Yihowa Baxatto Rodoo:

Yesuusi, “Halaale affinanni, halaaluno borojjimmatenni fushshannoˈne” yiino. (Yohaannisi 8:32) Tenne xiqisera noo qaalla lowonta sheshifachchishshannote! Ee, kuni qarrisannohu ‘gedensiidi barri’ kaphphu batiˈrinoha ikkirono, halaale afa dandiinanni. (2 Ximootewosi 3:1) Maganu Qaali giddo noo halaale umo huwatitto yanna qulli yitannohe? Hatte yannara lowonta tashshi yiinoheti mittoreno dihuluullissanno!

Ikkollana, halaalunnita gara ikkitino egenno afiˈranna halaale wolu mannira kula lowonta hasiissannonte gede, amanynyootinke halaalu ledo sumuu yaanno gede assiˈrano hattonni hasiissannote. Hatto assiˈrate, Maganu baxillinni fullummokki heeˈra hasiissannonke. Maganu baxillinni fullummokki heeˈrate ma assa hasiissannonke? Yesuusi reyara albaanni noo hashsha coyiˈrino qaali tenne xaˈmora dawaro ikkanno. Isi ammanantino hawaariyaatesi togo yiino: ‘Ani Anniˈya hajajo wonshe isi baxillinni heeˈreemmonte gede, kiˈneno ane hajajo wonshitiniro, baxilliˈyanni heedhinanni.’—Yohaannisi 15:10.

Yesuusi Maganu baxillinni fulikki heeˈra dandiinohu Annisi hajajo wonshinohura ikkinota wodanchi. Ninkeno assa hasiissannonkehu hattooti. Maganu baxillinni fullummokki heeˈrate, macciishshinoommo halaali ledo sumuu yaanno garinni heeˈra hasiissannonke. Yesuusi aleenni yini hashsha togono yiino: “Konne coye affinironna loosu aana hosiissiniro maassantinoonnireeti.”—Yohaannisi 13:17.

Kuni maxaafi, heeshshokki giddo halaale loosu aana hosiisatto gede, hattono ‘hegere heeshsho agadhitanni Maganu baxillinni fulittokki heeˈratto’ gede kaaˈlannohe gede lowonta halchineemmo.—Yihuda 21, NW.