MANNU duuchchunkura aliidi wolqaataamo ikkino manchi ayeetiro afootto? Saamsooni yinanni mesaafintichchooti. Saamsooni wolqaataamo ikkanno gede assinohu Yihowaati. Saamsooni ilamikki nafa Yihowa amasira togo yee kulino: ‘Mulenni qaaqqo ilatta. Qaaqquno Isiraeele Filisxeemete anganni gatisanno.’

Filisxeeme Kanaˈˈaani gobbara heedhanno bushuulle mannaati. Insara lowo wottaaddari noonsa; konni daafira Isiraeele lowo geeshsha gawajjitanni no. Mitto barra Saamsooni Filisxeeme heedhannowa haˈranna, doobbiichchu ittananni isiwa hige dayi. Saamsoonino doobbiichcho mullichcho anganni shii. Xibbunni kiirannire bushuulle Filisxeemeno shiino.

Gedensaannino Saamsooni mitte Daliila yinanni mancho baxi. Mittu mittunku Filisxeemete massagaano Daliila, Saamsooni togo wolqaataamo assinori maatiro kultunsaro, 1,100 birra uyitasera qaale eˈu. Daliilano konne woxe baala adha halchitu. Tini mancho Saamsoonirano ikko Maganu mannira addu jaala diˈˈikkitino. Konni daafira Saamsooni wolqaataamo assinosiri maatiro kulannose gede xaˈmitanni qarrissu.

Gedensaannino Daliila, Saamsooni wolqaataamo assinosire kulannose gede assitu. Isino, ‘Dananchoˈya meende diegenninoonni’ yiise. Qoleno, ‘Ilamummo yannanni kayise Maganu, Naaziretete mancho yinanniha addi soqqamaanchosi ikkeemmo gede doorinoe. Dananchoˈya meendiro wolqaˈya baˈanno’ yiise.

Daliila tenne affuti, Saamsooni giwoodisera goxanno gede assitu. Hakkiinnino mitto mancho woshshite dananchosi meedisiissu. Saamsooni goxinowiinni baqqi yaanno wote, wolqasi baˈe kaˈino. Filisxeemeno dagge amaddusi. Insa lamenta illesi fushshite, borojjichchonsa assidhusi.

Mitto barra Filisxeemete mannooti Daagooni yinanni maganonsa magansiˈrate lowo jila jiltu; Saamsoonino osoˈlitasira hakka massitu. Hatte yannara Saamsooni dananchi galagale lophphe no. Saamsoonino anga amade massagannosi beetto, ‘Mine amaddino heelliichcho amaxxeemmo gede assie’ yii. Hakkiinnino Saamsooni Yihowa wolqa aannosi gede huucciˈre, heelliichcho amaxxi. Qoonqosi naggi asse, ‘Filisxeemete ledo reemmo’ yii. Jilu aana 3,000 Filisxeemete manni no; Saamsooni umo heeshshi yee heelliichcho xiiwita, minu uwe konne busha manna baala gudi.