පළවෙනි රාජාවලිය 22:1-53
22 අවුරුදු තුනක් පුරා සිරියානුවන් සහ ඊශ්‍රායෙල්වරු අතරේ යුද්ධ තිබුණේ නැහැ.
2 තුන්වෙනි අවුරුද්දේදී යූදාවල රජ වුණ යෙහෝෂපාට්+ ඊශ්‍රායෙල්වල රජව හම්බ වෙන්න ගියා.+
3 ඒ වෙලාවේ ඊශ්‍රායෙල්වල රජ එයාගේ නිලධාරීන්ට මෙහෙම කිව්වා. “ඔයාලා දන්නවාද රාමොත්ගිලියද්+ අයිති අපිට කියලා? ඒත් ඒක සිරියාවේ රජගෙන් ගන්න අපි තාම මුකුත් කරලා නැහැ.”
4 ඊටපස්සේ එයා යෙහෝෂපාට් රජට මෙහෙම කිව්වා. “රාමොත්ගිලියද්වලට ගිහින් සටන් කරන්න ඔයා මාත් එක්ක එනවාද?” එතකොට යෙහෝෂපාට් ඊශ්‍රායෙල්වල රජට මෙහෙම කිව්වා. “මම ඔයාත් එක්ක එන්නම්. මගේ හමුදාව ඔයාගේ හමුදාව කියලා හිතන්න. මගේ අශ්වයන් ඔයාගේ අශ්වයන් කියලා හිතන්න.”+
5 ඒත් යෙහෝෂපාට් “අපි ඉස්සෙල්ලා+ මේ ගැන යෙහෝවාගෙන් අහලා බලමුද”+ කියලා ඊශ්‍රායෙල්වල රජගෙන් ඇහුවා.
6 ඉතින් ඊශ්‍රායෙල්වල රජ අනාගතවක්තෘවරු 400දෙනෙක් විතර රැස් කරලා එයාලාගෙන් මෙහෙම ඇහුවා. “මම රාමොත්ගිලියද්වලට විරුද්ධව සටන් කරන්න යන්නද? එහෙම නැත්තං ඒක අත්හැරලා දාන්නද?” එතකොට එයාලා “යන්න. රජතුමාට ඒ නගරේ අල්ලගන්න යෙහෝවා උදව් කරනවා” කියලා කිව්වා.
7 ඒත් යෙහෝෂපාට් මෙහෙම ඇහුවා. “යෙහෝවා දෙවියන්ගේ අනාගතවක්තෘවරයෙක් මෙහේ නැද්ද? අපි එයාගෙනුත් අහලා බලමු දෙවියන් මේ ගැන මොනවාද කියන්නේ කියලා.”+
8 එතකොට ඊශ්‍රායෙල්වල රජ යෙහෝෂපාට්ට මෙහෙම කිව්වා. “යෙහෝවාගෙන් මේ ගැන අහන්න පුළුවන් තව එක මනුස්සයෙක් නම් ඉන්නවා.+ හැබැයි මට එයාව පේන්න බෑ.+ එයා මං ගැන කියන්නෙම නරක අනාවැකි.+ කවදාවත් හොඳ එකක් නම් කියලා නෑ. එයා තමයි ඉම්ලාහ්ගේ පුතා මිකායා.” ඒත් යෙහෝෂපාට් කිව්වා “රජතුමා එහෙම කියන එක හොඳ නැහැ” කියලා.
9 ඉතින් ඊශ්‍රායෙල්වල රජ එයාගේ නිලධාරියෙක්ට එන්න කියලා මෙහෙම කිව්වා. “ඉක්මනින් ගිහින් ඉම්ලාහ්ගේ පුතා මිකායාව මෙහෙට එක්කගෙන එන්න.”+
10 ඒ වෙලාවේ ඊශ්‍රායෙල්වල රජ සහ යූදාවල රජ වුණ යෙහෝෂපාට් රාජකීය ඇඳුම් ඇඳගෙන සමාරියේ දොරටුව ළඟ තිබුණ කමතේ එයාලාගේ සිංහාසනවල ඉඳගෙන හිටියා. අනාගතවක්තෘවරු හැමෝම එයාලා ඉස්සරහා අනාවැකි කියකියයි හිටියේ.+
11 එතකොට කෙනානාගේ පුතා වුණ ශෙදකියා යකඩ අං දෙකක් හදාගෙන මෙහෙම කිව්වා. “‘ඔබ සිරියානුවන්ට මේ අංවලින් ඇනලා* එයාලව නැත්තටම නැති කරනවා’ කියලා යෙහෝවා කිව්වා.”
