1, 2. Roore yanna xaˈmo xaˈma mayi horo afidhino?

QAAQQUULLU xaˈmo xaˈmanno gara wodanchite egennootto? Batinynyu qaaqquulli afoo dadhanni heeˈrenni xaˈmo xaˈma hanafanno. Afate lowo geeshsha quqquxamanno daafira albakki laˈˈanni togo yee xaˈmannohe: Gordu qasiˈrinohu hiikkooti? Beeddahe soodiro hiikka higganno? Cea buuwa dandiitinohu hiitto ikkiteeti? Togoo xaˈmora dawaro qolate dandiitto geeshsha woˈnaalattora dandaatto; ikkeennano mito mito wote hatto assa kabbaaddahera dandiitanno. Woyyitanno yite mitte dawaro qolittoro nafa, qaaqquullu Mayira? yite wole xaˈmo xaˈmitahera dandiitanno.

² Xaˈmo xaˈmitannori qaaqquulle calla diˈˈikkitino. Lophphinummo gedensaannino xaˈmo xaˈma diagurreemmo. Xaˈmo xaˈmineemmohu haˈneemmo raga afate, fafa hasiissannonkeha gawajjanno coye bade afate, woyi afate noonke halcho fulateeti. Ikkollana batinynyu manni lowo geeshsha hasiissanno xaˈmo xaˈma agurinoha lawanno; xaˈmiro nafa dawaro afiˈrate diwoˈnaalanno.

3. Batinynyu manni lowo geeshsha hasiissanno xaˈmora dawaro afiˈrate sharro assa agurinohu mayiraati?

 ³ Hanni konni maxaafira iimiidi qoolira noo xaˈmo, bitimaho xaˈminoonnita addi addi xaˈmo woyi  tenne fooliishshora woroonni noo xaˈmo assaawi. Xaˈmattora dandaattote lowo geeshsha hasiissanno xaˈmo giddo gama kuriiti. Ikkollana batinynyu manni togoo xaˈmora dawaro afiˈrate sharro assa agurino. Mayira? Qullaawu Maxaafi togoo xaˈmora dawaro qolanno? Mitu mannira Qullaawu Maxaafi tenne xaˈmora qolanno dawaro huwatate qarrissannoha lawannonsa. Wolootu kayinni xaˈmo xaˈma saalsiissannonke yite waajjitanno. Gamu kayinni togoo xaˈmo ammaˈnote murrootiranna rosiisaanora agura woyyitanno yitanno. Kuni coyi atera ma lawannohe?

4, 5. Heeshshonke giddo lowo geeshsha hasiissanno xaˈmo giddo mite mite hiitteeti? Dawaro afiˈrate sharro assa hasiissannonkehuna mayiraati?

⁴ Heeshshokki giddo lowo geeshsha hasiissanno xaˈmora dawaro afiˈrate hasiˈrittokki digatootto. Mito mito wote, ‘Isi heeshshote alaami maati? Heeshshote yaa xaatella? Maganu isi hiittooho?’ yite xaˈmittokki digatootto. Togoo xaˈmo xaˈma garaho; qolteno hasiissannote. Konni daafira ikkado dawaro afiˈratto geeshsha sharro assa agurtooti. Bayiru rosiisaanchi Yesuusi Kiristoosi togo yiino: ‘Huuccidhe, uyinanniˈnena; hasidhe, afidhinannina; ciratte, waalcho fannanniˈnena.’—Maatewoosi 7:7.

⁵ Hasiissanno xaˈmora dawaro ‘hasiˈra’ agurattokkiha ikkiro, hatto assakki gedensaanni kiissahera dandiitanno. (Lawishsha 2:1-5) Mannu baxire yiiherono, tenne xaˈmora dawaro no; qoleno tenne dawaro Qullaawu Maxaafi giddonni afiˈra dandaatto. Dawarono huwatate qarrissannota diˈˈikkitino. Isinni hexxonna hagiirre afiˈratto gede assitannohe. Xa nafa hagiirraame heeshsho heeˈratto gede kaaˈlitannohe. Hanni batinynye manna gurcheessitannota mitte xaˈmo laˈno.

