සේවයට පෙලඹී

ජීවිතයේ හොඳම කාලයේදී නන්නාඳුනන රටක මිෂනාරි සේවය භාරගැනීම සඳහා විවාහ යුවළයන් 24ක් තම පවුල්, තම මිතුරන් හා හුරු පුරුදු වටාපිටාවන් අත්හැර යෑමට පෙලඹී තිබෙන්නේ කුමක් නිසාද? පැපුවා නිව්ගිනියාව හා තායිවානය මෙන්ම අප්‍රිකානු හා ලතින්-අමෙරිකානු රටවල් වැනි ස්ථානවලටද යෑමට ඔවුන් සතුටු වන්නේ මන්ද? අරුම පුදුම දෙයක් අද්දැකීමට තිබෙන ආශාව නිසා විය හැකිද? නැත. ඇත්තෙන්ම, ඔවුන් ඒ සඳහා පෙලඹී තිබෙන්නේ දෙවිට හා අසල්වැසියාට දක්වන අව්‍යාජ ප්‍රේමය නිසාය.—මතෙව් 22:37-39.

මේ අය කවුරුන් විය හැකිද? මොවුන් නම් 109වන ගිලියද් මුරටැඹ බයිබල් පාසැලෙන් උපාධිය ලැබූ අයයි. මෙම උපාධිධාරීන්ට සාර්ථක මිෂනාරිවරුන් වීමට උපකාරවත් විය හැකි ප්‍රේමනීය උපදෙස් දෙනු ලැබීය. එම උපදෙස්වලට සවන් දීම සඳහා, 2000 සැප්තැම්බර් 9වන සෙනසුරාදා, නියූ යෝක් පැටසන්හි පිහිටුවා තිබෙන මුරටැඹ අධ්‍යාපනික මධ්‍යස්ථානයටත්, ඊට අනුබද්ධව පිහිටුවා ඇති වෙනත් ස්ථානවලටත් 5,198දෙනෙක් එක්රැස් වූහ.

වැඩසටහනේ සභාපති වූ ස්ටීවන් ලෙට්, යෙහෝවාගේ සාක්ෂිකරුවන්ගේ පාලක මණ්ඩලයේ ඉගැන්වීමේ කමිටුවේ සාමාජිකයෙකි. ඔහු සිය සමාරම්භක වචන පෙළගැස්සුවේ “නුඹලා පොළොවේ ලුණුය” යන මතෙව් 5:13හි ඇති වචන පදනම් කරගෙනය. උපාධිය ලබන ශිෂ්‍යයන්ට යේසුස්ගේ මේ වචන කදිමට ගැළපෙන බව සහෝදර ලෙට් විසින් පැහැදිලි කරන ලදි. උදාහරණයක් වශයෙන්, ආහාරපානාදිය රසගැන්වීමේ ගුණය ලුණුවල තිබේ. ඒ හා සමානව මිෂනාරිවරුන් සඵලදායී ලෙස තම දේශනා වැඩයෙහි යෙදෙනවා නම්, ඔවුහුද උපමාලංකාරයෙන් ලුණුවලට සමාන වෙති.

දිරිගන්වමින්

ඉන්පසු සහෝදර ලෙට් විසින් දිගු කලක් පුරා සිටින යෙහෝවාගේ සේවකයන් කිහිපදෙනෙකු හඳුන්වා දෙනු ලැබූ අතර, ඔවුහු ශුද්ධ ලියවිල්ල මත පදනම් වූ කෙටි මෙන්ම බලපෑමෙන් යුක්ත කතා දුන්හ. මුලින්ම කතා කරන ලද්දේ ලේඛන කමිටුවේ සේවය කරන ජෝන් විස්චක් විසින්ය. “කෙටිම ගීතාවලිය මිෂනාරි ස්ප්‍රීතුවට දිරි දෙයි” යන මැයෙන් යුත් ඔහුගේ කතාව ගීතාවලිය 117 මත පදනම් විය. අදදින, යෙහෝවා හා ඔහුගේ රාජ්‍යය සම්බන්ධයෙන් ‘ජාතීන්ට’ හා ‘වර්ගයන්ට’ ලෝක ව්‍යාප්තව සාක්ෂියක් දීමේ අවශ්‍යතාවක් පවතී. ‘යාට ප්‍රශංසා’ කරන්නයයි අන්‍යයන්ගෙන් බලවත් ලෙස ඉල්ලමින් ගීතාවලිය 117හි පවසන දේ ඉටු කරන්න කියා ශිෂ්‍යයන්ව දිරිගන්වන ලදි.

