1, 2. Maganu baxilli giddonni fulleemmokki gede maa assa dandiineemmo?

 NINKE baalunku fayyuullenna jawaatoota ikka hasiꞌneemmo. Konni daafira sagale inteemmo, ispoorte loonseemmo, hattono bisonke danchu garinni amaxxineemmo. Konne assa shota ikka hooggara dandiitannoha ikkirono, tini kaaꞌlitannonketa anfoommo daafira hexxo dimudhineemmo. Ikkollana fayyonna jawaata ikka hasiꞌneemmoti wole doogono no.

² Yihowa daafira rosa hananfoommoha ikkirono, isi ledo noonke jaalooma kaajjishiꞌrate agurrummokki sharrama hasiissannonke. Yihuda “Maganu baxilli giddo heedhe” yee amaali woyite, hatto assa dandiinanni garano xawisino. Isi ‘Qullaawa ammanaꞌnenni umoꞌne keereensiꞌrate jawaatte’ yiino. (Yihuda 20, 21) Ikkina ammananke jawaattanno gede assiꞌra dandiineemmohu hiittoonniiti?

3-5. (a) Sheexaanu Yihowa biddishshi daafira mayite hedattora hasiꞌranno? (b) Yihowa higgenna xintu seeri daafira mayi macciishshamannohe?

³ Yihowa doogo wole baalantenni roortannota ninkeneeto ammansiisa hasiissannonke. Sheexaanu ‘Maganu biddishshi harunsate qarrisannoho,’ qoleno ‘Danchanna  busha ikkinore ani umiꞌya afiꞌreemmo’ yite hedattora hasiꞌranno. Edenete kaashshu basenni hanafe Sheexaanu mannu hatto yee hedanno gede assate sharramanni keeshshino. (Kalaqama 3:1-6) Isi yannankerano hatto assa diagurino.

⁴ Sheexaanu yiinori garahoni? Yihowa fushshino biddishshi furro fuuqqo hoolannoha ikkinoni? Diꞌꞌikkino. Hanni mitto lawishsha laꞌno. Mitto laꞌꞌate baxisanno bayicho daaꞌꞌattanni noottohu gede assite hedi. Hakkiicho seedu huxxinni huxxine bandoonni base laitto. Hakkiinni ‘Konne huxxa huxxine eꞌꞌeemmota hoolloonnihu mayiraati?’ yite hedattora dandaatto. Hakkiinni bayichonko, huxxu giddo doobbiichu ittananna macciishshitto. Hakka woyite hakko huxxi daafira mayi macciishshamannohe? Doobbiichu sagale ikkattokki gede hakkonne huxxa huxxinoonni daafira tashshi yaannohe! Yihowa seerino huxxu gedeeti; Daawuloosi kayinni doobbiichu gedeeti. Maganu Qaali togo yee qorowisiisannonke: “Jilbunni heedhe; balala gede ikkitinoonte! Diiniꞌne Daawuloosi egemmannoha hasiꞌranni ittananno [doobbiichi] gede qooxeessiꞌnera doyanni no.”—1 Pheexiroosi 5:8.

⁵ Yihowa hagiirru noo heeshsho heeꞌnammora hasiꞌranno. Isi Sheexaanu dogankera dihasiꞌranno. Agarooshshenna hagiirre afiꞌneemmo gede higgenna xintu seera uyinonkehu iseraati. (Efesooni Sokka 6:11) Yaiqoobi togo yee borreessino: “Wolassannoha [woy keere fushshannoha] guuta seera buuxe afe isinni kaajje heeꞌrannohu, . . . loosisinni maassaminoho.”—Yaiqoobi 1:25.