6. Batinynyu manni, mannu oosora iillanno qarri Maganoho mittore dilawannosi yee hedannohu mayiraati?

⁶ Batinynyu manni tenne xaˈmora dawaro ee yitannote yee hedanno. Konnira korkaata shiqishanni, ‘Maganu mannaho  assaawannoha ikkoommero alamenke xa noowiinni lowo geeshsha diwoyyaabbanno?’ yaanno. Qooxeessinkera noo alame laˈnummoro, olu, gibbonna shetto woˈmitinote. Qoleno mitti mittinke xiwammeemmo, qarrammeemmo hattono banxeemmo manna shiiˈneemmo. Konni daafira batinynyu manni, ‘Maganu ninkera assaawannoha ikkoommero kuni duuchchu qarri iillannonketa dihoolanno?’ yaanno.

7. (a) Ammaˈnote rosiisaano batinynyu manni Maganu kaajjadoho yee hedanno gede assitinohu hiittoonniiti? (b) Iillannonke fatana lainohunni Qullaawu Maxaafi mayyaanno?

⁷ Ikkollana konninni roore bushino coyi no; hakkuno ammaˈnote marootinna sawaakooti, mannu Maganu kaajjadoho yee hedanno gede assansaati. Konne assitannohu hiittoonniiti? Mitte dano iillitanno wote, kuni Maganu abbinoreeti yitanno. Kuri rosiisaano wole yaattonni, iillitanno bunshe baalate xaˈmamannohu Maganoho yaansaati. Maganu addinta hatto assannoni? Qullaawu Maxaafi tennera mayyaanno? Yaaqoobi 1:13 togo yite qoltanno: ‘Ayino fattanamanno woyite, “Maganu fattaninoe” yoonke. Korkaatuno, Maganu bushu coyinni difattanamanno; isi horontanni ayeeno difattananno.’ Konni daafira, alamenkera noo bunshe abbinohu horonta Magano diˈˈikkino. (Iyyoobi 34:10-12) Maganu bunshe heedhanno gede faqqadinoti dikaandannite. Ikkollana mittu coyi ikkanno gede faqqadatenna hakkonne coye assate mereero lowo badooshshi no.

8, 9. (a) Bunshe heedhara faqqadatenna bunshe abbate mereero noo badooshshe lawishshunni kuli. (b) Maganu mannu ooso bunshete doogo hadhara agurinohura iso bushiisha gara ikkitinokkihu mayiraati?

⁸ Lawishshu gede, mine baxxinokkihu qeedhichchu beetti noosiha mitto hayyichchanna baxillaancho mancho hedi. Kuni beetti finqile mininni fuleemmo yiiro, annu dihoolannosi. Kuni beetti bunshete doogo harunsino daafira qarru iillannosi. Ikkina konni beettira iillino qarra abbinohu annahoyyani? Deeˈni. (Luqaasi 15:11-13) Hattonni mannu ooso bunshete doogo haˈra doodhituta Maganu dihoolinonsa. Ikkollana doodhitino doogo haˈransanni iillinonsa qarra abbinohu iso diˈˈikkino. Konni daafira mannu oosora iillanno qarrira Magano bushiisha digaraho.

 ⁹ Maganu mannu ooso bunshete doogo hadhara faqqadinohu ikkadu korkaati noosihuraati. Egennaamonna wolqaataamo Kalaqaanchonke ikkino daafira qarru heeˈrara faqqadino korkaata ninkera kulate giddeessannosiri dino. Ikkollana baxannonke daafira qarru heeˈrara faqqadino korkaata kulinonke. Tenne hajo lainohunni 11⁠^ki fooliishshora halaˈladunni ronseemmo. Ikkollana iillannonke qarrira xaˈmamannohu Magano ikkinokkita huluullantooti. Isinni qarrunni fulleemmo hexxo uyinonkehu isooti!—Isayyaasi 33:2.

10. Maganu bunshe abbitino gawajjo baala dhaawanno yine addaxxineemmohu mayiraati?

¹⁰ Hakkiinni saeno, Maganu qullaawaho. (Isayyaasi 6:3) Hatto yaa, isi xalalahonna xuru noosikkiho yaate. Isira hili bunshe nafa dinosi. Konni daafira, woˈmunni woˈma addaxxinammosira dandiineemmo. Mannu ooso kayinni soorrantara dandiitanno daafira, insa woˈmunni woˈma addaxxinammora didandiineemmo. Silxaane noosihu mittu ammanamino manchi nafa, bushu manni abbanno gawajjo dhaawa didandaanno. Maganoho kayinni hoogamannosiri dino. Isira, bunshe mannu oosora abbitino gawajjo baala dhaawate wolqa noosi; dhaawannono. Maganu tenne assanno yannara, bunshe hegerera baˈanno!—Faarso 37:9-11.

