සාවුල් ඉශ්‍රායෙලයේ පළවෙනි රජ බවට පත් වුණා. ඒ වුණාට යෙහෝවා එයාව එපා කෙරුව නිසා, එයා වෙනුවට රජ වෙන්න තෝරාගත්තේ දාවිත්වයි. අපිට දාවිත් ගැන ගොඩක් තොරතුරු ඉගෙනගන්න ලැබෙනවා. තරුණ කාලේදී, එයා ගොලියත් කියන යෝධයාට විරුද්ධව සටන් කෙරුවා. පස්සෙ කාලෙකදී, එයාට ඊර්ෂ්‍යා කෙරුව සාවුල් රජුගෙන් බේරිලා පැනලා යන්න දාවිත්ට සිද්ධ වුණා. ඊට පස්සේ, දාවිත් මෝඩ දෙයක් කරන්න කලින් ලස්සන අබීගායිල් එයාව නැවැත්තුවා.

ඊළඟට, දාවිත්ට පස්සේ ඉශ්‍රායෙලයේ රජ වුණ දාවිත්ගේ පුතා සාලමොන් ගැන ගොඩක් දේවල් අපිට දැනගන්න ලැබෙනවා. ඉශ්‍රායෙලයේ මුල් රජවරු තුන්දෙනාම අවුරුදු 40 ගානේ පාලනය කළා. සාලමොන්ගේ මරණයෙන් පස්සේ, ඉශ්‍රායෙල් දේශය උතුරු රාජ්‍යය හා දකුණු රාජ්‍යය කියලා රාජ්‍යවල් දෙකකට බෙදුණා.

ගෝත්‍ර 10කින් හැදුණ උතුරු රාජ්‍යය අවුරුදු දෙසිය පනස්හතක් පැවතුණා. ඊට පස්සේ ඒක අෂූර්වරුන් අතින් විනාශ වුණා. ඊට අවුරුදු එකසිය තිස්තුනකට පස්සේ ගෝත්‍ර දෙකකින් හැදුණ රාජ්‍යයත් විනාශ වුණා. මේ කාලයේදීයි ඉශ්‍රායෙල්වරුන්ව බබිලෝනියේ වහලුන් හැටියට අරන් ගියේ. ඉතින් හතරවෙනි කොටසේ අවුරුදු පන්සිය දහයක ඉතිහාසයක් ගැන කතා කරනවා. කියවන්න ආස හිතෙන දේවල් හුඟක් මේ කාලයේදී සිද්ධ වුණා. අපිට මේවා ගැන දැන් ඉගෙනගන්න පුළුවන්.