YESUUSI kuneeti qaaqqo hanqafe noota lai. Yesuusi qaaqquulle lowo geeshsha baxannota konninni afa dandaatto. Iso laˈanni noori hawaariyaatesiiti. Yesuusi insa mayyaanni no? Yaanni noore hanni laˈno.

Yesuusinna hawaariyaatesi seeda doogo hadhe daggino. Doogo daggu wote hawaariyaatesi insa insaneewa heewisantanni daggino. Dagguhu gedensaanni Yesuusi, ‘Wona doogote heewisantinannihu maahooti?’ yee xaˈminsa. Ikkollana insa heewisantinohu maahootiro isi afino. Hatto yee xaˈminonsahu kayinni kultannosironna teˈee afaraati.

Hawaariyaatesi doogote, ‘Ninke giddo roorannohu ayeeti?’ yitanni heewisantino daafira sammi yitu. Mite mite hawaariyaate wolootaho aliidire ikka hasidhino. Aliidiha ikkate hasiˈra gara ikkitinokkita Yesuusi hiittoonni kulinsakka?

Yesuusi shiima qaaqqo woshshe, albansaanni uurrisi. Hakkiinnino rosaanosi togo yii: ‘Hedoˈne soorra hoogginironna qaaqquullu gede ikka hoogginiro, Maganu mangiste dieˈinanni; tenne affinara hasiˈreemmo. Maganu mangiste giddo aliidiha ikkannohu konni qaaqqi gedeeho.’ Yesuusi togo yiinohu mayiraatiro afootto?

Shiimu qaaqqi wolootaho rooriidiha woyi aliidiha ikkate dihasiˈranno. Konni daafira hawaariyaatesi konni garinni qaaqquullu gedeere ikka hasiissannonsa. Qoleno wolootaho aliidiha woyi rooriidiha ikkate heewisama dihasiissannonsa.

Yesuusi shiimmaadda qaaqquulle baxannota leellishinoti wole yannano no. Agannate gedensaanni, mitu manni qaaqquullensa Yesuusiwa abbi. Hawaariyaatesi qaaqquulle daannota hooltara kaˈu. Yesuusi kayinni hawaariyaatesi togo yiinsa: ‘Qaaqquullu anewa dayona agurre, hooltinoonte; korkaatuno Maganu mangiste eˈannori insa gedeereetina.’ Hakkiinnino Yesuusi qaaqquulle hanqafe maassiˈrinsa. Yesuusi shiimmaadda qaaqquulle baxannota afa dihagiirsiissanno?