6. Yihowa doogo wole baalantenni roortannota buuxa dandiineemmohu hiittoonniiti?

⁶ Yihowa biddishsha harunsineemmoha ikkiro, heeshshonke seekkanno; hattono Yihowa ledo noonke jaaloomi kaajjanni haꞌranno. Lawishshaho, isi ganyine  huucciꞌneemmo gede koyisinonke koyishsha adhine huuccatto assiꞌneemmoha ikkiro horo afiꞌneemmo. (Maatewoosi 6:5-8; 1 Teselonqe 5:17) Yihowa, iso magansiꞌratenna mimmito jawaachishate mitteenni gamba yineemmo gede, hattono sabbankeemmonna manna rosiinseemmo gede hajajinonke; tenne baala hajajo harunsineemmoha ikkiro hagiirraamma ikkineemmo. (Maatewoosi 28:19, 20; Galatiyu Sokka 6:2; Ibiraawoota 10:24, 25) Kuri coyibba assineemmoha ikkiro ammananke lexxitanno; tenne hendeemmo woyite Yihowa asse yaannonkeri kaaꞌlannonkere ikkinota albinni roore huwanteemmo.

7, 8. Albillitte iillannonke fonqoli daafira yaandeemmokki gede mayi kaaꞌlannonke?

⁷ Albillitte dandiineemmokkihu ammananke fonqolanno  qarri iillannonke yine yaandeemmoha ikkara dandaanno. Atino hatto yite hedattoha ikkiro, Yihowa togo yee qaale einota qaagi: “Woyyannoꞌnere baala rosiiseemmoꞌnehunna, hadhinanni doogo kuleemmoꞌnehu Maganiꞌne Kaaliiqi aneeti. Hajajoꞌya seekkitine macciishshitinoonniha ikkoommero, keeru moolannokki wayi gede, keeraanchimmano baaru dambali gede ikkite heedhannoꞌne.”—Isayaasi 48:17, 18.

⁸ Yihowara hajajammeemmoha ikkiro, salaamenke moolannokki lagi gede, keeraanchimmankeno goofannokkihu baaru dambali gede ikkitanno. Heeshshonke giddo baxi coyi iillinkerono, ammanammoommore ikka dandiineemmo. Qullaawu Maxaafi togo yaanno: “Isi irkisannohena, yaaddokki Maganu aana tugi; isi keeraancho qeelamara wore dilaꞌꞌanno.”—Faarso 55:22.

9, 10. Gikki yaate yaa mayyaate?

⁹ Yihowa ledo noohe jaaloomi lexxanno woyite ‘gikki yitanni haꞌratto.’ (Ibiraawoota 6:1, NW) Gikki yaate yaa mayyaate?

¹⁰ Dirinke lexxino daafira calla ayyaanaamittetenni gikki yaa didandiineemmo. Gikki yinoommore ikkate, Yihowa muli Jaalanke assiꞌranna coye isi laꞌꞌanno garinni laꞌꞌa hasiissannonke. (Yohaannisi 4:23) Phaawuloosi togo yee borreessino: “Maalu garinni heedhannori, maalu halchonni amadantanno [woy, maalu coyi aana illachishshanno]. Ayyaanu garinni heedhannori kayinni, Ayyaanu halchonni amadantanno.” (Roomu Sokka 8:5) Gikki yiino manchi maalaamittete coyi aana diꞌꞌillachishanno. Hatteentenni, Yihowara diinaggaawe soqqamanno, hattono heeshshosi giddo hayyote doorsha doodhanno. (Lawishsha 27:11; Yaiqoobi 1:2, 3 nabbawi.) Togoo manchi  fonqolu iillannosi woyite gariweelo coye diassanno. Gikki yiino manchi gara ikkino coye bade afinoho; qoleno hakko coye assate murciꞌrinoho.

11, 12. (a) Phaawuloosi “garanna gara ikkinokkire badate dandoo” daafira mayino? (b) Gikki yiino Kiristaancho ikkanna qolchanshote worba ikka mitto garaati yineemmohu mayiraati?

¹¹ Gikki yaate sharrama hasiissanno. Soqqamaasinchu Phaawuloosi togo yee borreessino: “Kaajjado sagale hasiissannohu garanna gara ikkinokkire bada dandaanno gede wodanchate dandoonsa horoonsiꞌranni qajeelsiꞌrinohura gikki yiino manniraati.” (Ibiraawoota 5:14, NW) “Qajeelsiꞌra” yaanno qaali qolchanshote qajeeltannore hendeemmo gede assannonke.

