Yihowa Abirihaaminna Yisihaaqi towaatinonte gede, Yaiqoobino towaateemmohe yiinosi. Yaiqoobi Kaaraani yinanni gobbara heeꞌrino; isi hakko seenne adhe lowo ooso ilino, qoleno dureessa ikkino.

Gedensaanni Yihowa Yaiqoobi, “Gobbakki higi” yiisi. Konni daafira Yaiqoobinna minisi manni gobbansa higate seeda doogo haꞌra hanaffu. Insa hadhanni doogote heedheenna soqqamaasinesi Yaiqoobiwa dagge togo yitusi: ‘Rodiikki Eesawu atewa daanni no, ledosino 400 manni no!’ Yaiqoobi Eesawu isonna minisi manna gawajjannoha laweennasi waajji. Hakkiinni Yaiqoobi Yihowa, “Rodiiꞌya Eesawu anganni gatisie” yee huucciꞌri. Layinki barra Yaiqoobi Eesawura lowo geꞌreewo, meꞌꞌe, lalo, gaalanna harre soyisi.

Hakko hashsha Yaiqoobi callisi heeꞌre Maganu sokkaasincho lai! Isi sokkaasinchu ledo sharrama hanafi. Lamunku sooda geeshsha sharrantanni galtu. Yaiqoobi sokkaasinchu ledo sharramanna luqqeetto darginni kaꞌusi; kayinni isi sharrama diagurino. Sokkaasinchu Yaiqoobi ‘Haꞌreemmona agurie’ yiisi. Yaiqoobi kayinni ‘Maassiꞌrittoekki diagureemmohe’ yii.

Hakkiinni Maganu sokkaasinchi Yaiqoobi maassiꞌrisi. Konni daafira, Yaiqoobi Yihowa Eesawu gawajjasira wore laꞌꞌannokkita huwati.

Hakko soodo Yaiqoobi rodiisi Eesawu 400 manna hoodete adhe isiwa daanna lai. Yaiqoobi minisi manni badheenni heeꞌreenna isi alba  hige haꞌre rodiisi albaanni lamala hige heeshshi gotti yaanni daae yii. Eesawuno dodanni mare Yaiqoobi hanqafe daae yiisi. Lamunku hururante wiꞌlite araarantu. Yihowa Yaiqoobi rodiisi ledo araaraminohura mageeshshi geeshsha hagiidhinoha lawannohe?

Hakkiinni Eesawu qaesi higi; Yaiqoobino gobbasi haꞌri. Yaiqoobi 12 labballo ooso ilino. Suꞌminsa Roobeeli, Simiooni, Leewi, Yihuda, Daani, Nifitaaleemi, Gaadi, Aseeri, Yisaakoori, Zaabilooni, Yooseefinna Biiniyaamiiti. Yihowa Yaiqoobi beetti Yooseefi mannasi gatisanno gede assino. Yihowa togo assinohu hiittoonniitiro afootto? Tenne daafira aante noo xaggera ronseemmo.