12 අනිත් අනාගතවක්තෘවරු හැමෝමත් ඒකට සමාන අනාවැකි කිව්වා. “රාමොත්ගිලියද් නගරෙට යන්න. ඔබ අනිවාර්යයෙන්ම දිනනවා. රජතුමාට ඒ නගරේ අල්ලගන්න යෙහෝවා උදව් කරනවා” කියලා එයාලා කිව්වා.
13 ඉතින් මිකායාව එක්කගෙන එන්න ගිය පණිවිඩකරු මිකායාට මෙහෙම කිව්වා. “මේ අහන්න! අනාගතවක්තෘවරු හැමෝම කියන්නේ රජතුමා දිනනවා කියලා. අනේ, ඉතින් ඔයාත් ඒ වගේ හොඳ දෙයක් කියන්න.”+
14 ඒත් මිකායා එයාට මෙහෙම කිව්වා. “ජීවමාන දෙවි වන යෙහෝවා ඉස්සරහා දිවුරලා මම ඔයාට කියනවා, යෙහෝවා මට කියන දෙයක් ඇරෙන්න වෙන කිසිම දෙයක් කියන්න මට බැහැ.”
15 මිකායා රජ ළඟට ආවාට පස්සේ රජ මෙහෙම ඇහුවා. “මිකායා, අපි රාමොත්ගිලියද්වලට විරුද්ධව සටන් කරන්න යන්නද? එහෙම නැත්තං ඒක අත්හැරලා දාන්නද?” එතකොටම එයා “යන්න, ඔබ අනිවාර්යයෙන්ම දිනනවා. රජතුමාට ඒ නගරේ අල්ලගන්න යෙහෝවා උදව් කරනවා” කියලා කිව්වා.
16 එතකොට රජ මෙහෙම කිව්වා. “ඔයා යෙහෝවාගේ නමින් කතා කරද්දී මට ඇත්ත කියයි කියලයි මං බලාපොරොත්තු වෙන්නේ. ඇත්ත කියන්නේ කියලා කී සැරයක් ඔයාට දිවුරන්න කියලා මං කියන්න ඕනෙද?”
17 ඉතින් මිකායා මෙහෙම කිව්වා. “එඬේරෙක් නැති බැටළුවන් වගේ ඊශ්‍රායෙල්වරු කඳුකරය පුරා විසිරිලා ඉන්න විදිහ මට පේනවා.+ යෙහෝවා කියන්නේ මේකයි. ‘මෙයාලට දැන් ස්වාමියෙක් නැහැ. ඉතින් එයාලා එක් එක් කෙනාට පුළුවන් එයාලාගේ ගෙවල්වලට සමාදානයෙන් යන්න.’”
18 එතකොට ඊශ්‍රායෙල්වල රජ යෙහෝෂපාට්ට මෙහෙම කිව්වා. “මං ඔයාට කිව්වේ නැද්ද ‘එයා මං ගැන කියන්නෙම නරක අනාවැකි. කවදාවත් හොඳ දෙයක් නම් කියලා නෑ’ කියලා?”+
19 ඊටපස්සේ මිකායා මෙහෙම කිව්වා. “යෙහෝවා කියන දේට ඇහුම්කන් දෙන්න. යෙහෝවා දෙවියන් ඔහුගේ සිංහාසනයේ ඉඳගෙන ඉන්නවා මං දැක්කා.+ ස්වර්ගයේ සේනාවන් ඔහුගේ දකුණු පැත්තෙත් වම් පැත්තෙත් හිටගෙන හිටියා.+
20 ඊටපස්සේ යෙහෝවා මෙහෙම කිව්වා. ‘කාටද පුළුවන් ආහබ්ව රවට්ටන්න? එයාව රැවැට්ටුවොත් යුද්ධ කරන්න එයා රාමොත්ගිලියද්වලට යයි. එහෙදී එයා මැරෙයි.’ ඉතින් එක දේවදූතයෙක් එක අදහසක් දුන්නා. තවත් දේවදූතයෙක් තව අදහසක් දුන්නා.