¹² Witiitte qolchantannore laꞌneemmo woyite, tenne dandoo afiꞌrate seekkite qajeeltinota huwanteemmo. Qolchanshote worba ikke ilamino manchi dino. Mittu qaaqqi ilamanno woyite, anganna lekka milli assiꞌranno gara seekke diafino. Ikkollana, yannate gedensaanni mito coye cuꞌminanni garanna qaanfanni gara rosanno. Hattono seekke qajeeliro qolchanshote worba ikka dandaanno. Hatteente gede, mittu Kiristaanchi gikki yiinoha ikkate yannanna qajeelshu hasiisanno.

13. Yihowa hedanno garinni heda ronseemmo gede mayi kaaꞌlannonke?

¹³ Konni maxaafira, Yihowa hedanno garinni hedanna coye isi laꞌꞌanno garinni laꞌꞌa dandiineemmo gara ronsoommo. Yihowa biddishsha naadanna baxa dandiineemmo garano xiinxallinoommo. Mitto doorsha doodhineemmo woyite ninkeneeto togo yine xaꞌmineemmo: ‘Tenne hajora kaaꞌlitannoeti Qullaawu Maxaafi higgenna xintu seeri hiikkonneeti? Tenne higgenna xintu seera harunsa dandeemmohu hiittoonniiti? Yihowa maa assammora hasiꞌranno?’—Lawishsha 3:5, 6 nna Yaiqoobi 1:5 nabbawi.

14. Ammananke jawaattanno gede maa assa hasiissannonke?

 ¹⁴ Yihowara noonke ammana lexxitanno gede assiꞌra agura dihasiissannonke. Unto ikkitanno sagale ita manninatenke kaajjishshannonte gede, Yihowa daafira rosano ammananke kaajjishshanno. Qullaawa Maxaafa xiinxalla hananfummo woyite, Yihowa daafira xinta ikkino halaalenna doogosi ronsoommo. Ikkollana yanna saꞌanno woyite, hawa gede huwantannikki coye huwatate woꞌnaala hasiissannonke. Phaawuloosi ‘Kaajjado sagale hasiissannohu gikki yiino manniraati’ yaasi hatto yaate. Ronsoommore loosunni leellinsheemmoha ikkiro, hayyo afiꞌneemmo. Qullaawu Maxaafi, “Egenno [“hayyo,” NW] woꞌmunku coyira [aliidite]” yaanno.—Lawishsha 4:5-7; 1 Pheexiroosi 2:2.

15. Yihowanna ammanate roduuwanke godowinta baxa hasiissannonkehu mayiraati?

¹⁵ Mittu manchi fayyonna jawaata ikke heeꞌrate, isonooto seekke towaaxxa agura hasiissannosikkita afino. Hatteente gede, gikki yiino manchi Yihowa ledo noosi jaaloomi kaajje heeꞌranno gede sharrama hasiissannosita afino. Phaawuloosi togo yiinonke: “[Ammanatenni] kaajjitine heeꞌraꞌne buuxate kiꞌnenee qonqolchitine laꞌe; kiꞌnenee fonqoltine laꞌe.” (2 Qorontoosi 13:5) Ikkollana jawaata ammana calla diꞌꞌikkitanno. Yihowaranna roduuwinkera noonke baxillino lexxanno gede assiꞌra hasiissannonke. Phaawuloosi togo yiino: “Egenno baala heedhuerono, ilaalla darginni kayissanno geeshshi ammana heedhuerono, baxillu hoogiero kayinni haafaho.”—1 Qorontoosi 13:1-3.

16. Sheexaanu mayine hendammora hasiꞌranno?

¹⁶ Sheexaanu, Yihowa hagiirsiisa horo didandiineemmo yine hendammora hasiꞌranno. Isi hexxo  mudhinammoranna qarranke tira dandaannohu nookkihu gede assine hendammora hasiꞌranno. Qoleno ammanate roduuwanke ammannammora, hattono hagiirraamma ikkinammora dihasiꞌranno. (Efesooni Sokka 2:2) Sheexaanu, wolqa gantanno hedo gawajjitankeranna Maganu ledo noonke jaalooma huntara dandiitannota afino. Yihowa togoo hedo gargadha dandiineemmo gede hexxo uyinonke.

