PHEEXIROOSINNA Yohaannisi Yesuusi reeshsha madaarroonniwiinni hadhuhu gedensaanni, Maariyaami callase hakko gattu. Iseno wiˈlitu. Hakkiinnino saˈu misilera laittonte gede, heeshshi yite waammate giddora laˈu. Laˈanno wote waammate giddo lame sokkaano no! Sokkaanono, ‘Mayira wiˈlitanni nootta?’ yite xaˈmituse.

Maariyaamino, ‘Mootichchaˈya fushshite adhitino; hiikko wortinorono diafoomma’ yite qoltu. Hatto yite badheegge caaqqi yitanno wote, mittu manchi no. Manchuno, ‘Aye hasidhanni nootta?’ yee xaˈmise.

Maariyaami kuni manchi gate agadhe noo mancho lawinose; Yesuusi reeshsha adhinohuno iso lawinose. Konni daafira togo yitusi: ‘Ati haaroottoro, eeggatena woroottowa kulie.’ Kuni manchi kayinni Yesuusaati. Isi Maariyaami affinokki biso uddirino. Maariyaami isi suˈmase gane woshshiseta kayinni, Yesuusa ikkinota affu. Iseno doddanni marte, ‘Mootichchawe afumma!’ yite rosaanote kultu.

Hakko barra lamu rosaano Eemahusi yinanni qachcha hadhanni heedhe mittu manchinni xaaddu. Insano Yesuusa shinoonni daafira lowo geeshsha dadillite no. Mitteenni hadhanna kuni manchi Qullaawu Maxaafinni jawaachchishannore kulinsa. Gedensaanni kayinni sagale ittara fooliishshidhuti, kuni manchi Yesuusa ikkinota affu. Hakkiinnino Yesuusi maaxaminsa; kuri lamu rosaano kayinni tenne hawaariyaatete kultara galagalte Yerusaalame higgu.

Insa higganni doogote heedheenna, Yesuusi Pheexiroosirano leelli. Wolootu rosaano tenne macciishshite hagiidhitu. Hakkiinnino kuˈuri lamu rosaano Yerusaalame marte hawaariyaatetenni xaaddu. Insano doogote Yesuusi leellinonsata kultunsa. Tenne kultanni heedheenna mittu xagge ikkanno coyi kalaqami; hakku coyi maatiro afootto?

Teeˈˈee misile lai. Saanqaho qulfe ganne heeˈneennanni Yesuusi minira eˈˈe leelli. Rosaanono lowo geeshsha hagiidhitu! Hakko barri addinta hagiirsiisannoha diˈˈikkino? Yesuusi konni barrinni rosaanosira meˈˈe hige leellinoro kiirte afatto? Onte hige leellinota kiiritto?

Yesuusi rosaanote leelli wote, hawaariyaatichchu Toomaasi insa ledo dino. Konni daafira rosaano, ‘Mootichchawe anfummo!’ yite kultusi. Toomaasi kayinni illeˈyanni laummokki diammaneemmo yii. Settu barri gedensaanni rosaano xaano qulfe gannoonni mine gamba yitu; hakkawote kayinni Toomaasi ledonsa no. Hedeweelcho Yesuusi minira eˈˈe leelli. Toomaasino xa ammani.