1, 2. (a) Maariyaamiwa dayino wosinchi ise mayyee keere haaꞌrino? (b) Maariyaami hakkawote mitte doodha hasiissinose yineemmohu mayiraati?

 MAARIYAAMI minisera dayino wosincho dhagge assidhe laꞌanni no. Isi annase woy amase hasiꞌre dayinoha ikkikkinni, ise hasaawisara dayino! Maariyaami, kuni wosinchi Naaziretete katami mancho ikkinokkita affino. Hakkuyi shiimu katamira, wolewiinni dayino manna bade afa diqarrissanno. Kuni isinni baxxino wosinchooti. Isi Maariyaami keere haaꞌrino garino isera haaroho; togo yiinose: “Ati elto woꞌmitinoheti, keeru ledokki heeꞌro! Maganu ate ledo no.”—Luqaasi 1:26-28 nabbawi.

² Qullaawu Maxaafi, Galiilu gobbara noohu Naaziretete katamira heedhannote Heeli beetto Maariyaami xagge kula hanafannohu konni garinniiti. Ise hakkawote heeshshose giddo mitte doodha hasiisse noose. Hakkawote ise Yooseefi yinanni hanaaxichi adhasera huucciꞌre no; kuni manchi dureessa ikka hoogirono, kaajja ammana noosiho. Konni daafira, Maariyaami Yooseefi ledo maate kalaqidhe bikku heeshsho heedhannotalla hedde no. Ikkollana, hedeweelcho kuni wosinchi daye, Maganu isera hedinore kulise; kulinoseri heeshshose woꞌma soorrannoho.

3, 4. Maariyaami ayimma bade afate, maa agurre maa illachisha hasiissannonke?

³ Batinyu manni, Qullaawu Maxaafi Maariyaami daafira lowore kulannokkita afanno woyite dhagge assiꞌranno. Qullaawu Maxaafi Maariyaami ilante lophitino garanna akatise hiittoohoro garire dikulanno; danise hiittoohoro isinni horo dikulanno. Ikkirono, Maganu Qaali Maariyaami daafira kulannori, ise daafira lowore huwanteemmo gede kaaꞌlannonke.

⁴ Maariyaami ayimma bade afate, addi addi ammaꞌno giddo ise daafira hedotenni rosiinsanniha batinye roso adha dihasiissannonke. Konni daafira, Maariyaami togoote yine qixxeessinannita addi addi misilla, hattono “Maganu Ama” woy “Gordu Mootitte” yine tenne umose heeshshi assitanno mancho quwa saꞌne guwinsanni gede assannoha xurqa ikkino roso baala agurre, ise daafira Qullaawu Maxaafi kulannore calla illachinsho. Qullaawu Maxaafi, Maariyaami ammana mageeshshiteronna ninkeno ammanatenni ise faale haꞌneemmohu hiittoonniitiro huwanteemmo gede kaaꞌlannonke.

5. (a) Maariyaami, Gebirieeli keere haaꞌriseta ikkitinorinni ise daafira maa ronseemmo? (b) Maariyaamiwiinni hiikkonne kaajja roso ronseemmo?

⁵ Maariyaamiwa dayino wosinchi mancho ikkikkinni, Gebirieeli yinanni sokkaasinchooti. Isi “Ati elto woꞌmitinoheti” yee keere haaꞌriseta, Maariyaami ‘massino’; qoleno kuni hiittoo keereetikka yite huluullantino. (Luq. 1:29) Hakkiinni sokkaasinchu Gebirieeli lede togo yiinose: “Maariyaami, Maganu albaanni ayirrinye afiꞌrootta.” (Luq. 1:30) Maganu albaanni ayirrinye afiꞌra Maariyaamira loworeeti. Ikkirono ise, Maganu albaanni ayirrinye afidhino daafira dinaaxxitino. Ninkeno Maariyaamiwiinni kaajja roso ronseemmo; woꞌmanka woyite Maganu albaanni ayirrinye afiꞌrate sharrama hasiissannonke ikkinnina, Maganu albaanni ayirrinyu noonke yine naaxxa dihasiissannonke. Maganu booꞌnaleeyye giwanno; jooguullenna umonsa heeshshi assitannore kayinni baxannonsa, hattono irkisannonsa.—Yai. 4:6.

