LOOXINNA maatesi wosiilisi Abirahaami ledo mitteenni Kanaˈˈaani gobbara heedhu. Mitto barra Abirahaami Looxi, ‘Kowiichcho saadankera ikkitanno base dino. Eeggatena baxxino. Ati mitto raga haˈrittoro, ani wole raga haˈreemmo’ yii.

Looxino gobba baala lai. Hakkiinnino, saadasira ikkitanno hayissonna wayi noota dancha base afiˈri. Tini base Yordaanoosi Awuraajjaati. Looxi maatesinna saadasi ledo hakkiira haˈri. Yannate gedensaanni, Soddoomu katamira mine miˈne maatesi ledo heeˈri.

Soddoomu manni lowo geeshsha bushuulleho. Looxi dancha mancho ikkinohura, tini bunshensa dadillissusi. Maganuno Looxinte gede dadillino. Yannate gedensaanni Maganu, Soddoomanna qooxeessaho nooha Gomooru katama bunshensa daafira hunara kainota Looxira kultara lame sokkaano soyi.

Sokkaano Looxi, ‘Rahi! Galtekkinna lamente meya oosokki ledo kawiinni fuli!’ yitusi. Looxina maatesi dunkituta, sokkaano anga amadde katamunni fushshitunsa. Lamanku sokkaanchi giddo mittu, ‘Lubboˈnera xooqqe! Badheeggine laˈinoonte. Reyitinannikki gede ilaalla xooqqe’ yiinsa.

Looxinna meyaa oososi hajajante Soddoomunni fultu. Taxxi nafa diyitino; badheeggeno dilaˈino. Looxi galte kayinni dihajajantino. Looxinna maatesi Soddoomunni fulte shiima geeshsha hadhu gedensaanni, ise agurte badheegge laˈu. Hakkunni gedensaanni Looxi galte maxinete kincho ikkitu. Kuneeti ise misilete aana laitto?

Tenne xaggenni dancha roso ronseemmo. Maganu isira hajajantannore gatisanno; isira hajajantannokkiri kayinni heeshshonsa hoogganno.