Eskê dunia nga na fini abâ gigi gï tongaso wala Nzapa la acréé ni? Tënë so aphysicien use so atene na début ti article so nga na atënë ti Bible so ayeke na Genèse 1:1 na ndö ti kiringo tënë na question so ague tâ nde mingi. Azo aluti na ndö ti bango ndo ti ala nganganga. Me, mingi ti azo ayeke sûr ape. Azo ayeke papa na lege ti ambeti so ala sigi na ni nga ala yeke pika patara na ndö ni na télé.

Peut-être aprofesseur ti mo so ayeke sûr na terê ti ala afa na mo so Nzapa la acréé aye ape, nga so dunia na fini abâ gigi gï tongaso. Me eskê ala fa na mo polele ndani so Nzapa ayeke dä ape? Na mbage, mo peut ti mä akota zo ti abungbi ti Nzapa afa so Lo so acréé aye kue ayeke dä. Me eskê ala fa ndani so ala tene tongaso? Wala ala tene na mo ti ye gï dä na ni tongana tënë ti mabe?

Kite ayeke dä ape so, mo gbu li na ndö ti question so nga peut-être mo pensé so zo oko apeut ti tene ape so Nzapa ayeke dä wala lo yeke dä ape. Nga peut-être mo hunda terê ti mo wala a yeke kota ye ti wara kiringo tënë ni.

Zingo na lango! so ayeke fa na mo kozoni kue ambeni ye so amû lege na azo mingi ti yeda so Lo so acréé aye kue ayeke dä. Na pekoni, a yeke fa ndani so kiringo tënë na hunda so na ndö ti lege so fini abâ gigi ayeke kota ye.