Aye so Bible afa ayeke na ngangu ti changé gigi ti zo na mbeni fason so a-étonné zo. Zia e bâ tapande ti ambeni koli use: Ricardo na Andres.

RICARDO: Na ngoi so mbi yeke na ngu 15, mbi lï na yâ ti mbeni groupe ti abandit. Mbi ye ti sara ye tongana ala. Tongaso, mbi leke na bê ti mbi ti tene a kanga mbi ngu 10! A kpa ye ti buba. Me na yâ ti quartier ti mbi, azo ane azo so ayeke angbene zo ti kanga mingi. Mbi kue mbi ye lani ti ga tongaso.

Mbi sara ye kue so azo ti yâ ti groupe ti abandit ayeke sara ka: nyongo mbangi, lango-sioni nga sarango ye ti ngangu na azo. Mbeni lâ na bï, a tiré ngombe na ndö ti e. Mbi pensé so mbi yeke kui, me mbi réussir ti kpe. Na pekoni, mbi komanse ti gbu li na ndö ti fini ti mbi nga na aye so mbi ye ti sara, na mbi décidé ti changé. Me mbi sara ni tongana nyen? Zo wa la ayeke aidé mbi?

Mingi ti afami ti mbi ayeke na ngia ape, problème ahon ndö ti ala. Me mbeni koya ti mbi ayeke ti lo na problème na yâ ti sewa ti lo ape. Mbi hinga so ala yeke lani anzoni zo na ala yeke sara ye ague oko na aye so Bible afa. Mbeni lâ, ala fa na mbi so iri ti Nzapa ayeke Jéhovah. Tongaso, kete na peko ti ngombe so apika na ndö ti e so, mbi sambela Jéhovah, mbi di iri ti lo na mbi hunda na lo ti aidé mbi. Gï na ndade ni, mbeni Témoin ti Jéhovah apika yanga-da ti mbi! Lo la lo ga zo so amanda Bible na mbi.

A tardé ape, mbi tingbi na mbeni kota kpale. Angbene kamarade ti mbi ni amanke ti iri mbi ape, ala ye si e wara terê e passé temps. Atâa so a yeke ngangu na mbi ti ke, mbi tene na ala ên-ën. Mbi ye ti zia lege ti mandango Bible ape na terê ti mbi anzere ti sara tongaso! Gigi ti mbi achangé mingi, na mbi yeke na tâ ngia.

Mbi rappelé so, so mbi ngbâ lani na popo ti abandit, mbi sambela Nzapa ti tene mbeni lâ a kanga mbi ngu 10 tongaso si azo ane mbi. Ti fadeso, mbi sambela lo ti tene lo aidé mbi ti fa tënë ti lo na azo teti al’heure mingi teti ngu 10, tongaso si mbi aidé azo tongana ti so a aidé mbi so. Nzapa amä sambela ti mbi, ndali ti so a sara ngu 17 awe la mbi yeke fa tënë ti lo na azo teti al’heure mingi so. Ala hinga mbeni ye? Mbi sara nga kanga lâ oko ape.

Mingi ti angbene kamarade ti mbi asara kanga aninga nga ambeni akui. Tongana mbi pensé na aye so kue, mbi mû merci na ambeni fami ti mbi so ayeke aTémoin ti Jéhovah. Ala yeke azo so ayeke nde, ndali ti so ala sara aye so Bible afa. Mbi ne ala mingi; lâ oko mbi ne même amba ti mbi abandit tongaso ape. Kota ye ni ayeke so, mbi mû merci na Nzapa so afa na mbi nzoni lege so mbi doit ti vivre na ni.

 ANDRES: Mbi kono na yâ ti mbeni quartier so ayeke pauvre. Nyongo mbangi, nzi, fango zo nga lango-sioni amû ndo. Babâ ti mbi ayeke zo ti nyongo sämba nga na mbangi. Babâ na mama ti mbi ayeke tiri lakue nga ala yeke zonga mba.

Na temps so mbi ngbâ maseka mingi, mbi komanse ti nyon sämba nga na mbangi. Mbi yeke fono na bê ti lege, mbi yeke nzi ye nga mbi yeke kä ni. Na ngoi so mbi kono, babâ ti mbi agi ti sara songo mingi na mbi, me lo sara ni na nzoni fason ape. Lo fa na mbi ti tene mbi lï na mbangi nga na ambeni sioni ye ti tene mbi kä ni. Mbi wara nginza mingi tâ gï hio tongaso. Mbeni lâ, azo ti lapolice aga na yanga-da ti mbi ala gbu mbi. A dë ngbanga ti ngu oku na ndö ti mbi, ndali ti so a ngbâ kete mbi fâ lani mbeni zo.

Na mbeni ndapre, a sara tënë na e azo ti kanga ni kue na mbeni haut-parleur na a hunda na e ti ga ti sara lisoro na aTémoin ti Jéhovah na ndö ti Bible. Mbi yeda ti gue. Aye so ala fa ayeke na lege ni; ge la aTémoin ti Jéhovah akomanse ti manda Bible na mbi. Ala gi lani pëpe ti woko yâ ti atënë ti Bible, ala fa na mbi andia ti Nzapa so ayeke mbilimbili.

Hio mbi ga ti bâ so, tongana mbeni zo a-aidé mbi ape mbi peut ti changé vrai ape, surtout so amba ti mbi azo ti kanga ayeke zia mbeto na yâ ti mbi ndali ti so ala ye ti tene mbi manda Bible ape. Tongaso, mbi sambela ti wara ngangu nga na ndara, na Jéhovah a-aidé mbi. Mbi wara courage ti fa même tënë ti Bible na amba ti mbi azo ti kanga ni.

Na ngoi so a zi mbi, bê ti mbi agi mbi mingi, a sara même si mbi ye ti ngbâ na da ti kanga ni! Na sigingo ti mbi, mingi ti azo ti kanga ni asara maboko na mbi ti tene na mbi ti gue nzoni. Ambeni même atene na mbi na nzoni bê atene: “Kiri na yanga-da kete pasteur.”

Tongana mbi zia fade lege na Nzapa ti fa ye na mbi ape, ka mbi hinga ye so adoit ti si na gigi ti mbi ape. Mbi kiri merci mingi mingi so Nzapa andoye mbi na lo bâ mbi lani pëpe tongana mbeni zo so apeut lâ oko ti changé ape. *