සාගින්නෙන් පෙළෙන්නන්ට සහනාධාර!

‘සාගින්නක්? කුමනාකාරයේ සාගින්නක්ද?’ කියා ඔබ ඇසිය හැකියි. එය ආත්මික ආහාර සඳහා වූ සාගින්නක්! පුරාණයේ විසූ අනාගතවක්තෘ කෙනෙක් මෙම සාගතය ගැන මෙසේ පුරෝකථනය කළා. “‘බලව! මම දේශය පුරාම සාගතයක් එවන කාලය ළංව තිබේ. ඒ සාගින්න කෑම සඳහාවත්, පිපාසය වතුර සඳහාවත් නොවේ. එය යෙහෝවාගේ වචන ඇසීම සඳහාය’ කියා පරමාධිපති ස්වාමි වූ යෙහෝවා කියන්නේය.” (ආමොස් 8:11, NW) ආත්මික සාගින්නෙන් පෙළෙන්නන්ට සහනයක් ලබා දීම සඳහා නිව් යෝක් පැටසන්හි ගිලියද් මුරටැඹ බයිබල් පාසැලේ 112වන පංතියේ සාමාජිකයන් 48දෙනා මහාද්වීප හා දූපත් 5ක පිහිටි රටවල් 19කට පැවරුම් ලබා තිබෙනවා.

ඔවුන් තම පැවරුම් කරා ගමන් කරන්නේ මස් මාංස හා ධාන්‍ය වර්ග රැගෙන නෙවෙයි, තමන් සතු දැනුම, අද්දැකීම් හා පුහුණුව රැගෙනයි. විදේශ රටවල මිෂනාරි සේවයේ යෙදීම සඳහා ඔවුන්ගේ ඇදහිල්ල සවිමත් කරගැනීමට ඔවුන් මාස පහක් පුරා ඉතා ගැඹුරින් බයිබලය අධ්‍යයනය කර තිබෙනවා. වර්ෂ 2002, මාර්තු 9වනදා ඔවුන් උපාධි ලැබූ විශේෂ අවස්ථාවට සහභාගි වූ 5,554දෙනා එම වැඩසටහනට සවන් දුන්නේ ඉතා ප්‍රීතියෙන්.

යෙහෝවාගේ සාක්ෂිකරුවන්ගේ පාලක මණ්ඩලයේ සාමාජිකයෙක් වන ස්ටීවන් ලෙට්, උද්‍යෝගිමත් ලෙස වැඩසටහන ආරම්භ කළා. ලෝකයේ විවිධ රටවලින් පැමිණි අමුත්තන්ව සාදරයෙන් පිළිගත් පසු ඔහු මිෂනාරිවරුන් තම පැවරුම්වලට ගොස් කරන සේවයට “ලෝකයේ ආලෝකය ඔබයි” යන යේසුස්ගේ වදන් අදාළ කළා. (මතෙව් 5:14, NW) ‘ඔබේ පැවරුම් ඉටු කරද්දී යෙහෝවාගේ පුදුම ක්‍රියා රැසක් “ආලෝකවත් කිරීමටත්” යෙහෝවාගේ සහ ඔහුගේ අරමුණුවල අලංකාරය දැකගැනීමට අවංක සිතැති ජනයාට උපකාර කිරීමටත් ඔබට ප්‍රස්තාව උදා වෙයි’ කියා ඔහු පැහැදිලි කළා. බොරු ඉගැන්වීම්වල අන්ධකාරය හෙළි කිරීමට හා සත්‍යය සොයන්නන්ට මඟ පෙන්වීමට දේවවචනයේ ආලෝකය භාවිත කරන්න කියා සහෝදර ලෙට් මිෂනාරිවරුන්ට දිරිගැන්වූවා.

