1, 2. Ateneeto mayite xaꞌma hasiissannohe? Tini hasiissannota ikkitinohu mayiraati?

 QULLAAWA MAXAAFA xiinxallakkinni, Magano magansiꞌneemmo yaannohu batinyu manni isi giwannore assanni woy rosiisanni noota huwatootto. (2 Qorontoosi 6:17) Yihowa kaphu ammaꞌno woy “Bayira Baabiloone” giddonni fulleemmo gede hajajinonkehu iseraati. (Yohaannisi Ajuuja 18:2, 4, NW) Ikkina maa assate hedootto? Ninke baalunku mitte doodha hasiissannonke; konni daafira ninkeneeto togo yine xaꞌma hasiissannonke: ‘Magano isi hasiꞌranno garinni magansiꞌra hasiꞌreemmonso, ani rosoommo garinni calla magansiꞌreemmo?’

² Kaphu ammaꞌno giddonni fulte kaoottoha ikkiro, hatti danchate. Ikkollana xaano ikkiro baxisannohehu kaphu ammaꞌno rosichi woy ayyaani nooha ikkara dandaanno. Hanni kuri giddo gamu hiikkuriitiro laꞌno; qoleno togoo assoote Yihowa laꞌꞌanno garinni laꞌꞌa hasiissannonkehu mayiraatiro ronseemmo.

3. (a) Mitu mannira magansiꞌrate misilla horoonsiꞌra agura qarra ikkitannonsahu mayira ikkara dandaanno? (b) Magano magansiꞌrate misilla horoonsiꞌrate daafira Qullaawu Maxaafi mayyaanno?

³ Mitu manni seeda diro Magano magansiꞌrate misile woy mininsa giddo qullaawa darga qixxeessiꞌre horoonsiꞌranni keeshshino. Aterano togoori nooheha ikkiro, insa nookkiha Magano magansiꞌra wosincho coye woy soꞌro labbahera dandiitanno. Ikkirono, magansiꞌneemmosi gara kulannonkehu Yihowa ikkinota qaagi. Qullaawu Maxaafi, Yihowa magansi ꞌneemmosi yannara misilla horoonsiꞌnammora hasiꞌrannokkita kulannonke.—Fulo 20:4, 5 nabbawi; Faarso 115:4-8; Isayaasi 42:8; 1 Yohaannisi 5:21.

4. (a) Albi annuwanke magansiꞌra hasiissannonkekkihu mayiraati? (b) Yihowa mannisi reyino manna hasaawisate woꞌnaalannokki gede hajajinohu mayiraati?

⁴ Mitu manni reyino fiixansa hagiirsiisate lowore assanno. Lawishshaho annuwate xorshiꞌranno. Isinni insa magansiꞌrate geeshsha nafa iillanno. Ikkollana reyino manni kaaꞌlankera woy gawajjankera dandaannokkita ronsoommo. Reyino manni wolewa haꞌre heeꞌranni dino. Insa hasaawisate woꞌnaala isinni lowo qarra abbitara dandiitanno; mayira yiniro, reyino fiixinke coyiꞌranni nooha lawisse coyidhannori agaanintete. Yihowa Israeelete daga reyino manna hasaawisate woꞌnaaltannokki gedenna wolu agaanintete coyiwiinni xeertidhanno gede hajajinohu konniraati.—Marro 18:10-12; Jeefote Hedo 26 nna 31 lai.

5. Magano magansiꞌrate misilla horoonsiꞌra woy albi annuwakki magansiꞌra aguratto gede mayi kaaꞌlahera dandaanno?

⁵ Magano magansiꞌrate misilla horoonsiꞌra woy albi annuwakki magansiꞌra aguratto gede kaaꞌlannoheri maati? Qullaawa Maxaafa nabbawanna Yihowa togoo coye ma garinni laꞌꞌannoro seekkite heda hasiissannohe. Isi togoo coye tiyyire ‘giwanno.’ (Marro 27:15) Togoore Yihowa laꞌꞌanno garinni laꞌꞌatto gedenna isi baxanno garinni magansiꞌrattosi gede kaaꞌlahera iso barru baala huucciꞌri. (Isayaasi 55:9) Kaphu ammaꞌno ledo xaado afiꞌrino coye baalanka hooꞌlatto gede Yihowa hasiissannohe jawaante aannoheta mittoreno huluullantooti.