21 ඊටපස්සේ එක දේවදූතයෙක්+ යෙහෝවා ඉස්සරහට ඇවිත් මෙහෙම කිව්වා. ‘මම එයාව රවට්ටන්නම්.’ එතකොට යෙහෝවා ඇහුවා ‘ඔයා කොහොමද ඒක කරන්නේ’ කියලා.
22 ඒ දේවදූතයා මෙහෙම උත්තර දුන්නා. ‘මම ගිහින් එයාගේ අනාගතවක්තෘවරු හැමෝවම බොරු කියන්න පොලඹවන්නම්.’+ එතකොට දෙවියන් ‘යන්න, ගිහින් ඒක කරන්න. ඔයාට අනිවාර්යයෙන්ම එයාව රවට්ටන්න පුළුවන් වෙනවා’ කියලා කිව්වා.
23 ඒ නිසයි යෙහෝවා දේවදූතයෙක්ට ඉඩ දුන්නේ ඔබේ අනාගතවක්තෘවරු හැමෝවම බොරු කියන්න පොලඹවන්න.+ ඒත් ඇත්තටම යෙහෝවා තීන්දු කරලා තියෙන්නේ ඔබට විපතක් ගේන්නයි.”+
24 එතකොට කෙනානාගේ පුතා වුණ ශෙදකියා මිකායාගේ කම්මුලට ගහලා මෙහෙම ඇහුවා. “ඔයා කියන්නේ යෙහෝවාගේ බලය දැන් මගෙන් අයින් වෙලා ඔයාට උදව් කරනවා කියලද?”+
25 මිකායා මෙහෙම කිව්වා. “ඔයා හැංගෙන්න ගේ ඇතුළෙම තියෙන කාමරේට යන දවසට ඒකට උත්තරේ ලැබෙයි.”
26 එතකොට ඊශ්‍රායෙල්වල රජ මෙහෙම කිව්වා. “මිකායාව අරගෙන ගිහින් නගරේ ආණ්ඩුකාරයා වන ආමොන්ටයි, රජගේ පුතා* වන යෝවාෂ්ටයි භාර දෙන්න.
27 එයාලට කියන්න රජතුමා මෙහෙම දැන්නුවා කියලා. ‘මම කරදරයක් නැතුව ආපහු එන කල් මේ මනුස්සයාව හිරේ දාලා+ වැඩිය කන්න බොන්න දෙන්නේ නැතුව තියන්න.’”
28 ඒත් මිකායා මෙහෙම කිව්වා. “ඔබ කරදරයක් නැතුව ආපහු ආවොත් ඒ කියන්නේ යෙහෝවා මාත් එක්ක කතා කරලා නැහැ.”+ එයා මෙහෙමත් කිව්වා. “මෙතන ඉන්න හැමෝම ඒක මතක තියාගන්න.”
29 ඊටපස්සේ ඊශ්‍රායෙල්වල රජ සහ යූදාවල රජ වුණ යෙහෝෂපාට් රාමොත්ගිලියද්වලට ගියා.+
30 ඊශ්‍රායෙල්වල රජ යෙහෝෂපාට්ට මෙහෙම කිව්වා. “මං අනිත් අයට මාව අඳුරගන්න බැරි වෙන විදිහට ඇඳගෙන යුද්දෙට යන්නම්. ඒත් ඔයා රාජකීය ඇඳුම් ඇඳගෙන යන්න.” ඉතින් ඊශ්‍රායෙල්වල රජ එයාව අඳුරගන්න බැරි වෙන විදිහට ඇඳගෙන+ යුද්දෙට ගියා.
31 සිරියාවේ රජ එයාගේ අශ්ව රථ කණ්ඩායම්වලට අණ දෙන නිලධාරීන් 32දෙනාට මෙහෙම අණ කරලා තිබුණා.+ “සෙබළු එක්කවත් නිලධාරීන් එක්කවත් සටන් කරලා වැඩක් නැහැ. ඊශ්‍රායෙල්වල රජ එක්ක විතරක් සටන් කරන්න.”
32 අශ්ව රථ කණ්ඩායම්වලට අණ දෙන නිලධාරීන් යෙහෝෂපාට්ව දැක්ක ගමන්ම මෙහෙම කතා වුණා. “අර ඉන්නේ ඊශ්‍රායෙල්වල රජ වෙන්න ඕනේ.” ඉතින් එයාලා එයාට පහර දෙන්න එයා හිටපු පැත්තට ගියා. එතකොට යෙහෝෂපාට් උදව් ඉල්ලලා කෑගහන්න පටන්ගත්තා.