සාර්ථකත්වයට අත්‍යවශ්‍ය වන නිසි ආකල්පය

සභාපතිගේ ප්‍රාරම්භක කතාව අවසන් වූ පසු එක්සත් ජනපදයේ ශාඛා කමිටුවේ සාමාජිකයෙක් වන බල්තසා පර්ලා කතාවක් ඉදිරිපත් කළා. එය උපාධිලාභීන්ට මිෂනාරි සේවය සාර්ථකව කරගැනීමට මඟ පෙන්වන උපදෙස්වලින් සමන්විත කතා මාලාවක මුල්ම කතාවයි. ඔහුගේ කතාව ගොඩනැඟුණේ “ධෛර්ය සම්පන්නව හා ශක්තිමත්ව සිට ක්‍රියා කරන්න” යන තේමාව මතයි. (1 ලේකම් 28:20, NW) පුරාණ ඉශ්‍රායෙලයේ සිටි සාලමොන් රජට අභියෝගාත්මක පැවරුමක් ලැබුණා. ඒ යෙරුසලමේ දේවමාළිගාවක් ගොඩනැඟීමටයි. පෙර කවරදාකවත් ඔහු එවන් පැවරුමකට අත ගසා තිබුණේ නැහැ. එහෙත් සාලමොන් එම පැවරුම ඉටු කිරීමට ක්‍රියාත්මක වුණා. යෙහෝවාගේ උපකාරය ඇතුව දේවමාළිගාව ඉදි කිරීමට ඔහු සමත් වුණා. එයින් පංතියට උගත හැකි පාඩම පැහැදිලි කරමින් සහෝදර පර්ලා මෙසේ පැවසුවා. ‘ඔබ සියලුදෙනාටම මිෂනාරිවරුන් වශයෙන් අලුත් පැවරුම් ලැබී තිබෙනවා. ඒ නිසා ඔබ ධෛර්ය සම්පන්නව හා ශක්තිමත්ව සිටිය යුතුයි.’ යෙහෝවාට ළංව සිටින තාක් කල් ඔහු කෙදිනකවත් තමන්ව අත් හරින්නේ නැහැයි යන සහතිකය මගින් ශිෂ්‍යයන් සැනසිල්ලක් ලැබූ බව නිසැකයි. සභාවේ සියලුදෙනාගේම හෘදයට ළඟා වෙමින් සහෝදර පර්ලා තම පෞද්ගලික අද්දැකීම මෙසේ විස්තර කළා. ‘මිෂනාරිවරුන් හැටියට ඔබට බොහෝ යහපත් දේවල් කරන්න පුළුවන්. මටත් මගේ පවුලේ අයටත් සත්‍ය ලැබුණේ මිෂනාරිවරුන්ගෙන්!’

 “සාර්ථකත්වය සඳහා යෙහෝවා දෙස බලන්න” යන තේමාවෙන් යුත් කතාව දුන්නේ පාලක මණ්ඩලයේ සාමාජිකයෙක් වන සැමුවෙල් හර්ඩ්. තම ජීවිත කාලය පුරාම මිෂනාරි සේවයේ යෙදීමට අදහස් කරන මෙම ශිෂ්‍යයන්ගේ සාර්ථකත්වය රඳා පවතින්නේ යෙහෝවා සමඟ ඔවුන් පවත්වන සබඳතාව මතයි. සහෝදර හර්ඩ් ඔවුන්ට මෙම අවවාදය දුන්නා. ‘ඔබ ගිලියද්හි කර තිබෙන අධ්‍යයනය තුළින් බොහෝ දැනුම රැස් කරගෙන තිබෙනවා වගේම ඔබ එය ලබාගත්තේ ඉතා ප්‍රීතියෙන්. නමුත් සැබෑ සාර්ථකත්වය අත් කරගන්න නම් ඔබ එම දැනුම අන්‍යයන්ට බෙදා දිය යුතුයි.’ (ක්‍රියා 20:35) මිෂනාරිවරුන් අන්‍යයන් වෙනුවෙන් ‘තමන්වම පූජා කරන’ විට ඉගෙනගත් දේ බෙදා දීමට බොහෝ ප්‍රස්තා උදා වන බව නම් නිසැකයි.—පිලිප්පි 2:17.

