Onkoleessa 23, 2023ni Ameerikunnihu mittu fayyimmate agarooshshi sooreessi dagoomittete miidiyi (webisayite) batinye wedelloota gawajjanni noota kule dagooma qorowisiisino.

•   “Dagoomittete miidiyi qaaqquullehonna aja oosora mitore kaaꞌlara dandaanno; ikkirono surrete fayyimmansanna keerensa gawajjanni noota leellishshanno taje laꞌnanni heeꞌnoommo.”—Dagoomittete Miidiyanna Wedellootunnita Surrete Fayyimma: Ameerikunnihu Dagoomu Fayyimma Sooreessi Amaale 2023.

 Sooreessu kuni yaachishanno coye ikkinota leellishshannota xiinxallote taje shiqishino.

•   Mitu 12 dirinni kayise 15 diri geeshsha ikkannonsa wedellooti giddo “barru barrunku dagoomittete miidiya horoonsidhanni 3 saate saꞌe keeshshitanno wedellootira surrete xissonni lawishshaho, quwa saꞌino yaaddonni amadamate kaayyonsa ero ikkitanno.”

•   Tonaa shoole diro ikkinonsari aana assinoonni xiinxallo garinni, “dagoomittete miidiya horoonsiꞌra batissanno [wedellooti] goxicho hoogganno, interneetete widoonni siantanno, danansa giwisannonsa, insaneeto woffi assitanno, hattono yaadaameeyye ikkitanno; tini malaatta labballunkunni roore seennu aana leeltannota huwantoonni.”

 Annuwunna amuuwu oosonsa togoo gawajjonni agara dandiitannohu ma garinniiti? Qullaawu Maxaafi tennera kaaꞌlitannota dancha amaale aanno.

 Ille wortine laꞌe. Annanna ama ikkitinoonni daafira, dagoomittete miidiya horoonsiꞌra qaaqqoꞌne gawajjitara dandiitanno gara seekkitine hedde; hakkiinni qaaqqiꞌne horoonsiꞌriro woyyannoronna teꞌee murre.

•   Qullaawu Maxaafi biddishsha: “Oosote heedhanno gara [rosiissensa].”—Lawishsha 22:6.

•   Ledde afate, “Qaaqqiꞌya Dagoomittete Miidiya Horoonsiꞌra Hasiissannosi?” yaanno birxicho nabbawi.

 Qaaqqiꞌne dagoomittete miidiya horoonsiꞌrara fajjitinanniha ikkiro, iillitasira dandiitanno gawajjo ille wortine laꞌe; qoleno qaaqqu interneetete aana assannore illachishshe. Hiittoonni?

 Qaaqqoꞌne bushu coyinni agarre. Qaaqqiꞌne interneetete aana tuncu yaasira dandaannoha busha coye bade afe qorophanno gede qajeelsesi.

•   Qullaawu Maxaafi biddishsha: “Foorre woy saalimale ikkito woy busha yortoha ikka agurina, mereeroꞌne togoohu duduwu nafa horonta heeꞌroonke. . . . Saalu coyi woy balallete hasaawi woy afimala haariimo heedhoonke.”—Efesooni Sokka 5:3, 4.

•   Tennera kaaꞌlitanno amaale afiꞌrate, “Wedellu Oosoꞌne Dagoomittete Miidiya Qorophite Horoonsidhanno Gede Qajeelsa” yaanno birxicho nabbawi.

 Danna worre. Lawishshaho qaaqqiꞌne dagoomittete miidiya mamootenna mageeshshi yanna horoonsiꞌra dandaannoro wodho fushshe.

•   Qullaawu Maxaafi biddishsha: “Hiitto ikkitine heeꞌra hasiissannoꞌnero seekkitine affe. . . . Afidhinoonni yanna baalate giddo dancha looso loosse.”—Efesooni Sokka 5:15, 16.

•   Qaaqqiꞌne fushshitinoonni wodho kaaꞌlitannosi gara huwatanno gede kaaꞌlate, Dagoomittete Webisayite Horoonsiꞌratto Woyite Xiinxalla Ikki yitannota waajju saleedi viidiyo lai.