6. Sokkaasinchu Maariyaamira hiittenne baxxitino qoosso afidhannota kulinose?

⁶ Sokkaasinchu Maariyaamira baxxitino qoosso afidhannota kulinose daafira, ise umo heeshshi assase garankolla. Sokkaasinchu ise iltanno qaaqqi mannu baalunkura aliidiha ikkannota kulinose. Gebirieeli togo yiino: “Mootichu Maganu, annisi Daawitiha ayirrinyu barcima aannosi. Yaiqoobi minirano hegerera moohanno. Gashshootisira gawalo dino.” (Luq. 1:32, 33) Maganu kume diro saꞌanno yannara albaanni Daawitira sirchisi giddonni mittu hegerera moohanno yee hexxo uyinosita Maariyaami seekkite affinoti egennantinote. (2 Sam. 7:12, 13) Hakko daafira, ise iltanno qaaqqi Maganu manni lowo xibbe diro agadhe keeshshinoha Buuramino Moote (Mesihicha) ikkannoho!

7. (a) Maariyaami xaꞌmitino xaꞌmo ise daafira maa leellishshanno? (b) Yannankera noo wedellooti Maariyaamiwiinni maa rosanno?

⁷ Hakkiinni saeno, sokkaasinchu Maariyaami iltanno qaaqqo “Woꞌmunkura Aliidi Magani Beetto” yinannita coyiꞌrino. Mitte mancho Maganu Beetto ila dandiitannohu hiittoonniiti? Qoleno hakkawote Maariyaami hiitto ikkite ila dandiitanno? Ise Yooseefi adhasera huucciꞌre nooha ikkirono, insa hakkawote diadhamino. Hakko daafira, Maariyaami togo yite xawisse xaꞌmitino: “Ani seemotena, kuni coyi hiitto ikke ikkanno?” (Luq. 1:34) Maariyaami seemo ikkitinota saalfattukkinni coyidhinota wodanchi. Hatteentenni, ise amanyootunni heedhannota ikkitino daafira hagiidhitino. Xaa yannara, batinyu wedellooti seeminatensa hunate muddamanno; qoleno hatto assitannokkire arrassanno. Addanko alame soorrantino. Yihowa kayinni disoorramino. (Mil. 3:6) Isi xaano amanyootu seerasi agadhitannore naadanno.—Ibiraawoota 13:4 nabbawi.

8. Maariyaami guuta ikka hooggurono, guuta qaaqqo ila dandiitannohu hiittoonniiti?

 ⁸ Maariyaami Maganoho ammanante soqqantannota ikkiturono, guuta mancho diꞌꞌikkitino. Hatto ikkiro, guuta Maganu Beetto ila dandiitannohu hiittoonniiti? Gebirieeli kuni ikkannohu hiittoonniitiro xawisanni togo yiino: “Qullaawu Ayyaani ate aana dirranno; Woꞌmunkura Aliidi Magani wolqa caalshiishshannohe. Kunnira ati ilatta qaaqqo Qullaawu Maganu Beetti yinanni.” (Luq. 1:35) Ooso anninsanna amansawiinni cubbo ragidhe ilantannoti egennantinote. Yesuusi ilamanno woyite kayinni, Yihowa baxxitino maalale loosanno. Yihowa Beettisi heeshsho iiminni haaꞌre Maariyaami godowira worihu gedensaanni, qaaqqoho cubbu saꞌꞌannokki gede qullaawu ayyaanisinni Maariyaami ‘caalshiishanno.’ Maariyaami sokkaasinchu kulinose hexxo ammantuyya? Ise tenne macciishshituti mayitino?

9. (a) Mitootu Maariyaami xagge huluullamansa soꞌrote yineemmohu mayiraati? (b) Gebirieeli Maariyaami ammana kaajjishinohu hiittoonniiti?