පාසැලේ උපදේශකයන් ශිෂ්‍යයන්ට දෙන අන්තිම උපදෙස් මොනවාද? මාර්ක් නූම්‍යො ඔහුගේ කතාවේ තේමාව ලෙස තෝරාගත්තේ රූත් 3:18හි [නව අනුවාදය] සඳහන් මෙම වදන්. “ඊළඟට සිදු වන දේ දැනගන්න තෙක් ඉවසා සිටින්න.” නායොමි සහ රූත්ගේ ආදර්ශය ගෙනහැර දක්වමින් දෙවිගේ භූමික සංවිධානයේ සැලසුම් කෙරෙහි පූර්ණ නිසැකකමක් ඇතුව සිටීමටත් දිව්‍යාණ්ඩු අධිකාරයට ගරු කිරීමටත් කථිකයා උපාධිලාභීන්ට දිරිගැන්වූවා. ශිෂ්‍යයන්ගේ හදවත්වලට ළඟා වන ආකාරයකින් සහෝදර නූම්‍යො මෙසේ පැවසුවා. ‘සමහර අවස්ථාවලදී ඔබට යම් ආකාරයකින් බලපාන තීරණයක් ගෙන තිබෙන්නේ ඇයි කියා තේරුම්ගන්න අමාරු විය හැකියි. එහෙමත් නැත්නම් යම් දෙයක් කරන විදිහ වෙනස් කළ යුතුයි යන බලගතු හැඟීම ඔබ තුළ මතු වෙන්න පුළුවන්. එහෙම වුණොත්  ඔබ කරන්නේ මොනවද? ඔබ හදිසි වී කාරණා ඔබේ අතට ගන්නවාද? එහෙමත් නැත්නම් ඔබ “ඉවසා සිට” දෙවි නියම කලට යහපත් ප්‍රතිඵල අත් කර දෙයි යන පූර්ණ නිසැකකම ඇතුව ඔහුගේ මඟ පෙන්වීම කෙරෙහි විශ්වාසය තබනවාද?’ (රෝම 8:28) ‘පෞද්ගලිකත්වයන් කෙරෙහි අවධානය යොමු නොකර රාජ්‍ය කටයුතු දියුණු කිරීම කෙරෙහිත් යෙහෝවාගේ සංවිධානය කරන්නේ කුමක්ද යන්න කෙරෙහිත් අවධානය යොමු කරන්න’ යන උපදේශය විදේශ රටවල සේවය කිරීමට යන මෙම මිෂනාරිවරුන්ට මහෝපකාරි වන බව නිසැකයි.

කලින් මිෂනාරිවරයෙක් ලෙස සේවය කළ ගිලියද් උපදේශකයෙක් වන වොලස් ලිවරන්ස් කතා මාලාවේ අවසන් කතාව ඉදිරිපත් කළා. “ආත්මික කාරණා කෙරෙහි ඇස් නාභිගත කර තබාගනිමින් දෙවිගේ සේවයේ රැඳී සිටින්න” යන තේමාව මතයි ඔහු කතා කළේ. බබිලෝනියේ වැටීම දැකීම තුළින් හා යෙරෙමියාගේ අනාවැකිය තුළින් ඉශ්‍රායෙලිතයන්ගේ මිදීම ළංව තිබූ බව අනාගතවක්තෘ දානියෙල් අවබෝධ කරගෙන සිටි බව කථිකයා පෙන්වා දුන්නා. (යෙරෙමියා 25:11; දානියෙල් 9:2) යෙහෝවාගේ කාලසටහන පිළිබඳව හොඳ අවධානයකින් සිටි නිසා දෙවිගේ අරමුණ ඉටු වන ආකාරය කෙරෙහි ඔහුගේ ආත්මික ඇස් නාභිගත කර තැබීමට දානියෙල්ට පුළුවන් වුණා. අනාගතවක්තෘ හග්ගයිගේ කාලයේ සිටි ඉශ්‍රායෙලිතයන් නම් ක්‍රියා කළේ මීට හාත්පසින්ම වෙනස් ආකාරයකටයි. ඔවුන් පවසා සිටියේ “නිසි කාලය පැමිණුණේ නැත” කියායි. (හග්ගයි 1:2) ඔවුන් ජීවත්ව සිටි කාලය පිළිබඳව ඔවුන්ගේ දෘෂ්ටිය බොඳ වී ගොස් තිබුණා. ඔවුන් තම අවධානය යොමු කරමින් සිටියේ තමන්ගේ පෞද්ගලික කාරණා සහ සැප පහසුව කෙරෙහියි. ඔවුන්ව බබිලෝනියෙන් නිදහස් කර තිබුණේ දේවමාළිගාව නැවත ඉදි කිරීමට වුණත් එම වැඩය ඔවුන් අත්හැර තිබුණා. සහෝදර ලිවරන්ස් මෙසේ කියමින් තම කතාව අවසන් කළා. “නිතරම යෙහෝවාගේ අරමුණ මනසේ තබාගනිමින් ආත්මික කාරණා කෙරෙහි ඇස් නාභිගත කර තබාගන්න.”

