KUNI xiwamino manchi dimararsannohe? Suˈmisi Iyyoobiiti; mulesi noo mancho galtesiiti. Ise Iyyoobi mayitanni nooro afootto? ‘Magano xonte reyi’ yitanni no. Togoo coye mayira coyidhuronna Iyyoobi togo buuto xiwaminohu mayiraatiro hanni laˈno.

Iyyoobi Yihowara hajajamannohonna ammanamino manchooti. Isino Kanaˈˈaaninni lowo geeshsha faffinokki gobbara, Ootsira heeˈrino. Yihowa Iyyoobi lowo geeshsha baxannosi; ikkollana mittu iso baxannokkihu no. Hakku ayeetiro afootto?

Sheexaane Daawuloosiiti. Sheexaanu Yihowa giwannoha busha sokkaancho ikkasi qaagi. Addaaminna Heewani Yihowara hajajantannokki gede assa daandiino; hattono manna baala maganoho hajajamannokki gede assa dandaannoha lawinosi. Ikkollana hatto assa dandiino? Didandiino. Xaa geeshsha nafa ronsoommore ammanantino labballonna meento qaagi. Ayeeoo qaagatto?

Gibitsete gobbara Yaaqoobinna Yooseefi reyitu gedensaanni, uullate aana heeˈranno manninni roore ammanaminohu Iyyoobiiti. Yihowa Sheexaanu manna baalanka busha assa dandaannokkita afanno gede assa hasiˈrinohura Sheexaane, ‘Iyyoobi lai. Anera mageeshsha ammanaminoro lai’ yiisi.

Sheexaanuno, ‘Ammanaminoha ikkinohu mulla ikkikki ati maassiˈroottosihuranna danchuri woˈminosihuraati. Ikkollana kuri haadhe hoolittoro xonannohe’ yee moromi.

Konni daafira Yihowa togo yii: ‘Hadhe noosire baala gudi. Iyyoobi aanano assattora hedootto bunshe baala assi. Hanni xonannoetanna teˈee laˈneemmona. Kayinnilla shaattosira dandaattokkita afi.’

Sheexaanu umo, mannu Iyyoobi saadanna gaallasi mooranno gedenna gereewisi reyaanno gede assi. Hakkiinnino hombobalattetenni tonne labballo oososinna seenne oososi shii. Qoleno Iyyoobi togo ikke buuto xiwamanno gede assi. Iyyoobi lowo geeshsha sheti. Iseraati galtesi, ‘Magano xonte reyi’ yitinosihu. Ikkollana Iyyoobi Magano dixonino. Qolteno sasu suˈmu jaallasi marte Iyyoobi Maganoho hajajama hoogino daafira xiwamino gede kultusi. Ikkeennano Iyyoobi Maganoho ammanaminoha ikke heeˈri.

Tini Yihowa hagiirsiissusi; qoleno koye misilete aana leellannonte gede, Yihowa gedenaanni hige Iyyoobi maassiˈrisi. Xiwanisinnino hursisi. Qoleno Iyyoobi wole 10 xumuulle ooso ili; saadasi, gereewisinna gaallasi bashshonni lame ero ikkitu.

Atino Iyyoobi gede ayeewoteno Yihowara ammanamoottoha ikkatto? Ammanamoottoha ikkittoro Yihowa maassiˈrannohe. Woˈma uulla Edenete kaashshu base gede biifado ikkitanno wote, ise aana hegerera heeˈratto.