මීළඟට සභාපති විසින් පාලක මණ්ඩලයේ සාමාජිකයෙකු වන ගයි පියස්ව හඳුන්වා දෙනු ලැබීය. එවිට ඔහු “නම්‍යසුලු වන්න, නමුත් ස්ථිරව සිටින්න” යන විෂය යටතේ කතා කළේය. දෙවිගේ වචනය බලගතුය. ද්විතීය කථාව 32:4හි යෙහෝවාව හඳුන්වා තිබෙන්නේ පර්වතය යනුවෙනි. කෙසේවුවත්, ඔහුගේ වචනය සියලුම භාෂා කතා කරන කණ්ඩායම් හා සංස්කෘතීන්වලට, එනම් සියලුම ජනයාට ලියා තිබෙන බැවින් නම්‍යසුලු වීමටද ඉඩ කඩ සලසා දෙයි. ජනයාගේ හදවතේ හා හෘදය සාක්ෂියේ පෙලඹීමක් ඇති කරන අයුරින් දේවවචනය දේශනා කිරීමට ශිෂ්‍යයන්ට උපදෙස් දෙනු ලැබීය. (2 කොරින්ති 4:2) “හරි ප්‍රතිපත්තිවලට ඇලී ඉන්න. නමුත් නම්‍යසුලු වෙන්න. ඔබ සමඟ මිෂනාරි සේවයේ යෙදී සිටින වෙනත් සංස්කෘතීන්වලට අයත් අයව පහත් කොට සලකන්න එපා” යයි සහෝදර පියස් අවවාද කළේය.

ගිලියද් උපදේශකයෙකු වූ කාල් ඇඩම්ස් වසර 53කට ආසන්න  කාලයක් පුරා ලෝක මූලස්ථානයේ සේවය කරමින් සිටී. “මෙහෙන් ඔබ යන්නේ කොතැනටද?” යන සිතුවිලි කලතන තේමාව ඔස්සේ ඔහු කතා කළේය. යුවළයන් 24ටම ලොව පුරා විවිධ රටවල් 20ක මිෂනාරි පැවරුම් ලැබුණ බව සැබෑවකි. එහෙත් ඔබ එහි ගිය විට හා ඒ රට දුටු විට කරන්න යන්නේ කුමක්ද? අප ජීවත් වන්නේ නොසන්සුන් වාතාවරණයක් ඇති ලෝකයකය. රසාස්වාදයක් ලැබීමේ අටියෙන් අලුත් තැන්වලට යෑමටද, අලුත් දේවල් කිරීමටද ජනයා කැමතිය. අනික් අතට, යෙහෝවා තම “බැටළුවන්” කෙරෙහි පරාර්ථකාමී සැලකිල්ලක් දක්වමින් ශිෂ්‍යයන්ට පැවරුම ලබා දුන්නේ තමාට වුවමනා කරන තැන්වලය. ඔවුන් පුරාණ ඉශ්‍රායෙල්වරුන් මෙන් නොවිය යුතුය. මුළු මිනිස් සංහතියටම ආශීර්වාදයක් වීමට යෙහෝවා ඉශ්‍රායෙල්වරුන්ව යොදාගැනීමට සිටියත්, ඔවුන්ගේ ආත්මාර්ථකාමිත්වය නිසා ඔවුහු ඒ වරප්‍රසාදය අහිමි කරගත්හ. සැබවින්ම ඔවුන් යේසුස් ක්‍රිස්තුස්ව අනුකරණය කළ යුතුය. ඔහු පරාර්ථකාමී ලෙස සැමවිටම පියාගේ කැමැත්ත කළ අතර මොනයම් තත්වයකට මුහුණ දුන්නත්, ඒ සෑම අවස්ථාවකදීම පියාට කීකරුව සිටියේය.—යොහන් 8:29; 10:16.

