Yesuusi “Calla adhitinoonnire calla uuyye” yee rosiisino. (Mt 10:8) Qullaawa Maxaafa woy Qullaawu Maxaafi aana xintantino borro mulla uyine tenne hajajo wonshineemmo. (2Qo 2:17) Ikkirono tini borro Maganu Qaali giddo nooha muxxe halaale amaddinote. Borro attamanna alamete doyichora noo songuwara iillisha dishaaꞌꞌa loosooti; qoleno lowo woxi fulanno. Konni daafira ikkitannonke geeshshi borro calla adha hasiissannonke.

Mannaho borro uyineemmo wote, wole agurina gudumaaleho farciꞌneemmo wote nafa wodanchineemmore ikka hasiisannonke. (Mt 7:6) Sammi yine saꞌꞌaahu higaahura borro aantenni hasatto noonsaronna teꞌee afate hasaawisa hasiissannonke. Saaxinete giddo noo xaꞌmuwa giddonni ajayi ajeenna mittete “ee” yite dawaro qola dandaatto? Mittu manchira hasatto noosironna teꞌee afa hoogittoro tiraakte aa woyyitanno. Metseete woy wole borro xaꞌmiꞌriro kayinni mitte aa dandiineemmo.—La 3:27, 28.