11. (a) Alamete aana noo miicora Maganoho mayi macciishshamannosi? (b) Atera iillanno qarrira Maganoho mayi macciishshamannosi?

¹¹ Hakka geeshsha kayinni, alamete aana noo miicorano ikko atera iillitanno gawajjora Maganoho mayi macciishshamannosi? Umihunni, Qullaawu Maxaafi Maganu ‘taashsho baxannota’ rosiisanno. (Faarso 37:28) Konni daafira gara ikkino coyenna gariweelo coye lainohunni Maganoho lowo geeshsha macciishshamannosi. Isi baalanta miico giwanno. Biˈre yannara bunshe alame woˈmiteenna Maganoho ‘godowisi xissiisiˈrinota’ Qullaawu Maxaafi coyiˈranno. (Kalaqo 6:5, 6) Xaano ikkiro Maganu disoorramino. (Milkiyaasi 3:6) Alamete aana noo mitiimma laˈˈa iso xaano dihagiirsiissannosi. Qoleno isi mannu  qarramanna laˈˈa dibaxanno. Qullaawu Maxaafi, ‘Isi kiˈnera assaawanno’ yaanno.—1 Pheexiroosi 5:7.

12, 13. (a) Baxillenna wole dancha akata afiˈnoommohu hiikkiiniiti? Baxillu alamete aana noo qarrira mayi macciishshamannonke gede assanno? (b) Maganu alamete aana noo qarra hoolannota huluullammeemmokkihu mayiraati?

¹² Maganu mannu qarramanna laˈˈa baxannokkita huluullammeemmokkihu mayiraati? Konnira taje ikkannoha wole coye laˈno. Qullaawu Maxaafi mannu Maganu daninni kalaqaminota rosiisanno. (Kalaqo 1:26) Konni daafira ninkera danchu akati heeˈrankera dandiinohu, Maganoho danchu akati noosi daafiraati. Lawishshaho, danchu manni qarramanna laittoro mararsannohe? Togoori ate mararsannoheha ikkiro, Magano hakkiinni roore mararsannosita huluullantooti.

¹³ Mannu oosora noohu danchu coyi giddo mittu baxilleho. Ninkera noonke baxilli Maganu akata leellishanno. Qullaawu Maxaafi, ‘Maganu baxilleho’ yaanno. (1 Yohaannisi 4:8) Ninkera baxillu noonkehu Maganu baxillaancho ikkino daafiraati. Mannaho noohe baxilli alamete aana noo qarranna miico hoolatto gede kakkayisannohe? Wolqa heedhoommehero, hoolatto? Addaho hoolatto! Maganuno qarranna miico baalanta hoolannota huluullantooti. Konni maxaafira bitimaho qummi assinoonni hexxo baalanti haaqete halcho woyi beebbate hexxo diˈˈikkitino. Maganu eino qaali mitte huluullo nookkiha woˈmanno! Ikkollana tenne baalanta hexxo addaxxate, tenne hexxo uyino Maganire roorsite afa hasiissannohe.

14. Maganu suˈmi ayeeti? Iso suˈmisinni woshsha hasiissannonkehu mayiraati?

¹⁴ Mittu manchi ledo egennama hasiˈrittoro ma assatto? Suˈmakki kulattositi egennantinote. Maganoho suˈmu noosi? Duuchcha ammaˈno suˈmisi “Maganoho” woyi “Mootichchaho” yitanno; ikkollana kuri gillete suˈmuwa diˈˈikkitino. “Nugusa” woyi “pirezidaantichcha” yaanno suˈmi maaragete suˈma ikkinonte gede, kurino maaragete suˈmuwaati. Qullaawu Maxaafi Maganoho batinynyu maaragete suˈmi noosita kulanno. Hakkuri giddo gamu “Magano” nna “Mootichcha” yinannireeti. Ikkollana Qullaawu Maxaafi Maganoho gillete suˈmi  noositano kulanno. Suˈmisi Yihowaati. Faarso 83:18 togo yitanno: “Suˈmakki Yihowa yinannihu ati callu uulla woˈmate Ayirradoho.” Qullaawu Maxaafikki giddo kuni suˈmi nookkiha ikkiro, hooginohu mayiraatiro konni maxaafira qoola 195-197 noo Guwuursha laˈˈa dandaatto. Umo borreessinoonnitera Qullaawu Maxaafi tirora kayinni Maganu suˈmi kumunni kiirranni basera no. Konni daafira Yihowa suˈmasi afatto gedenna suˈmisinni woshshattosi gede hasiˈranno. Isi isonooto atera egensiisate Qullaawa Maxaafa horonsiˈranno yaa dandiinanni.