⁹ Mitootu, wole agurina Suꞌmu Kiristinni rosiisaano, seemo beetto hiitto ikkite iltanno yite huluullantanno. Insara lowo egenno noonsaha ikkirono, huwatate qarrisannokkiha konne halaale diwodanchitino. Gebirieeli yiinonte gede, “Maganu dandaannokki coyi dino.” (Luq. 1:37) Maariyaami lowo ammana noose wedellitte ikkitino daafira, Gebirieeli coyiꞌrinore ammantino. Ikkollana, ise ammantinohu coye buuxxukkinni diꞌꞌikkino. Coye heeshshi gotti asse hedannohu wolu manninte gede, Maariyaami kulloonnisere ammantara albaanni taje hasidhino. Gebirieeli taje ikkannore wolereno kulinose. Isi fiixise Elsaabeexi daafira kulinose; Elsaabeexi geerchotenna lowo diro ilaweelte keeshshitinote. Maganu ise maalaletenni godowa dandiitanno gede kaaꞌlinose!

10. Maariyaamira uyinoonnise hadari shota diꞌꞌikkino yineemmohu mayiraati?

¹⁰ Xa Maariyaami maa assita ikka? Ise xa Maganu isera hedinore affino; qoleno ise Gebirieeli kulinosere baalankare Yihowa wonshannota ammantino. Maganu Beetto ila lowo ayirrinye ikkiturono, tenne qoosso adha Maariyaamira shota diꞌꞌikkitino. Umihunni, Yooseefi ise adhara huucciꞌre no. Yooseefi ise godowii noota afiro, adhase ikka? Layinkihunni, uyinoonnise qoosso umise waajjishshannote yaa dandiineemmo. Ise godobbannohu wole kalaqama baala roorannoho muxxe Maganu beettooti! Ise konne qaaqqo anjesinni kayisse towaattanni lossanna busha alame gawajjitannosikki gede agara hasiissannose. Addanko kuni jawa hadaraati!

11, 12. (a) Jawaatunna ammanamino manni nafa Maganu looso uyinsata hiitto ikkino woyiti no? (b) Maariyaami Gebirieelira qoltino dawaronni ise daafira maa huwanteemmo?

¹¹ Qullaawu Maxaafi, jawaatunna ammanamino manni nafa Maganu  uyinonsa looso adhate hobbi ruxxi yiino woyiti noota kulanno. Muse, Maganu afoosi ikke coyiꞌrara soqqisi woyite, ani coyiꞌra dandoommokki babbichaati yiino. (Ful. 4:10) Ermiyaasi ‘Ani shiima beettooti’ yee Maganu uyinosi looso adha giwe xiixamino. (Erm. 1:6) Yoonaasino uyinoonnisi looso agure xooqino! (Yon. 1:3) Maariyaamina?

¹² Ise shaqqillunni maahoyye yite coyidhinore, xaa yannara nafa lowo manni afino. Ise Gebirieelira togo yitino: “Kuneeti, ani Mootichu borojjichootina, ati yootto gede ikkoe.” (Luq. 1:38) Hakkawaro meya borojjicho soqqamaasinete giddo woriidita assine kiirranni; qoleno heeshshose gudisante mootichise anga no. Maariyaami ‘Ani Maganu soqqamaasine giddo woriidite’ yitinohu gedeeti; hattono ise Yihowa Mootichase ikkinota ammantanno. Ise Yihowa anga heedhu geeshsha ikkitannori nookkita, ammanamino mannira isino ammanaminoha ikkinotanna uyinoonnise looso loosate dandiiture baala assitanno woyite isi maassiꞌrannoseta affino.—Far. 18:25.

13. Maganu asse yiinonkeri qarrisannore woy horo dandiineemmokkire lawinkero, Maariyaami lawishshi kaaꞌlannonkehu hiittoonniiti?

¹³ Mito woyite, Maganu asse yaannonkeri qarrisannore, woy isinni horo dandiineemmokkire lawankera dandaanno. Ikkollana, Maariyaami gede ninkeno Magano addaxxine heeshshonke isi anga wodhineemmo gede assitannonketi Qaalisi giddo lowo taje no. (Law. 3:5, 6) Ikkina iso addaxxineemmo? Yihowa addaxxineemmosiha ikkiro, ammananke roore kaajjitanno gede assitanno taje oye maassiꞌrannonke.

14, 15. (a) Maariyaami Elsaabeexinna Zakkaariyaasi minira martu woyite, Yihowa kiisinosehu hiittoonniiti? (b) Maariyaami Luqaasi 1:46-55 coyidhinori, ise daafira maa huwanteemmo gede kaaꞌlannonke?