ගිලියද් පාසැලේ ප්‍රධාන ලේකම් වූ වොලස් ලිවරන්ස්ගේ තේමාව වූයේ “දෙවිගේ ගැඹුරු දේවල් අගය කරන්න” යන්නය. ශුද්ධ ලියවිල්ලේ අඩංගු දේවවචනය වස්තුවලට, අගනා මැණික්වලට, වටිනා ලෝහ යනාදියට මෙන්ම ඉතා උවමනාවෙන් සොයන අනර්ඝ දේවලටද නිතරම සමාන කරයි. “දෙවිව හොඳින් දැනගැනීමට” නම් “සැඟවුණු නිධානයක්” සොයන්නාක් මෙන් අප එය සෙවිය යුතු බව හිතෝපදේශ 2:1-5 [NW] පෙන්වයි. තම අලුත් පැවරුම ඉටු කරන විට අත් නොහැර දෙවිගේ ගැඹුරු දේවල් ගැඹුරට හාරන්න කියා  කථිකයා ශිෂ්‍යයන්ව දිරිගැන්වීය. සහෝදර ලිවරන්ස් මෙසේ පැහැදිලි කළේය. “මෙය ප්‍රායෝගිකයි, මොකද එහෙම කරනවා නම් යෙහෝවා කෙරෙහි ඇදහිල්ල හා විශ්වාසය ගොඩනැංවෙන අතර ඔබේ පැවරුමෙහි දිගටම රැඳී සිටීමට ඔබ ගෙන ඇති අධිෂ්ඨානයත් තව තවත් ශක්තිමත් වෙනවා. ඒ වගේම දෙවිගේ අරමුණු අන්‍යයන්ට පවසන විට ස්ථිරත්වයකින් පවසන්නත්, වඩාත් බලපෑමෙන් යුත් ගුරුවරයෙක් වෙන්නත් එය ඔබට උපකාරවත් වෙයි.”

ගිලියද් පාසැලේ තවත් උපදේශකයෙක් ශිෂ්‍යයන්ගෙන් අදහස් විමසමින් පසුගිය මාස පහ පුරා ශිෂ්‍යයන්ගේ ක්ෂේත්‍ර සේවා ක්‍රියාකාරකම්වලට ආශීර්වාද ලැබී තිබෙන ආකාරය යළි සලකා බැලීය. ක්‍රියා 20:20හි සඳහන් ප්‍රේරිත පාවුල්ගේ වචනවල පෙන්වා ඇති පරිදි, සාක්ෂියක් දීමට පාවුල් සෑම ප්‍රස්තාවක්ම අල්ලාගනිමින් එපීසයේදී සිදු කළ ප්‍රසිද්ධ දේවසේවය සම්බන්ධයෙන් ලෝරන්ස් බොඑන් කරුණු ඉදිරිපත් කළේය. ශිෂ්‍යයන්ගේ අද්දැකීම්වලින් නිදර්ශනය වූයේ ප්‍රේරිත පාවුල් මෙන් අපේ කාලයේදීද දෙවිට හා අසල්වැසියාට ඇති ප්‍රේමය මගින් පෙලඹී ඇති අය සත්‍යය කතා කිරීමෙන් නොවැළකෙන බවය. එමෙන්ම අන්‍යයන්ගේ ජීවිත තුළ වෙනසක් ඇති කිරීම සඳහා දේවවචනය සතු බලය යොදාගැනීමෙන්ද ඔවුන් වැළකෙන්නේ නැත. මෙය යෙහෝවාගේ මහඟු ආශීර්වාද ලැබීමට දායක වී තිබේ.

පළපුරුදු අය අදහස් පළ කරති

ගිලියද් පංතියේ ඉගෙනුම ලබන අතරතුරේදී, මෙම ශිෂ්‍යයන්ට රටවල් 23කින් පැමිණි ශාඛා කමිටු සාමාජිකයන්ව ඇසුරු කිරීමට ලැබීම මහත් ප්‍රයෝජනයක් විය. ඔවුහුද විශේෂ පුහුණුව ලැබීමට පැටසන් අධ්‍යාපනික මධ්‍යස්ථානයට පැමිණ සිටියහ. සේවා අංශයේ ලිඕන් වීවර් හා ම’ටන් කැම්බල් විවිධ ශාඛා කමිටු සාමාජිකයන් සමඟ සම්මුඛ සාකච්ඡා පැවැත්වූ අතර ඔවුන්ගෙන් සමහරෙකු ගිලියද් උපාධිධාරීන්ය. මෙම අද්දැකීම් ලත් මිෂනාරිවරුන්ට සවන් දීමෙන් ශිෂ්‍යයන්ගේද, ඔවුන්ගේ පවුල්වල සාමාජිකයන්ගේද, මිත්‍රයන්ගේද විශ්වාසය තව තවත් ස්ථිර විය.

