Muse Israeelete manna lowo diro massagi gedensaanni geedhi. Hakkiinni Yihowa Muse togo yii: ‘Israeelete manna Hexxote Gobba haadhe haꞌrattohu diateeti. Kayinni hattee gobba laꞌꞌatto gede fajjeemmohe.’ Muse Yihowa Israeele massagannoha haaro massagaancho dooranno gede xaꞌmiꞌri. Yihowa Muse togo yii: ‘Iyyaasuwa marte, iso massagaancho asse dooroommota kulisi.’

Muse Israeelete dagara isi mulenni reyannota kulinsa; hattono Yihowa insa Hexxote Gobba haaꞌre haꞌranno gede Iyyaasu doorinota kulino. Muse Iyyaasu woyite togo yii: ‘Yihowa kaaꞌlannohena waajjitooti.’ Shiima yanna gedensaanni Muse Nebo yinanni ilaali birxe fuli; hakkiicho Yihowa Abirihaamira, Yisihaaqiranna Yaiqoobira eemmoꞌne yiino gobba leellishisi. Muse 120 dirisinni reyino.

Yihowa Iyyaasu togo yii: ‘Xa kaꞌine Yordaanoosi Laga tayissine saꞌine Kanaani gobba hadhe. Muse kaaꞌlummonte gede ateno kaaꞌleemmohe. Seeraꞌya barru baala nabbawi. Waajjitooti. Jawaati. Haꞌratto darga baalaho ani assi yeemmohere calla assi.’

 Iyyaasu Iyyaarkote katama qottanno gede lame qotaano soyi. Aante noo xaggera hakko mayi ikkinoro lende ronseemmo. Insa Iyyaarkote kataminni higgu woyite, hatti yanna Kanaani gobba haꞌrate dancha ikkitinota coyidhino. Layinki barra, Iyyaasu Israeelete daga dunkaanansa adhite hadhanno gede kulinsa. Hakkiinni Iyyaasu Gondooru Taawoota dukke mannu albaanni Yordaanoosi Lagiwa hadhanno gede woyite kakkalaasine soyi. Martanno woyite lagu woꞌme daadanni no. Ikkollana kakkalaasine wayi giddora eꞌanni heedheenna, wayi lolaha aguri; laguno mooli. Kakkalaano, Israeelete manni baalu waa tayise saꞌꞌa geeshsha wayi giddo moola baatto aana uurritu. Israeele tenne maalale laꞌu yannara, Yihowa Duumu Baari aana loosino maalale qaagginoha dilawannohe?

Yannate gedensaanni, Israeele Hexxote Gobba eꞌu. Insa hakko minenna katama miꞌna dandiitanno. Gate loosiꞌra, woyinenna laalo kayisiꞌrano dandiitanno. Hatti adonna malawu lolahanno gobbaati.