti lo ti “mû na aye kue so ayeke na fini ye so ala sara nzara ni.”—Psaume 145:16