¹⁴ Gebirieeli Elsaabeexi daafira coyiꞌrinori, Maariyaami lowo geeshsha jawaachishinose. Hige Elsaabeexi geeshsha Maariyaami ikkite noo gari leellannosihu wolu ayi no? Maariyaami bayichonko ilaalaame Yihudu gobba hadhu; hakka iillate sase woy shoole barra haꞌnanniha ikkara dandaanno. Ise Elsaabeexinna kakkalaasinchu Zakkaariyaasi minira eꞌuta, Yihowa ammanase kaajjishshannota wole taje oye kiisinose. Elsaabeexi Maariyaami keere macciishshituta, Elsaabeexi godowira noo qaaqqi hagiidhe kukkubbi. Ise qullaawu ayyaani woꞌmeennase, Maariyaami “Mootichiꞌya ama” yitino. Maganu Elsaabeexira, Maariyaami iltanno qaaqqi Mootichase, hattono Mesihicha ikkannota huwattanno gede kaaꞌlinose. Qoleno, Maariyaami ammanante hajajantino daafira Elsaabeexi qullaawu ayyaaninni togo yite  galattinose: “Mootichu coyiꞌrinohe coyi woꞌmannota ammanoottati ati hiitto baꞌraaꞌroottate!” (Luq. 1:39-45) Addanko, Yihowa Maariyaamira uyino hexxo baalanti woꞌmitannote!

¹⁵ Hakkiinni, Maariyaami coyiꞌra hanaffu. Ise coyidhinore Maganu Qaali giddo borreessine worroonni. (Luqaasi 1:46-55 nabbawi.) Qullaawu Maxaafi giddo Maariyaami lowore coyidhinohu hakkawoteeti; qoleno coyidhinori ise daafira lowore huwanteemmo gede assannonke. Ise, Yihowa Mesihichu ama ikkitanno gede doore maassiꞌrinose daafira iso guwisidhino; tini, ise galattannota ikkitinota leellishshanno. Qoleno Maariyaami, Yihowa booꞌnaleeyyenna wolqaataamma billaallisannotanna isira soqqama hasidhanno buxanenna  hooffayidire kaaꞌlannota coyidhino; tini lowo ammana nooseta leellishshannote. Hakkiinni saeno, Maariyaami coyidhinori isera lowoti Qullaawa Borro egenno nooseta leellishanno. Ise hakkawote, Ibiraawootu Afiite Qullaawa Borro giddonni 20 saꞌanno hedo qummi assitino yine hendanni! a

16, 17. (a) Maariyaaminna beettise leellishinohu hiikku akati heeꞌrannonke gede sharrama hasiissannonke? (b) Maariyaami Elsaabeexiwa hadhinota kultanno xagge maa qaagiissitannonke?

¹⁶ Addanko, Maariyaami Maganu Qaale seekkite hiincitanno manchooti. Ikkirono, ise umose heeshshi assitannota ikkitino daafira, umise hedo coyiꞌrantenni Qullaawa Borro yitannore qummi assitino. Hakkawote godowise giddo noo qaaqqino yannate gedensaanni, “Ane rosi, soyinoehu Anniꞌyawiinniiti ikkinnina anewiinni diꞌꞌikkino” yee ise gede umosi heeshshi assannoha ikkinota leellishino. (Yoh. 7:16) Ninkeneeto togo yine xaꞌmino: ‘Anino Maganu Qaale togo ayirriseemmonso, umiꞌya hedo coyiꞌra baxeemmo?’ Maariyaami tennera dancha lawishsha ikkitinonke.

¹⁷ Maariyaami Elsaabeexiwa mito sase agana keeshshitino; hattee yannara lamenti mimmito lowo geeshsha jawaachishinoti dihuluullissannote. (Luq. 1:56) Maariyaami Elsaabeexiwa hadhinota kultannoti tini kaajja xagge, jaalooma kalaqiꞌra kaaꞌlitanno gara qaagiissitannonke. Maganonke Yihowa addinta baxxannore jaallanke assiꞌnummoro, ayyaanaamittetenni lophineemmo, hattono albinni roore isiwa shinqeemmo. (Law. 13:20) Jeefoteno, Maariyaami qaera higganno yanna iillitu. Yooseefi ise godowii noota afiro mayyaa ikka?