උපාධිය ලබන ශිෂ්‍යයන්ට විදේශ පැවරුම්වලට අනුව සකස් වීමට උපකාර කරනු වස් මෙවැනි අදහස් ඇතුළත් කෙරුණි. “නිශ්චිත ආකල්පයක් තියාගන්න. නුහුරු නුපුරුදු දේකට හෝ තේරුම්ගන්න බැරි දේකට මූණ දෙන්න සිද්ධ වුණොත් පසුබට වෙන්න එපා. යෙහෝවා කෙරෙහි රඳා සිටින්න,” “තියෙන දෙයින් සතුටු වෙන්න ඉගෙනගන්න. යෙහෝවා අත්‍යවශ්‍ය දේවල් සපයන බව විශ්වාස කරන්න.” ශිෂ්‍යයන්ට තම පැවරුම් ඉටු කරන විට ප්‍රීතිය පවත්වාගැනීමට උපකාර කිරීම සඳහා තවත් අදහස් දෙනු ලැබීය. ඒවායින් සමහරකි මේ. “ඔබ ආව ප්‍රදේශය එක්ක ඔබ පැවරුම ඉටු කිරීමට යන ප්‍රදේශය සසඳන්න එපා,” “දේශීය භාෂාව ඉගෙනගෙන එය නිවැරදිව උච්චාරණය කරන්න. එතකොට ඔබට හොඳින් අදහස් හුවමාරු කරන්න පුළුවන් වෙයි,” “ඔබේ පැවරුමේ දිගටම නිරතව ඉන්න ඉවහල් වෙන ජනයාගේ සිරිත් විරිත් සහ සංස්කෘතිය හදාරන්න.” මේ අදහස් නව මිෂනාරිවරුන්ට දිරිය වඩවන්නක් විය.

සම්මුඛ සාකච්ඡාවලින් පසු ඩේවිඩ් ස්ප්ලේන් ප්‍රධාන කථාව දුන්නේය. ඔහු 42වන ගිලියද් පංතියෙන් උපාධිය ලැබූ මිෂනාරිවරයෙකු වන අතර, දැන් යෙහෝවාගේ සාක්ෂිකරුවන්ගේ පාලක මණ්ඩලයේ සාමාජිකයෙකු වශයෙන් සේවය කරයි. “ශිෂ්‍යයන් වෙනවද නැත්නම් උපාධිධාරීන් වෙනවාද?” යන අවධානය ඇදගන්නාවූ තේමාව ඔස්සේ ඔහු කතා කළේය. “ඔබේ මිෂනාරි පැවරුමට ගියහම ඔබ ඔබව සලකන්න යන්නේ කවරෙක් හැටියටද? මිෂනාරි වැඩයේ සෑම දෙයක්ම දන්නා උපාධිධාරියෙක් හැටියටද එහෙමත් නැත්නම් තවත් බොහෝ දේවල් ඉගෙනගත යුතු ශිෂ්‍යයෙක් හැටියටද?” කියා ඔහු උපාධිය ලබන පංතියෙන් විමසීය. ඥානවන්ත උපාධිධාරියෙක් තමාවම සලකන්නේ ශිෂ්‍යයෙකු වශයෙන්යයි සහෝදර ස්ප්ලේන් පෙන්වා දුන්නේය. තම මිෂනාරි පැවරුමේදී හමු වන සෑම කෙනෙකුගෙන්ම තමන්ට යමක් ඉගෙනගත හැකි බව මිෂනාරිවරුන් තේරුම්ගත යුතුය. (පිලිප්පි 2:3) සෙසු මිෂනාරිවරුන් සමඟද, ශාඛා කාර්යාලය හා තමා සේවය කරන ප්‍රදේශයේ සභාව සමඟද සමීප සහයෝගීතාවකින් වැඩ කිරීමට ශිෂ්‍යයන්ව දිරිගන්වනු ලැබීය. “ඔබ ඔබේ අවසන් විභාගය සමත් වී ඇතත් තවදුරටත් ඔබ ශිෂ්‍යයෙක් බව අමතක නොකරන්න. ඔබ ඉගෙනගැනීමට කැමැත්තෙන් ඉන්න බව අන් අයට පැහැදිලි කරන්න” කියා සහෝදර ස්ප්ලේන් ඉල්ලා සිටියේය.