6. Sadaasa 25 Yesuusi ilamino barraati yine ayirrisate doorroonnihu mayiraati?

⁶ Alame woꞌmate aana Gannu lowo geeshsha egennamino ayyaanaati; qoleno rooru mannira Gannu Yesuusi ilamino  barri ayyaana lawannonsa. Noore coyiꞌniro kayinni Gannu kaphu ammaꞌno ledo xaado afiꞌrinoho. Mittu insayikiloopidiyi, hunda Magano afinokkihu Roomu manni Sadaasa 25 arrishsho ilantino barraati yee ayirrisannota kulanno. Hatte yannara, Beetekiristaanete murrooti Magano afinokki manni Kiristaana ikkara hasidhino; hakko daafira Yesuusi ilaminohu Sadaasa 25nni ikka hoogirono konne barra Yesuusi ilamino barraati yite ayirrisa hanaffino. a (Luqaasi 2:8-12) Yesuusi rosaano Ganna diayirrissino. Mittu maxaafi yaanno garinni, Yesuusi ilami gedensaanni noohu 200 diri giddo, “isi ilamino barra bade afinonku dino; qoleno tenne afa hasiꞌrinohu hakkeeshshi geeshsha dino.” (Sekriidi Orijiinsi ofi Pirofawundi Tingsi) Mannu Ganna ayirrisa hanafinohu Yesuusi uullate aana heeꞌrihunni lowo xibbi diri gedensaanniiti.

7. Addu Kiristaani Ganna ayirrisannokkihu mayiraati?

⁷ Gannu ayyaanira kaimu Magano afinokki manna ikkinota, hattono konni ayyaanira assinanniri lawishshaho, sagale qixxeessanna mimmitoho mitore aa insawiinni dagginota lowo manni afino. Lawishshaho, Gannu Magano afinokki manni abbinoha ikkinohura Ingilizetenna mite Ameeriku gobbuwara konne ayyaana ayirrisa hoolloonni yanna no. Hatte yannara konne ayyaana ayirrisannoha qorichinshanni. Gedensaanni kayinni mannu wirro Ganna ayirrisa hanafi. Ikkina addu Kiristaani Ganna ayirrisannokkihu mayiraati? Assanno coyi woꞌmunkunni Magano hagiirsiisa hasiꞌranno daafiraati.

8, 9. Hundi Kiristaani ilamino barra ayirrisinokkihu mayiraati?

⁸ Lowo manni ayirrisannohu wolu egennamino ayyaani ilamino barraati. Kiristaanu ilamino barra ayirrisa hasiissannonsa? Qullaawu Maxaafi giddo ilantino barra ayirrissinota  kulloonniri Yihowa magansidhannokki manna callaati. (Kalaqama 40:20; Maarqoosi 6:21) Hunda mannu ilamino barra ayirrisannohu kaphu magannara ayirrinye aateeti. Hundi Kiristaani “aye manchihano ilamino barra ayirrisa Magano afinokki manni budeeti” yee ammanannohu iseraati.—Ze Worldi Buuki Insayikiloopidiya.

⁹ Hunditi Roomunna Giriikete daga, mittu manchi ilamanno wote mittu ayyaani daannotanna hakku ayyaani hakkonne mancho heeshshosi diro woꞌma agarannosi yite ammantanno. Kiristaana ikkinokkihu hakkawari manni ilammoonni barra ayirrisannohu, konne assa magannansa ilamino barra ayirrinsanni mancho agartanno gede assitanno yee hedanno daafiraati.

10. Yannankera Kiristaanu ilamino barra ayirrisannokkihu mayiraati?

¹⁰ Yihowa kaphu ammaꞌno ledo xaado afidhino ayyaanna ayirrinsannita baxannoha lawannohe? (Isayaasi 65:11, 12) Dibaxanno. Ilammoommo barra woy kaphu ammaꞌno ledo xaado afidhinota wole ayyaanna ayirrinseemmokkihu iseraati.

