මේ වෙද්දී පිළිකා රෝගීන් මිලියන 14කට වඩා වැඩි සංඛ්‍යාවක් ඉන්නවා කියලා හිතනවා. ඒත් 2035 වෙද්දී ඒ ගණන මිලියන 24 දක්වා ඉහළ යන්න පුළුවන් කියලා ලෝක සෞඛ්‍ය සංවිධානය පවසනවා. එය 70%ක වැඩි වීමක්. ඉන් අඩකටම පිළිකා හැදෙන්නේ බේබදුකම, ක්‍රියාශීලී නැති ජීවිතයක් ගත කිරීම, තරබාරුකම, විවිධ කිරණවලට නිරාවරණය වීම සහ දුම් බීම වැනි දේවල් නිසා කියා වාර්තා වෙනවා.

පිස්සු ගව රෝගය වැළඳුණු සතුන්ගේ මස් කෑමෙන් මිනිසුන්ට ඇති වන රෝගය නැවතත් හිස ඔසවා ඇති බව බ්‍රිතාන්‍ය රජයට දැනගන්න ලැබුණා. “සුව කරන්න බැරි මේ රෝගය මිනිස් සමාජයට තර්ජනයක් වෙලා තියෙනවා කියලා අපිට ලැබිලා තියෙන සාක්ෂි ගැන තවදුරටත් සොයා බලනවා. මේ රෝගය වැළඳෙන්නේ ආසාදිත රුධිරය ශරීරගත කිරීමෙන් හා අවයව බද්ධ කිරීමෙන් කියලා අපිට දැනගන්න ලැබිලා තියෙනවා” කියා බ්‍රිතාන්‍ය පාර්ලිමේන්තුවේ සාමාජිකයෙක් වන ඇන්ඩෲ මිලර් පවසනවා.

63,000දෙනෙක් යොදාගෙන අවුරුදු 11ක් පුරා කරපු සමීක්ෂණයකින් හෙළි වුණේ මානසික අවපීඩනය තියෙන අයට හෘදයාබාධ ඇති වීමේ අවදානම අනිත් අයට වඩා 40%කින් වැඩි බවයි. ඒ ගැන සමීක්ෂණය කළ කෙනෙක් කිව්වේ මානසික අවපීඩනය නිසා නිකුත් වෙන හෝමෝන හෘදයාබාධ ඇති වෙන්න විතරක් නෙමෙයි වෛද්‍ය උපදෙස් පිළිපදින්න කෙනෙක්ට තියෙන හැකියාවත් දුර්වල කරනවා කියලයි.—යුරෝපියානු හෘද රෝග සංගමය.

සිගරට් වැටියෙන් පිට වෙන දුමේ රසායනික ද්‍රව්‍ය තියෙනවා. ඒ රසායනික ද්‍රව්‍ය ගෙවල්වල, හෝටල් කාමරවල හා වාහනවල තියෙන ඕනම දෙයක රැඳෙනවා වගේම දූවිලි අංශු එක්කත් එකතු වෙනවා. කාලය ගත වෙනවාත් එක්කම ඒ රසායනික ද්‍රව්‍යවල සැර වැඩි වෙන්න පුළුවන්. ඒ නිසා ඒවායින් ශරීර සෞඛ්‍යයට ඇති වෙන්න පුළුවන් හානිය ගැන විද්‍යාඥයන් පර්යේෂණ කරනවා.