මෙම කතාවෙන් පසු, ශිෂ්‍යයන්ට තම උපාධිය ලැබුණු අතර, ඔවුන්ගේ පැවරුම නිවේදනය කරන ලදි. අනතුරුව පංති නියෝජිතයෙකු සම්මුතියක් කියවීමට පටන්ගැනීමත් සමඟම උපාධිය ලැබූ ශිෂ්‍යයන්ගේ හැඟීම් දනවන මොහොත උදා විය. දේවවචනය තුළින් තමන් ඉගෙනගත් දේ හේතුවෙන් පරිශුද්ධ සේවයෙහි වඩාත් පුළුල් ලෙස සහභාගි වීමට පෙලඹී සිටින මෙම උපාධිධාරීන්, එම පෙලඹීමට එකඟව ක්‍රියා කිරීමට අධිෂ්ඨානයක් ගෙන තිබුණි.

දෙවිට හා අසල්වාසීන්ට ප්‍රේමය පෙන්වනු වස් උපාධිධාරීන් ගෙන තිබෙන අධිෂ්ඨානය රැකගැනීමට, මෙම උපදෙස් මහෝපකාරි වන බවට පැමිණ සිටි සියල්ලෝම එකඟ වූහ. එමෙන්ම තම මිෂනාරි පැවරුමේදී වෙන කෙදිනකටවත් වඩා ජනයාට ආත්මිකව උපකාර කිරීම සඳහා තිර අධිෂ්ඨානයක් ගැනීමටද මෙම උපාධිධාරීන්ට එමගින් හැකි කරවීය.

[25වන පිටුවේ කොටුව]

පංති සංඛ්‍යා ලේඛන

නියෝජිත රටවල් සංඛ්‍යාව: 10

පැවරුම් ලැබූ රටවල් සංඛ්‍යාව: 20

ශිෂ්‍ය සංඛ්‍යාව: 48

වයස් සාමාන්‍යය: 33.7

සත්‍යය තුළ සිටි අවුරුදු සාමාන්‍යය: 16.2

පූර්ණ-කාලීන සේවයෙහි සිටි අවුරුදු සාමාන්‍යය: 12.5

[26වන පිටුවේ පින්තූරය]

ගිලියද් මුරටැඹ බයිබල් පාසැලේ උපාධි ලැබූ 109වන පංතිය

පහත සඳහන් ලැයිස්තුව අංකනය කර තිබෙන්නේ ඉදිරි පේළියේ සිට පසුපස පේළිය දක්වාය. සෑම පේළියකම නම් වමේ සිට දකුණට ලැයිස්තුගත කර ඇත.

(1) කොලින්ස්, ඊ.; මයිල්ස්, එල්.; අල්වාරාඩො, ඒ.; ලේක්, ජේ. (2) වැන් ඩූසන්, එල්.; බිහාරි, ඒ.; හෙයිකිනන්, එච්.; කෝස්, එස්.; ස්මිත්, එච්. (3) ඇෂ්ෆ’ඩ්, ජේ.; ඇෂ්ෆ’ඩ්, සී.; බෝර්, සී.; රිචඩ්, එල්.; විල්බ’න්, ඩී.; ලේක්, ජේ. (4) චිචී, කේ.; චිචී, එච්.; රේමිරෙස්, එම්.; බෝමාන්, ඩී.; බෙක, ජී.; බිහාරි, එස්.; රේමිරෙස්, ඒ. (5) වැන් ඩූසන්, ඩබ්.; ලමාට්‍ර, එච්.; පිස්කෝ, ජේ.; කට්ස්, එල්.; රසල්, එච්.; ජොන්සන්, ආර්. (6) බෙක, එෆ්.; බෝමාන්, ඩී.; ජොන්සන්, කේ.; පිෆ, ඒ.; මෑසන්, සී.; ලමාට්‍ර, ජේ.; හෙයිකිනන්, පී. (7) ස්මිත්, ආර්.; රසල්, ජේ.; කොලින්ස්, ඒ.; පිස්කෝ, ඩී.; විල්බ’න්, ආර්.; කෝස්, ජී. (8) කට්ස්, බී.; බෝර්, ජේ.; මෑසන්, එන්.; පිෆ, එස්.; රිචඩ්, ඊ.; මයිල්ස්, බී.; අල්වාරාඩො, ආර්.