HAWAARIYA PHAAWULOOSI ledo noohu kuni wedellichchi Ximootewosiiti. Ximootewosi ayiddisi ledo Lisxiraho heeˈranno. Amasi suˈmi Ewunqeeti; ahaahesi suˈmi kayinni Loyidaati.

Phaawuloosi Lisxira haˈranna tini sayikkite. Mitto diro meddi yitanno yanna albaanni, Phaawuloosinna Barnabaasi farcidhanni hakka martino. Xa kayinni Phaawuloosi Sillaasi ledo galagale hakka marino.

Phaawuloosi Ximootewosi mayyaanni nooro afootto? ‘Sillaasinna ane ledo haˈra baxatto? Fafo gobbara noo mannira farciˈra kaaˈlattonkena’ yaanni no.

Ximootewosino, ‘Ee, haˈra baxeemmo’ yii. Hakkiinnino Ximootewosi ayiddesi agure, hakkawotenni Phaawuloosinna Sillaasi ledo haˈri. Insa haˈrinshore ronsammora albaanni, Phaawuloosira mayi qarri iillinosiro hanni laˈno. Phaawuloosi Demaasqo haˈranna Yesuusi leellisinkunni 17 diro ikkino.

Hakkawote Demaasqo haˈrinohu Yesuusi rosaano gawajjara ikkinota qaagi; xa kayinni isi umisi Yesuusi rosaanchooti! Gedensaannino, gama diinna Phaawuloosi Yesuusire farciˈrannota gibbino daafira shitasira hasidhu. Ikkollana rosaano Phaawuloosi reyotenni gatanno gede kaaˈlitusi. Iso qafichchote worte katamu huxxira gobbaanni dirrissu.

Gedensaannino Phaawuloosi farciˈrara Antsookiya haˈri. Umo Yesuusi rosaano Kiristaanaho yinoonnihu hakkooti. Hakkiinnino Phaawuloosinna Barnabaasi Antsookiyunni fushshine wole faffe noo gobbara farcidhanno gede sonki. Insa hadhino gobba giddo mitte, Ximootewosi heeˈrinote Lisxiru gobbaati.

Phaawuloosi mitto diro meddi yitanno yanna gedensaanni, layinki farciˈrote haˈrinshosira galagale Lisxira mari. Ximootewosi Phaawuloosinna Sillaasi ledo haˈri wote, mitteenni hiikka hadhuro afootto? Misilete aana noo kaarta laˈeenna, hanni insa hadhino bayichchi giddo gama laˈno.

Umo, lowo geeshsha fafinokkiha Iqooniyoni yinanni katama hadhu; hakkiinnino layinki katama Antsookiya iillitu. Hakkunni gedensaanni, Xiroaada yinanniwa hadhu; hakkiinnino Filiphphisiyusi, Teselonqenna Beeriyu katama hadhu. Kaartu aana Ateena yinanni katama laitto? Phaawuloosi hakko katamirano farciˈrino. Hakkunni gedensaanni Qorontoosi katamira farcidhanni mitto dironna darate keeshshitu. Gedensaannino Efesooni katamira shiima yanna keeshshitu. Hakkiinnino yowolotenni galagalte Qeesaariya marte, Antsookiya hadhu; Phaawuloosino hakko heeˈri.

Konni garinni, Ximootewosi “dancha duduwo” duduwatenna haammata Kiristaanu songo kalaqate Phaawuloosi kaaˈlanni lowo kume kiilomeetire ikkitanno doogo haˈrino. Ati lowoha ikkittoro, Ximootewosi gede Maganoho ammanamootto soqqamaancho ikkatto?