Aye so mo leke na bê ti mo ti sara ayeke gï pëpe aye so mo ye ti tene asi. Ti leke ti sara mbeni ye a hunda ti leke plan ti ye ni kozo, ti duti nduru ti changé aye na yâ ni tongana mbeni ye aye ti kanga lege, nga ti sara kua ngangu ndali ni.

A peut ti hunda alango wala ayenga mingi ti sara mbeni ye so mo leke na bê ti mo ti sara; ti ambeni a peut ti hunda anze mingi, ngu oko wala angu mingi. Tongana a yeke ti so ahunda ngu mingi, mo peut ti zia na gbele mo ti sara ambeni kete kete ye so ayeke gue na mo ti sara ye so mo leke ti sara so.

Tongana mo sara mbeni ye so mo leke ti sara, mo yeke duti na confiance na mo wani, a yeke nzere na amba ti mo mingi nga mo yeke duti na ngia mingi.

Confiance na mo wani: Tongana mo wara lege ti sara ambeni kete kete ye so mo zia na gbele mo ti sara, mbeto ayeke sara mo pëpe ti zia akota ye na gbele mo ti sara. Nga, mo yeke sara confiance na terê ti mo tongana mo tingbi na akpale ti lango oko oko.

Songo ti kamarade: A nzere ka mingi na azo ti sara songo na azo so ayeke na aye so ala leke na bê ti ala ti sara, so ti tene azo so ahinga ye so ala ye nga so ala yeke sara effort ndali ni. Nga, mbeni nzoni lege ti tene songo ti kamarade akpengba ayeke ti sara kua maboko na maboko na zo so mo na lo ayeke na même ye so ala leke ti sara.

Duti na ngia: Tongana mo leke ti sara mbeni ye si mo sara ye alingbi na ni, a yeke nzere na mo mingi.

“Mbi ye mingi ti zia ye na gbele mbi ti sara. A yeke sara si mbi yeke na ye ti sarango ni nga mbi yeke na mbeni ye so mbi doit ti sara effort ti wara ni. Nga tongana mo wara ye so mo ye ti wara so, a yeke nzere na mo mingi ti tene: ‘Hé, tâ mbi la mbi sara ye so mbi ye ti sara so ma!’”—Christopher.

MAMA-NDIA TI BIBLE: “Zo so ayeke bâ pupu, lo yeke lu ande angongoa ti kobe pëpe; na zo so ayeke bâ ambinda, lo yeke ko ande lê ti kobe pëpe.”—Zo-ti-fa-tene 11:4.

Tongana mo ye ti zia ambeni ye na gbele mo ti sara nga ti wara ni, mû peko ti awango so na gbe ni ge so oko na oko.

Hinga aye so mo zia na gbele mo nzoni. Sara liste ti aye so mo zia na gbele mo ti sara, sû ni na molongo ni so ti tene kozo ye so mo ye ti sara, use ni, ota ni ti gue na ni.

Leke aye so mo ye ti sara. Sara ye alingbi na aye so a fa na gbe ni ge ti leke aye so mo zia na gbele mo ti sara:

• Gi ti zia mbeni ngoi so mo hinga so mo peut ti mû ti sara na ye ni.

• Fa aye so mo doit ti sara ni oko na oko ti si na ye so mo ye ti sara so.

• Gi ti hinga aye so mo bâ so apeut ti kanga lege na mo, nga gbu li ti mo kozo ti bâ tongana nyen la mo peut ti hon ndö ni.

Sara ye ni. Ku pëpe ti tene mo hinga anzene nzene ye kue na ndö ti ye ni awe si mo komanse ti sara ni. Hunda terê ti mo: ‘Vrai ye so mbi doit ti sara kozo ayeke nyen? Na pekoni, sara ye ni so. Hinga aye so mo sara oko na oko ti si na ye so mo ye ti sara so.

MAMA-NDIA TI BIBLE: “Tongana azo so asara kua ngangu aleke gere ti akua ti ala, ye ni ayeke ga gï nzoni.”—aProverbe 21:5.