“ජීවමාන වචනය භාවිත කරන අයට යෙහෝවාගෙන් ලැබෙන ආශීර්වාද” යන තේමාවෙන් යුත් කොටස මෙහෙයවනු ලැබුවේ ගිලියද් උපදේශක ලෝරන්ස් බොවන් විසිනුයි. (හෙබ්‍රෙව් 4:12) මෙම කොටස තුළ පංතියේ අද්දැකීම් සාකච්ඡා කරමින් දේශනා සේවයේදී හා ඉගැන්වීමේදී බයිබලය භාවිතා කිරීමෙන් යෙහෝවා දෙන ආශීර්වාද හුවා දැක්වුවා. යේසුස් ක්‍රිස්තුස් සෑම දේවසේවකයෙකුටම කදිම ආදර්ශයක් සැපයූ බව සහෝදර බොවන් කාවැද්දුවා. ‘තමා ඉගැන්වූයේ තමා විසින් උපදවා ගත් දෙයක් නෙවෙයි, දෙවිගේ වචනයයි කියා යේසුස්ට කිසිම පැකිලීමකින් තොරව කියන්න පුළුවන් වුණා.’ එවිට අවංක සිතැති අය සත්‍යය හඳුනාගෙන ශුභවාදී ආකාරයකින් එයට ප්‍රතිචාර දැක්වුවා. (යොහන් 7:16, 17) අදත් එම දේම සිදු වෙනවා.

සෑම යහපත් ක්‍රියාවකටම සූදානම් කරවන ගිලියද් පුහුණුව

ඊළඟට, දිගු කාලයක සිට බෙතෙල්හි සේවය කරන රිචඩ් ඒබ්‍රහැම්සන් සහ පැට්‍රික් ලාෆ්‍රැන්කා විශේෂ පූර්ණ කාලීන සේවයේ යම් යම් අංගවල යෙදෙන ගිලියද් උපාධිලාභීන් 6දෙනෙකුව සම්මුඛ සාකච්ඡාවකට කැඳෙව්වා. මෙම 6දෙනා ගිලියද් පාසැලෙන් සමත් වී දැන් අවුරුදු ගණනාවක් ගත වී තිබෙන අතර ඔවුන් දැන් විවිධ පැවරුම්වල නිරත වී සිටිනවා. එහෙත් බයිබලය අධ්‍යයනය කිරීම, විවිධ විෂයන් ගැන ගවේෂණය කිරීම මෙන්ම මිනිසුන් සමඟ පෑහී කටයුතු කිරීම සම්බන්ධයෙන් ගිලියද් පාසැලෙන් ලැබුණු පුහුණුවෙන් ඔවුන් තවමත් ප්‍රයෝජන ගන්නවා කියා දැනගැනීමෙන් 112වන පංතියේ උපාධිලාභීන් දිරිගැන්වීමක් ලැබුවා.

වැඩසටහනේ ප්‍රධාන කතාව දුන්නේ පාලක මණ්ඩලයේ සාමාජිකයෙක් වන තියඩෝ ජැරැස්. එහි තේමාව වූයේ “සාතන්ගේ වෛරයට පාත්‍ර වන විට විඳදරාගැනීමෙන් අත් කරගත හැකි ප්‍රතිඵල” යන්නයි. පසුගිය මාස පහ තුළ ශිෂ්‍යයන් සිටියේ ප්‍රේමනීය, දිව්‍යාණ්ඩු පරිසරයක් තුළයි. එහෙත් පංති කාමරය තුළ ඉගෙනගත් ආකාරයට අපි ජීවත් වන්නේ අපට සතුරුකම් පාන ලෝකයක් තුළයි. ලෝකයේ ඕනෑම තැනක සිටින යෙහෝවාගේ සෙනඟ වෙත සතුරු ප්‍රහාර එල්ල වෙනවා. (මතෙව් 24:9) බයිබල් වාර්තා කිහිපයක් උපයෝගී කරගනිමින් සහෝදර ජැරැස් මෙසේ පැහැදිලි කළා. ‘අපි යක්ෂයාගේ විශේෂ ඉලක්කයක් වී තිබෙනවා. අපි යෙහෝවා සමඟ ඇති අපේ සම්බන්ධය සවිමත් කරගෙන පරීක්ෂාවලට මුහුණ දීමට අවශ්‍ය ශක්තිය ලබාගත යුතුයි.’ (යෝබ් 1:8; දානියෙල් 6:4; යොහන් 15:20; එළිදරව් 12: 12, 16ආ) යෙහෝවාගේ සෙනඟ දිගින් දිගටම වෛරයට පාත්‍ර වුණත් ‘යෙසායා 54:17හි පෙන්වන පරිදි අපට විරුද්ධව සාදන කිසිම ආයුධයක් සඵල වන්නේ නැහැ. යෙහෝවා තම නියමිත කාලයේදී තමා විසින් සුදුසුයයි සිතන ක්‍රමයකට අපට ගැලවීම දෙයි’ කියා පවසමින් සහෝදර ජැරැස් තම කතාව අවසන් කළා.