11. Mitu manni ayyaana ayirrisannohu mayiraati? Ati roorsiꞌra hasiissannohe coyi maati?

¹¹ Mitu manni Gannu woy wolu ayyaani Magano afinokki manniwiinni dayinoha ikkinota afinoha ikkirono, tenne ayyaanna ayirrisa diagurino. Kuni manni ayyaana ayirrisa maatete ledo hagiidhate dancha faro fantanno yee hedanno. Aterano hatto lawannohe? Maatete ledo hagiidhinanni yanna sayisa bunshe diafidhino. Maate kalaqinohu Yihowaati; qoleno isi mininke manni ledo dancha aante heedhankera hasiꞌranno. (Efesooni Sokka 3:14, 15) Ikkollana, kaphu ammaꞌno ayyaanna ayirrinse fiixanke hagiirsiisantenni Yihowa ledo dancha jaalooma kalaqiꞌra roorsiꞌra hasiissannonke. Soqqamaasinchu Phaawuloosi togo yiinohu iseraati:  “Mooticha hagiirsiisanno coyi maatiro buuxxine affe.”—Efesooni Sokka 5:10.

12. Yihowa giwanno ayyaanna hiikkuriiti?

¹² Batinyu manni ayyaanu kaima heda hakkeeshshi geeshsha dihasiissanno yee hedanno; Yihowa kayinni hatto yee dihedanno. Yihowa kaphu ammaꞌno ledo xaado afidhinota woy manna woy mitte gobba guwisate ayirrinsanni ayyaanna giwanno. Lawishshaho, hundihu Gibitsete manni kaphu magannansa guwisate yee ayirrisannohu batinyu ayyaani no. Israeelete daga Gibitsetenni fultuhu gedensaanni, Gibitsete daga ayyaanna giddo mitto adhite “Kaaliiqi ayyaanaati” yite suꞌma fushshitino. Ikkollana konne assitinohura Yihowa qorichishinonsa. (Fulo 32:2-10) Masaalaanchu Isayaasi yiinonte gede, “batte ikkinore [kisa]” horonta dihasiissannonke!—Isayaasi 52:11 nabbawi.

13. Ayyaanna ayirrisa aguratto wote hiitti xaꞌmuwa kalaqantahera dandiitanno?

¹³ Ayyaanna ayirrisa aguratto wote, duucha xaꞌmo kalaqantahera dandiitanno. Lawishshaho: Ledoꞌya loosanno manni Ganna ayirrisattokkihu mayiraati yiiero mayyeemmo? Mittu manchi ayyaanaho mitore uyiero hiitto asseemmo? Galteꞌya ayyaana ayirrinsammora hasidhuro ma asseemmo? Oosoꞌya ayyaana woy ilantino barra ayirrisa hoogansanni gate bainonsari noohu gede assite heddannokki gede maa assa dandeemmo?

14, 15. Mittu manchi ‘Hawalle keere iillishihe’ yiihero woy ayyaanaho mitore uyihero maa assa dandaatto?

¹⁴ Mitte mittente yannara mayite qolattoronna maa assattoro afate coye heeshshi gotti assite heda hasiissannohe. Lawishshaho, mittu manchi ‘Hawalle keere iillishihe’ yiihero, afoottokkiha labbe saꞌooti. “Galateemmohe” yite qola dandaatto. Ikkollana mittu manchi lede afa hasiꞌrannoha ikkiro, ayyaana ayirrisattokkihu mayiraatiro kulattosira dandaatto.  Ikkirono woꞌmanka wote shaqqillunni, hayyotenni, hattono ayirrinyunni coyiꞌri. Qullaawu Maxaafi togo yaanno: “Mittu mittunkura labbanno dawaro qola dandiitinanni gede, coyiꞌne woꞌmanka woyite coommannohanna gumu nooha ikko.” (Qolasiyaasi Sokka 4:6) Mannu ledo gamba yite hagiidhanna mimmitoho mitore aa giwattokkita, kayinni tenne ayyaanna yannara konne assa hasiꞌrattokkita kulattora dandaatto.

