ප්‍රශ්න ගැටලුවලට, අභියෝගවලට මුහුණ දෙන්න වෙද්දී අපිට සාමාන්‍යයෙන් පීඩනයක් දැනෙනවා. එහෙම වෙද්දී මොළයෙන් ශරීරය පුරාම විවිධ හෝමෝන මුදාහරිනවා. ඒ නිසා හෘද ස්පන්දනය, රුධිර පීඩනය සහ හුස්ම ගැනීමේ වේගය වැඩි වෙනවා. මාංස පේශි තද වෙනවා. ඒ දේවල් වෙන්නේ පීඩනයට මුහුණ දෙන්න අපේ ශරීරය සූදානම් කරවන්නයි. දැනෙන පීඩනය නැති වුණාම ශරීරය ආයෙත් යථා තත්වයට පත් වෙනවා.

අභියෝගයකට, අනතුරුදායක තත්වයකට මුහුණ දෙන්න වෙද්දී අපිට එකපාරටම පීඩනයක් දැනෙන්නේ ඒකට හොඳින් මුහුණ දෙන්න ශරීරය අපිව සූදානම් කරවන නිසයි. ඒ වගේ වෙලාවකදී මුලින්ම ප්‍රතිචාරය දක්වන්නේ මොළය. යම් ප්‍රමාණයකට පීඩනයක් දැනෙන එකෙන් හුඟක් ප්‍රයෝජන තියෙනවා. අපි මුහුණ දෙන තත්වයට අනුව කරන්න ඕන දේ ඉක්මනින්ම කරන්නත් අපේ ඉලක්ක ජය ගන්නත් විභාගයකට, සම්මුඛ පරීක්ෂණයකට හොඳින් මුහුණ දෙන්නත් හොඳට ක්‍රීඩා කරන්නත් ඒක අපිට උදව් වෙනවා.

හැබැයි දිගු කාලයක් තිස්සේ ලොකු පීඩනයක් දැනෙනවා නම් ඒකෙන් සෑහෙන හානියක් වෙන්න පුළුවන්. ඒක ශරීරයට සහ මනසට නරක විදිහට බලපාන්න ඉඩ තියෙනවා. අනිත් අයට සලකන විදිහ ඇතුළු ඔයාගේ හැසිරීමත් වෙනස් වෙන්න පුළුවන්. සමහරු පීඩනයෙන් මිදෙන්න කියලා සිගරට්, මත්පැන්, මත්ද්‍රව්‍ය වගේ දේවලට ඇබ්බැහි වෙනවා. තවත් අය මානසික අවපීඩනයට ගොදුරු වෙනවා. කිසිම දෙයක් කරකියාගන්න බැරි තරමට හෙම්බත් වෙනවා. සිය දිවි හානි කරගන්නත් හිතනවා.

පීඩනය එක් එක් කෙනාට බලපාන විදිහ වෙනස් වුණත් ඒක රෝග ගණනාවකටම මුලපිරීමක් වෙන්න පුළුවන්. ඒක ශරීරයේ හැම අවයවයකටම වගේ බලපාන්නත් ඉඩ තියෙනවා.