33 අශ්ව රථ කණ්ඩායම්වලට අණ දෙන නිලධාරීන්ට තේරුණාම එයා ඊශ්‍රායෙල්වල රජ නෙමෙයි කියලා එයා පස්සේ යන එක එයාලා අත්හැරලා දැම්මා.
34 කෙනෙක් විද්ද ඊතලයක් ඊශ්‍රායෙල්වල රජ ඇඳගෙන හිටපු යුද ඇඳුමේ තිබුණ කොරපොතු වගේ කෑලි අතරින් ගිහින් රජගේ ඇඟේ වැදුණා. ඒත් එයා ඒක විද්දේ රජට විදින්න හිතාගෙන නෙමෙයි. ඉතින් රජ එයාගේ අශ්ව රථය පදවපු කෙනාට මෙහෙම කිව්වා. “මට හොඳටම තුවාලයි. රථය හරවගෙන මාව යුද පිටියෙන්* එළියට ගෙනියන්න.”+
35 ඒත් එදා දවස පුරාම එයාලා සටන් කරපු නිසා රජට සිද්ධ වුණා එයාගේ අශ්ව රථයට වෙලා ඉන්න. රජ සේවකයන්ගේ උදව් ඇතුව සිරියානු හමුදාව දිහාවට හැරිලා රථයේ හිටගෙන හිටියා. එයාගේ තුවාලෙන් ගලපු ලේ අශ්ව රථය පුරාම ගලාගෙන ගියා. හවස් වෙද්දී එයා මැරුණා.+
36 ඉර බහින වෙලාවේදී වගේ යුද පිටිය පුරාම මේ නිවේදනය කළා. “හැමෝම තම තමන්ගේ නගරවලට යන්න. තම තමන්ගේ ගෙවල්වලට යන්න.”+
37 ඉතින් රජ මැරුණා. එයාගේ මළ සිරුර සමාරියට ගෙනල්ලා එහේ තැන්පත් කළා.
38 එයාලා සමාරියේ තිබුණ පොකුණක් ළඟ අශ්ව රථය හෝදද්දී බල්ලෝ ඇවිත් රජගේ ලේ ලෙව කෑවා. ඒ පොකුණේ ගණිකාවනුත් නනා හිටියා.* යෙහෝවා කියපු විදිහටම ඒක වුණා.+
39 ආහබ් රජගේ ජීවිතේ අනිත් සිදුවීම් ගැන ඒ කියන්නේ එයා කරපු හැම දෙයක්ම ගැනත් ඇත්දළවලින්+ එයා හදපු මාලිගාව ගැනත් එයා හදපු නගර ගැනත් ඊශ්‍රායෙල්වල රජවරුන්ගේ ඉතිහාසය වාර්තා කරලා තියෙන ලියවිල්ලේ සඳහන් වෙනවා.
40 ආහබ් මැරුණාම එයාගේ මුතුන්මිත්තන් වගේ එයාවත් තැන්පත් කළා.+ එයාගෙන් පස්සේ එයාගේ පුතා වුණ අහසියා+ රජකමට පත් වුණා.
41 ආහබ් ඊශ්‍රායෙල්වල රජකම් කරපු හතරවෙනි අවුරුද්දේ තමයි ආසාගේ පුතා වුණ යෙහෝෂපාට්+ යූදාවල රජකමට පත් වුණේ.
42 යෙහෝෂපාට් රජකමට පත් වෙද්දී එයාට වයස අවුරුදු 35යි. එයා යෙරුසලමේ ඉඳන් අවුරුදු 25ක් පාලනය කළා. එයාගේ අම්මාගේ නම අෂූබා. එයා ෂිල්හීගේ දුව.