‘පූර්ණ සූදානමකින්’ සිටින 112වන පංතියේ ගිලියද් උපාධිලාභීන් තමන් සේවය කරන රටවල ආත්මික සාගින්නෙන් පෙළෙන ජනයාට සහනයක් ලබා දීමට උපරිම වෑයමක් දරන බව නිසැකයි. (2 තිමෝති 3:16, NW) ඔවුන් මෙම රටවලදී ආත්මික පෝෂණ ගුණයෙන් සපිරි පණිවිඩය බෙදාහරින ආකාරය පිළිබඳව වාර්තා ලැබෙන තෙක් අපි උනන්දුවෙන් බලා සිටින්නෙමු.

[23වන පිටුවේ කොටුව]

පංතියේ දත්ත

නියෝජිත රටවල් සංඛ්‍යාව: 6

පැවරුම් ලැබූ රටවල් සංඛ්‍යාව: 19

ශිෂ්‍ය සංඛ්‍යාව: 48

වයස් සාමාන්‍යය: 33.2

සත්‍ය තුළ සිටි අවුරුදු ගණනේ සාමාන්‍යය: 15.7

පූර්ණ කාලීන් සේවය කර ඇති අවුරුදු ගණනේ සාමාන්‍යය: 12.2

[24වන පිටුවේ පින්තූරය]

ගිලියද් මුරටැඹ බයිබල් පාසැලේ උපාධි ලැබූ 112වන පංතිය

පහත සඳහන් ලැයිස්තුවේ පේළි, ඉදිරියේ සිට පසුපසට අංකනය කර ඇති අතර, එක් එක් පේළියේ වමේ සිට දකුණට නම් ලැයිස්තුගත කර තිබේ.

(1) පාරෝට්, එම්.; හුකර්, ඊ.; ආනායා, ආර්.; රෙනල්ඩ්ස්, ජේ.; ජෙස්වාල්ඩී, කේ.; ගොන්සාලේස්, ජේ. (2) රොබින්සන්, සී.; ෆිලිප්ස්, බී.; මේඩ්මන්ට්, කේ.; මෝ, අයි.; නෝක්ස්, ජේ.; බානට්, එස්. (3) ස්ටයර්ස්, ටී.; පාමර්, බී.; යැං, සී.; ගෲතුයිස්, එස්.; ග්‍රොප්, ටී.; බාක්, සී. (4) ආනායා, ආර්.; සුකොරෙෆ්, ඊ.; ස්ටුවර්ට්, කේ.; සිමොස්රැග්, එන්.; සිමොටෙල්, සී.; බාක්, ඊ. (5) ස්ටුවර්ට්, ආර්.; යැං, එච්.; ගිල්ෆෙදර්, ඒ.; හැරිස්, ආර්.; බානට්, ඩී.; පාරෝට්, එස්. (6) මේඩ්මන්ට්, ඒ.; මෝ, ජේ.; ගෲතුයිස්, සී.; ගිල්ෆෙදර්, සී.; නෝක්ස්, එස්.; ස්ටයර්ස්, ටී. (7) ජෙස්වාල්ඩී, ඩී.; ග්‍රොප්, ටී.; සුකොරෙෆ්, බී.; පාමර්, ජී.; ෆිලිප්ස්, එන්.; සිමොටෙල්, ජේ. (8) හැරිස්, එස්.; හුකර්, පී.; ගොන්සාලේස්, ජේ.; සිමොස්රැග්, ඩී.; රෙනල්ඩ්ස්, ඩී.; රොබින්සන්, එම්.