Zakkaariyaasinna Elsaabeexi beetti Yohaannisi lophiti masaalaancho ikkino. Yihowa, Yohaannisi Mesihichu woy Kiristoosi daannota mannaho rosiisanno gede assino. Ikkollana, Yohaannisi xaadu minenna katammate rosiisa agure halalla mare sabbakino. Mannu Yohaannisi rosiisannonsa gede, Yerusaalametenna Yihudu gobba baalatenni dayino. Isi mannu Magano hagiirsiisa hasiꞌriro, busha coye assa agura hasiissannonsata rosiisino. Lowo manni Yohaannisi rosiisinore macciishshe cubbinsara maaro eino; hakkiinni Yohaannisi insa Yordaanoosi Lagira cuuino.

Yohaannisira gariri dinosi. Isi gaalu ordanni loonsoonni uddano uddiꞌranno; hattono kanchafarenna dubbu malawo itanno. Mannu Yohaannisi daafira afa hasiꞌrino. Booꞌnaleeyye Farisootunna Saduqootu nafa iso laꞌara martino. Yohaannisi insara togo yii: ‘Bushare assa agurtine maaro eꞌe. Abirihaami annankeeti yitinoonni daafira calla gattinanniha lawoonkeꞌne. Isi ooso ikkitinoonni daafira calla, Maganu ooso ikka didandiitinanni.’

Lowo manni Yohaannisiwa daye, ‘Magano hagiirsiisate maa assa hasiissannonke?’ yee xaꞌmanno. Yohaannisi Ayihudete mannira, ‘Lame uddano afiꞌrinohu mitte hooginohura oo’ yiino. Isi hatto yiinohu mayiraatiro afootto? Isi, harunsaanosi Magano hagiirsiisate manna baxa hasiissannonsata affara hasiꞌrino.

Yohaannisi qaraxaasinete togo yiino: ‘Ammanantinoonnire ikke; hattono manni woxe sayissine adhitinoonte.’ Isi olantote, ‘Manni woxe wolqatenni woy doggine adhitinoonte’ yiinonsa.

 Kakkalaanonna Leewaawootu Yohaannisiwa marte togo yite xaꞌmitu: ‘Ati ayeti? Mannu baalu ati ayetiro afa hasiꞌrino.’ Yohaannisi togo yee qolinsa: ‘Masaalaanchu Isayaasi yiinonte gede, ani mannu Yihowawa higanno gede halalla mare lallawanno manchi huurooti.’

Mannu Yohaannisi rosiisinonsare lowo geeshsha baxino. Lowo mannira Yohaannisi Mesihicha lawinonsa. Isi kayinni togo yiinsa: ‘Ane rooru daanni no. Ani isira caammisi maasara nafa tirate diꞌꞌikkoommo. Ani wayinni cuueemmoꞌne. Isi kayinni qullaawu ayyaaninni cuuannoꞌne.’