43 යෙහෝෂපාට් එයාගේ තාත්තා වුණ ආසාගේ+ අඩිපාරේ දිගටම ගියා. එයා ඒකෙන් පිට පනින්නේ නැතුව යෙහෝවා හරියි කියලා සලකන දේවල් කළා.+ ඒත් නමස්කාරයට හදපු උස් තැන් ඒ විදිහටම තිබුණා. මිනිස්සු ඒ තැන්වලදී දුම ඉහළට නඟින විදිහට දිගටම පූජා ඔප්පු කළා.+
44 යෙහෝෂපාට් රජ දිගටම ඊශ්‍රායෙල්වල රජ එක්ක හොඳ සම්බන්ධයක් තියාගත්තා.+
45 යෙහෝෂපාට්ගේ ජීවිතේ අනිත් සිදුවීම් ගැන ඒ කියන්නේ එයාගේ යුද ජයග්‍රහණ ගැනත් එයා යුද්ධ කරපු විදිහ ගැනත් යූදාවල රජවරුන්ගේ ඉතිහාසය වාර්තා කරලා තියෙන ලියවිල්ලේ සඳහන් වෙනවා.
46 එයාගේ තාත්තා වුණ ආසාගේ කාලේ පන්නලා දාන්න බැරි වුණ+ දේවාලවල හිටපු පිරිමි ගණිකාවන්වත් එයා දේශයෙන් පන්නලා දැම්මා.+
47 ඒ කාලේ ඒදොම්වල+ රජ කෙනෙක් හිටියේ නැහැ. රජ කෙනෙක් වගේ පාලනය කළේ ප්‍රධානියෙක්.+
48 යෙහෝෂපාට් රජත් ඕෆීර්වලින් රත්තරන් ගේන්න තර්ෂිෂ් කියලා හඳුන්වපු නැව්* හැදුවා.+ ඒත් ඒ නැව්වලට එහෙට යන්න බැරි වුණා. මොකද ඒවා එෂියොන්ගෙබෙර්වලදී+ කැඩිලා බිඳිලා ගියා.
49 ඒ කාලේ තමයි* ආහබ්ගේ පුතා වුණ අහසියා “මගේ සේවකයන්ට ඔයාගේ සේවකයන් එක්ක නැව්වල යන්න පුළුවන්ද” කියලා යෙහෝෂපාට්ගෙන් ඇහුවේ. ඒත් යෙහෝෂපාට් ඒකට කැමති වුණේ නැහැ.
50 කාලයක් ගියාට පස්සේ යෙහෝෂපාට් මැරුණා. එයාවත් එයාගේ මුතුන්මිත්තන් වගේ තැන්පත් කළා.+ එයාව තැන්පත් කළේ එයාගේ මුතුන්මිත්තා වුණ දාවිත්ගේ නුවරේ. එයාගෙන් පස්සේ එයාගේ පුතා වුණ යෙහෝරම්+ රජකමට පත් වුණා.
51 යෙහෝෂපාට් යූදාවල රජකම් කරපු 17වෙනි අවුරුද්දේ තමයි ආහබ්ගේ පුතා වුණ අහසියා+ ඊශ්‍රායෙල්වල රජකමට පත් වුණේ. අහසියා අවුරුදු දෙකක් ඊශ්‍රායෙල්වල රජකම් කළා.
52 එයා දිගටම යෙහෝවා වැරදියි කියලා සලකන දේවල් කළා. එයා එයාගේ තාත්තාගෙයි,+ අම්මාගෙයි+ අඩිපාරේ ගියා විතරක් නෙමෙයි ඊශ්‍රායෙල්වරුන්ව වැරදි දේවලට පොලඹවපු නෙබාත්ගේ පුතා වුණ යෙරොබොවම්ගේ අඩිපාරෙත් ගියා.+
53 එයා දිගටම බාල් ඉස්සරහා වැඳ වැටිලා බාල්ට නමස්කාර කළා.+ එයාගේ තාත්තා කළා වගේම එයාත් දිගටම ඊශ්‍රායෙල්වරුන්ගේ දෙවි වන යෙහෝවාව කේන්ති ගැස්සුවා.+
පාදසටහන්
^ හෝ, “තල්ලු කරලා.”
^ සමහරවිට රජ පවුලේ කෙනෙක් වෙන්න පුළුවන්.
^ මූ.අ., “කඳවුරෙන්.”
^ හෝ සමහරවිට, “ගණිකාවන් නාන පොකුණේදී බල්ලෝ එයාගේ ලේ ලෙව කෑවා.”
^ “පැහැදිලි කිරීමක්” බලන්න.
^ මේ සාකච්ඡාව වෙන්න ඇත්තේ නැව් කැඩිලා බිඳිලා යන්න කලින් වෙන්න පුළුවන්.