15. Yihowa yinanni suˈmi maa leellishanno?

¹⁵ Maganu isiniitira fushshiˈrino suˈmi lowo tiro afiˈrinoho. Yihowa yinanni suˈmi, Maganu eino qaale woˈmanka wonshannotanna hedinore baala assannota leellishanno. * Maganu suˈmi baxxinoho. Kuni suˈmi Maganoho calla gabbaˈˈannoho. Yihowa  duuchcha doogonni baxxino Maganooti. Baxxinoha ikkinohu hiittoonniiti?

16, 17. (a) “Duuchchanka Dandaannohu” (b) “Hegerete Nugusa” (c) “Kalaqaanchu” yaannohu maaragete suˈmi Yihoware maa rosiisannonke?

¹⁶ Faarso 83:18 aana, “Ati callu Ayirradoho” yaannoha nabbamboommo. Qoleno, ‘Duuchchanka Dandaanno’ yinoonnihu Yihowa callaati. Ajuu[j]a 15:3 togo yitanno: ‘Duuchchanka Dandaatto Magano Yihowa, loosikki bayirahonna maalaˈlinanniho. Hegerete Nugusa, doogokki keeraanchotenna halaaleho.’ “Duuchchanka Dandaannohu” yaannohu maaragete suˈmi, Yihowara gawalo nookki wolqa noosita leellishanno. Isi wolqa taalle nookkite; bayirate yaate. “Hegerete Nugusa” yaannohu maaragete suˈmi, Yihowa baxxinoha ikkinoti wole doogo noota kulanno. Yihowa calla ayeewoteno heeˈrannoho. Faarso 90:2, “Hegeretenni hegerete geeshsha ati Maganoho” yitanno. Yihowa togoo Magano ikkasi, iso lowo geeshsha ayirrinseemmo gedenna waajjineemmo gede diassitannonke?

¹⁷ Yihowa baxxinoha ikkinoti wole doogo, isi calla Kalaqaancho ikkasiiti. Ajuu[j]a 4:11 togo yitanno: ‘Yihowa Maganonke ballo duuchchanka kalaqoottona, kalaqamarano fajjoottohu ateetina ayirrinynyu, guweenynyunna wolqa atera ikkitohe.’ Illete leeltannokkiri iima noori ayyaanu kalaqo hashsha gordo woˈmite leeltanno beeddahe, haqqete laalonna wuqiyanoosete hattono laggate giddo noo qulxuˈme baala kalaqantinohu Yihowa kalaqinonsa daafiraati!

18. Mitu manni Maganunniwa shiqa didandiinanni yee hedannohu mayiraati? Qullaawu Maxaafi kayinni mayyee rosiisanno?

¹⁸ Mitu manni Yihowa ayirrinseemmo gedenna waajjineemmo gede assannonke akatire nabbawanno wote lowo geeshsha waajjanno. Kuni manni Maganu lowo geeshsha bayira ikkino daafira isiwa shiqa didandiinanni; woyi isi ninke garire asse dilaˈˈanno yee waajjanno. Ikkina hatto yee heda garaho? Qullaawu Maxaafi kayinni konninni baxxinore rosiisanno. Yihoware coyiˈranni, ‘Ikkollana isi mitti mittinkewiinni dixeertiˈrinoho’ yaanno. (Soqqamaanote Looso 17:27) Isinni Qullaawu  Maxaafi, ‘Maganunniwa shiqqe; isino kiˈnewa shiqannona’ yee amaalannonke.—Yaaqoobi 4:8.

19. (a) Maganunniwa shiqate umo maa assa hasiissannonke? Hatto assankenni maa afiˈneemmo? (b) Maganu amalla giddo ate roore baxissannoheri hiikkuriiti?