¹⁵ Mittu manchi ayyaanaho mitore uyiherona? Assa hasiissannonkeha mitto mittonka coye badde kultanno higge Qullaawu Maxaafi giddo dino; ikkirono Maganu Qaali danchu tiiꞌꞌi heeꞌrannonke gede amaalannonke. (1 Ximootewoosi 1:18, 19) Mitore uyihe manchi ayyaana ayirrisattokkita afinokkiha ikkara dandaanno. Woy “Konne ayyaana ayirrisattokkita afoommo; kayinni konne aammohera hasiꞌroommo” yaahera dandaanno. Togoo yannara, uyinohe coye adhattoronna teꞌee ati doodha dandaatto. Doodhattori baxireno ikkiro, dancha tiiakki daafannore doodhattokki gede qorophi. Yihowa ledo noonke jaalooma hunannore horonta assa dihasiꞌneemmo.

16. Minikki manni ayyaana ayirrisa hasiꞌrannoha ikkiro maa assa hasiissannohe?

¹⁶ Minikki manni ayyaana ayirrisa hasiꞌrannoha ikkiro maa assa hasiissannohe? Konni coyira insa ledo yekkeerama dihasiissannohe. Insarano hasidhinore assate qoosso noonsata deꞌooti. Kaajjishshe coyidhooti; qoleno insa ati doodhoottore ayirrissara hasiꞌrattonte gede, insa doodhitinoreno ayirrisi. (Maatewoosi 7:12 nabbawi.) Kayinni minikki manni ayyaanu yannara ledonsa heeꞌrattora hasiꞌrannoha ikkiro, maa assa hasiissannohe? Assattore doodhattora albaanni, gara ikkinore doodhate kaaꞌlannohe gede Yihowa huucciꞌri. Coye heeshshi gotti assite hedi; qoleno tenne hajore  kultanno borro xiinxalli. Woꞌmanka wote hagiirsiisa hasiꞌrattohu Yihowa ikkinota qaagi.

17. Oosokki wolootu ayyaana ayirrissanna laꞌanno wote gate bainonsari noohu gede assite heddannokki gede kaaꞌlattonsara dandaattohu hiittoonniiti?

¹⁷ Oosokki wolootu ayyaana ayirrissanna laꞌannoha ikkiro insa kaaꞌlate maa assa dandaatto? Saꞌe saꞌe insara baxxinore assite woy qixxeessite hagiirsiisattonsara dandaatto. Qoleno heddukkinni mitore hirte aattonsara dandaatto. Oosokkira aattonsara dandaattohu muxxe coyi giddo mitte yannakkiiti.

18. Songote gambooshshe haꞌra hasiissannonkehu mayiraati?

¹⁸ Yihowa hagiirsiisate, kaphu ammaꞌnowiinni, hattono ise ledo xaado afiꞌrino budinna ayyaannawiinni xeertiꞌra hasiissannonke. Kayinni addu magansiꞌra harunsano hasiissannonke. Hiittoonni? Tenne assineemmoti mitte doogo, ganyine songote gambooshshe haꞌrate. (Ibiraawoota 10:24, 25 nabbawi.) Songote gambooshshi Magano magansiꞌneemmo doogooti. (Faarso 22:22; 122:1) Mitteenni gamba yineemmo wote mimmito jawaachisha dandiineemmo.—Roomu Sokka 1:12.

19. Rosoottoha Qullaawu Maxaafi halaale mannaho kula hasiissannohehu mayiraati?

¹⁹ Addu ammaꞌno harunsattota leellishattoti wole doogo, Qullaawu Maxaafinni rosoottore mannaho kulate. Uullate aana bunshe batidhino daafira lowo manni hexxo mudhino. Togoohu ati afootto mannino heeꞌrara dandaanno. Albillittete yanna daafira nooheta hagiirsiissanno hexxo kulinsa. Songote gambooshshe haꞌrattohanna Qullaawu Maxaafi halaale mannaho kulattoha ikkiro, kaphu ammaꞌnonna budese harunsate halchokki baꞌinota huwatatto. Hagiirraamo ikkattotanna Yihowa iso halaalunni magansiꞌra doodhakkinni lowo geeshsha maassiꞌrannoheta addaxxa dandaatto.—Milkiyaasi 3:10.