Alamete aana 2023nni ikkinori, heeꞌnoommohu Qullaawu Maxaafi “goofimarchu barra” yaanno yanna giddo ikkinota xawise leellishanno. (2 Ximootewoosi 3:1) Alamete aana ikkanni noori, Qullaawu Maxaafi giddo yannankera ikkanno yine himannoonni coyibba ledo mitto ikkino gara wodanchate woꞌnaali.

Qullaawa Maxaafanna alamete ikkito

 “Olu luulonna olu duduwo.”—Maatewoosi 24:6.

•   “Alamete aana duucha bayicho waajjishanno oli lexxanni no.” a

 “Addi addi darga baatto huxidhanno.”—Maarqoosi 13:8.

•   “2023 hanafihunni kayise, alamete aana bikkaasinchunni 7 ale ikkitannoti 13 baattote huxano ikkitino; baattote huxano jilba bikka hananfi kawa ikkitinote jajjabba huxano giddo mitte tenneeti.” b

 “Mannu waajjishannore laꞌꞌanno.”—Luqaasi 21:11.

•   “Xa alamete aana iibbillu ‘ayyarete iibbille’ yinanniwiinni sae ‘ayyarete ruqano’ yinanni deerra iillino.”—Antooniyo Gutireezi, Buusantino Mangistubba Dirijjitera qara borreessaancho. c

 “Hude ubbanno.”—Maatewoosi 24:7.

•   “2023, maatensa towaaxxate shelleggantannorira wole quuxxote diro ikke saino.” d

 “Qarrissanno yanna.”—2 Ximootewoosi 3:1.

•   “Alamete doyichora, settu manni giddo mittu surrete xisso afiꞌrinoho.” e

Albankeenni noohu 2024 hiittoo diro ikkakka?

 Hige 2024nni ikkannore afoommo yaa dandaanno manchi dino. Ikkollana, alamete aana ikkanni noori, muli yannara Maganunnihu gordu Gashshooti uullate gashshoote bukonna buluulo asse qarrahonna yaaddote kaima ikkinore baalankare hunannota leellishanno.—Daanieeli 2:44; Yohaannisi Ajuuja 21:4.

 Hakka geeshsha kayinni, yaandeemmo woyite, kaaꞌlannonke gede Magano addaxxa dandiineemmo. Qullaawu Maxaafi togo yaanno:

 “Waajjillu amadannoe yannara, ate addaxxeemmo.”—Faarso 56:3.

 Magano addaxxineemmota leellisha dandiineemmohu hiittoonniiti? Qullaawu Maxaafi albillitte qarru nookki yanna dagganno yee kulanno hexxo daafira ledde rosatto gede koyinsoommohe. Qullaawu Maxaafi kulanno hexxo aterano maatekkirano kaaꞌlitanno gara afate, Qullaawu Maxaafi xiinxallonke woxe baaxxittokki woꞌnaalte lai.