17. Hexxo kaaꞌlitannonkehu hiittoonniiti?

¹⁷ Qullaawu Maxaafi 1 Teselonqe 5:8te aana hexxonke olamaasine umoho wodhitanno gullee ledo taashshanno; tini gullee “gatote hexxooti.” Yihowa uyinonke hexxo surrenke agartanno; hattono wolqa gantanno hedo qeelate kaaꞌlitannonke.

18, 19. Hexxo Yesuusa jawaachishshinosihu hiittoonniiti?

¹⁸ Yesuusira noosi hexxo jawaatanno gede kaaꞌlitinosi.  Isi uullate aana heeꞌrino heeshshora jeefote hashsha, lowo qarri iillinosi. Muli jaalisi sayise hirinosi. Wolu isinni diegennoommo yee kaadinosi. Wolootu qolte hunte xooqqinosi. Gobbasi manni giwinosi, hattono iso sunte shinanni gede xaꞌmiꞌrino. Isi konne qarra baala qeelanno gede mayi kaaꞌlinosi? “Isi albasiinni noo hagiirri daafira yee, shollinye waajjikkinni masiqalu [“qarru haqqi,” NW] aana ree, ayirradu Maganu barcimira qiniiteenni ofollino.”—Ibiraawoota 12:2.

¹⁹ Yesuusi ammanaminoha ikkiro Annisi ayirrannotanna Sheexaanu kaphaancho ikkinoti leeltannota afino. Tini hexxo hagiidhanno gede assitinosi. Qoleno Yesuusi shiima yanna gedensaanni iimira haꞌre Annisi ledo xaadannota afino. Tini hexxo cincanno gede kaaꞌlitinosi. Yesuusi gede ninkeno, hexxonke aana illachisha hasiissannonke. Hexxo aye geeshshi qarri iillinkerono cincineemmo gede kaaꞌlitannonke.

20. Dancha lao heedhannohe gede mayi kaaꞌlannohe?

 ²⁰ Yihowa ammanakkinna cincakki afino. (Isayaasi 30:18; Milkiyaasi 3:10 nabbawi.) Isi “wodanikki halcho wonshannohe.” (Faarso 37:4) Konni daafira, hexxokki aana illachishi. Sheexaanu hexxo mudhattoranna Yihowa eino qaali woꞌmannota huluullamattora hasiꞌranno. Ikkollana gara ikkitinokki hedo hexxo mudhatto gede assitahera wodhitooti! Yihowa eino qaale albi geeshsha ammana hoogattoha ikkiro, isi kaaꞌlannohe gede huucciꞌri. Filiphisiyusi Sokka 4:6, 7 togo yitanno: “Baalunku coyira galaxxitinanninna huuccidhinanni hasidhinoonni coye Maganoho kuꞌle ikkinnina, mittu coyirano yaaddinoonte. Mannu hedora aleenni ikkinohu Maganu keeri, Kiristoosi Yesuusinni wodanaꞌnenna hedoꞌne agaranno.”

21, 22. (a) Yihowa uullate hedinori maati? (b) Maa assate murciꞌrootto?

²¹ Albankeenni noota dhagge ikkitanno yanna ganyite hedi. Muli yannara mannu baalunku Yihowa magansiꞌranno. (Yohaannisi Ajuuja 7:9, 14) Hanni haaro alamera hiittoo heeshsho heeꞌneemmoro hedi. Tini taalle nookki heeshshooti! Sheexaanunna agaanintesi, hattono bunshe baala baꞌanno. Hatte yannara didhiwamatto, hattono direyatto. Hatteentenni, barru baala goxichunni jawaattenna hagiidhitanni kaꞌꞌatto. Mannu baalu uulla gannate assate mitteenni loosanno. Baalunku manni dancha sagale afiꞌranno; hattono teese heeꞌranno. Hatte yannara mannu godowa kaajjadonna finqila diꞌꞌikkanno; hatteentenni mimmitoho shaqqille leellishanno. Uullate aana heedhannori mannu ooso baalanti “Maganu oosota ayirrinyu wolapho” afidhanno.—Roomu Sokka 8:21.

²² Yihowa lubbote jaalasi ikkattora hasiꞌranno. Konni daafira barru baala Yihowara hajajamatenna isiwa albinni roore gamba yaate dandaamihere baala assi. Ninke baalunku hegerera Maganu baxilli giddo heeꞌno!—Yihuda 21.