¹⁹ Maganunniwa shiqa dandaattohu hiittoonniiti? Umo, xa assitanni noottore yaano Maganunnire rosakki agurtooti. Yesuusi togo yiino: ‘Hegere heeshsho, ati callu halaalaancho Magano ikkoottoha atenna soottoha Yesuusi Kiristoosi afate.’ (Yohaannisi 17:3) Addaho Qullaawu Maxaafi, Yihowarenna Yesuusire afa “hegere heeshsho” uyitannota rosiisanno! Albaanni ronsummonte gede, ‘Maganu baxilleho.’ (1 Yohaannisi 4:16) Yihowara danchanna baxissanno amalla woleno noosi. Lawishshaho Qullaawu Maxaafi Yihowa “mararannoha, shaqqado, rahe hanqannokkiha hattono baxillisinna ammanamasi batidhino Magano” ikkinota coyiˈranno. (Wolaphpho 34:6) Isi “danchahonna soˈro gatona yaate qixxaawino” Maganooti. (Faarso 86:5) Maganu cincaho. (2 Pheexiroosi 3:9) Qoleno ammanaminoho. (1 Qorontoosi 1:9) Qullaawa Maxaafa nabbabbanni haˈritto kiiro, Yihowa kurinna wole baxisanno akatasi hiittoonni leellishinoro buuxatto.

20-22. (a) Magano laˈˈa hooganke isiwa shinqeemmota hooltannonkeni? Xawisi. (b) Mitu atera assaawanno manni ma assatto gede xixxiiwahera dandaanno? Ati kayinni ma assa hasiissannohe?

²⁰ Maganu illete leellannokkiha ayyaana ikkino daafira iso laˈˈa dandaattokkiti addaho. (Yohaannisi 1:18; 4:24; 1 Ximootewosi 1:17) Ikkollana Qullaawa Maxaafa horonsidhe isire rosattoha ikkiro, isi mittu illete laootto manchi gede ikke xawe leellannohe. Faarsaanchu yiinonte gede, “Yihowa xumme laˈˈa” dandaatto. (Faarso 27:4; Roomu Sokka 1:20) Yihoware roore rossanni haˈritto kiiro, isino atera roore xawe leellanni haˈrannohe; qoleno iso baxatto gede assannohehu lowo korkaati heeˈrannohe hattono isiwa higge shiqoottohu gede ikke macciishshamannohe.

²¹ Hakkiinnino Qullaawu Maxaafi, Yihowa Anninke gede assine laˈneemmo gede rosiisannonkehu mayiraatiro sunu sununni affanni haˈratto. (Maatewoosi 6:9) Yihowa heeshsho uyinonkeha calla ikkikkinni mittu shaqqadu anni oososira halchannonte  gede dancha heeshsho heeˈneemmo gede hasiˈranno. (Faarso 36:9) Qoleno Qullaawu Maxaafi mannu Yihowa jaala ikka dandaannota rosiisanno. (Yaaqoobi 2:23) Hatto yaa mayyaatero hanni hedi. Kalqete alame Kalaqaanchira jaala ikka dandaatto yaate!

²² Qullaawa Maxaafa xiinxallitanni haˈritto kiiro, mitu atera assaawanno manni xiinxallokki aguratto gede xixxiiwahera dandaanno. Kuni manni ammaˈnokki agurte wolete higatto yee yaadara dandaanno. Ikkeennano, baxxino jaalooma kalaqiˈrattota yaano Maganu ledo jaaloomattota hoolahera ayeerano anga uyitooti.

23, 24. (a) Rossanni nootto roso lainohunni xaˈmo xaˈma agura hasiissannohekkihu mayiraati? (b) Aantanno fooliishshora maa ronseemmo?

²³ Umi qara einohekki coyi heeˈrara dandaanno. Wole manna kaaˈlo xaˈmira umo heeshshi assa hasidhanno; ikkeennano waajjite xaˈma agurtooti. Yesuusi qaaqquullu gede umo heeshshi assa dancha ikkitinota coyiˈrino. (Maatewoosi 18:2-4) Anfoommonte gede, qaaqquullu duuchcha xaˈmo xaˈmitanno. Maganu xaˈmokkira dawaro afiˈrattora hasiˈranno. Maganunnire rosate quqquxamino manna Qullaawu Maxaafi giddo galantoonninsa. Hakko manni rosiinsoonninsa rosi halaalehoronna teˈee buuxate Qullaawa Borronni taashshanni xiinxallino.—Soqqamaanote Looso 17:11.

²⁴ Yihoware rosate duuchchunkunni woyyitino doogo Qullaawa Maxaafa seekke xiinxallate. Qullaawu Maxaafi wole maxaaffa baalantenni baxxinoho. Baxxinoha ikkinohu mayinniiti? Aantanno fooliishsho tenne hajore xawissanno.