18. Maariyaami Yooseefira maa kultino? Isi tenne macciishshe hiitto ikkino?

¹⁸ Maariyaami godowii noota Yooseefira kulate godowu leella geeshsha agartinokkiti dihuluullissannote. Isira kultara albaanni, kuni shaqqadu Magano waajjanno manchi kulummaro hiitto ikkakka yite heddinoha ikkara dandaanno. Ikkirono, isiwa marte ikkinore baalankare kultusi. Yooseefi tenne macciishshita, yaannori bainosi gara heda dandaatto. Isi, tini baxanno beetto coyidhinore ammanoommero digiwino; kayinni amanyoote bainore assitinoha lawinosi. Qullaawu Maxaafi Yooseefi hakkawote maa hedanni nooro gudise dikulanno. Ikkirono, hakkawaro adhamate huuccantinore adhantinohu gede assine kiirranni daafira, Yooseefi ise agurara hasiꞌrino. Kayi mannu albaanni shollishasera hasiꞌrinokki daafira, mannu afikkinni agurara hedino. (Mat. 1:18, 19) Maariyaami, kuni shaqqadu manchi konne coye macciishshe xissiisiꞌranna laꞌu woyite lowo geeshsha dadillitinoti egennantinote. Ikkirono ise, mayira ammana hooginoe yite dihanqitino.

19. Yihowa, Yooseefi gara ikkinore assanno gede kaaꞌlinosihu hiittoonniiti?

 ¹⁹ Yihowa, Yooseefi gara ikkinore assanno gede shaqqillunni kaaꞌlinosi. Maganu sokkaasinchi Yooseefira haaqeetenni, Maariyaami godobbinohu maalaletenni ikkinota buuxisinosi. Yooseefi tenne macciishshita lubbo hirikki yitinosi gara heda dandaatto! Hakkiinni, Maariyaami balaxxe assitinonte gede, Yooseefino Yihowa fajjo ledo sumuu yaannore assino. Isi Maariyaami adhe galtesi assiꞌrino; hattono Yihowa Beetto lossate qixxaawa hanafino.—Mat. 1:20-24.

20, 21. Adhantinorino ikko adhamate heddanni noori Maariyaaminna Yooseefiwiinni maa rossanno?

²⁰ Xaa yannara, adhantinorino ikko adhamate heddanni noori, 2,000 diri albaanni heedhinori kuri minaanninna minaamawiinni kaajja roso rosa dandiitanno. Yooseefi, minaamasi Maariyaami qae amaddino garanna qaaqqo towaaxxitanno gara lai woyite, Yihowa sokkaasinchi yiinosire assino daafira hagiidhinoti egennantinote. Yooseefi shota ikkinokki coye murate kaꞌnanni woyite, Yihowa addaxxa lowo geeshsha hasiissannota huwatino. (Far. 37:5; Law. 18:13) Isi maatete umo ikkino daafira, baalankare shaqqillunninna qorophe assannoti dihuluullissannote.

²¹ Wole widoonni kayinni, Maariyaami Yooseefi umi qara ammaninosekkiha ikkirono, maahoyye yite isira assidhino. Tennenni maa ronseemmo? Maariyaami, albillitte maatete umo ikkannohu Yooseefi ikkinota affino daafira, isi mayi woyyannoro doora geeshsha cincite agartino. Ise tennenni dancha roso rossinoti egennantinote; yannankera noohu meya roduuwino tennenni lowore rosanno. Jeefoteno, Yooseefinna Maariyaami noore maanxikkinni coye fanne hasaawa hasiissannota hakkawote ikkinorinni rosikki digatino.—Lawishsha 15:22 nabbawi.

22. Yooseefinna Maariyaami adhama mayi aana xintantinote? Insa mayi qoosso afiꞌraraati?

²² Addanko kuri minaanninna minaama adhama kaajja safo afidhinote. Lamunku wolu baalunkurinni roorse Magano Yihowa baxannoreeti; qoleno dancha annanna ama ikke iso hagiirsiisa hasiꞌrannoreeti. Hige insa lowo atoote afiꞌrara kae nooha ikkirono, albansaanni lowo qarrino no. Yooseefinna Maariyaami, lophe uullate aana heeꞌrino manna baalanka roorannoha Yesuusa lossate qoosso afiꞌraraati.