Sheexaanunna durriissasi konni kaꞌa seeda yannara manna sorisiissanni diheedhanno. Konni albaanni Yihowa iiminni shorre huninonsa. (Ajuuja 12:9) Muli yanna giddo, Maganu Sheexaanenna durriissasi hunannonsa. Soqqamaanchu Yohaannisi Maganuwiinni aamantinosi ajuujanni: ‘Hakkonni gedensaanni qile bale waalchi fanaasinchonna lowo cagaage angasinni amadino sokkaanchi iiminni dirranna afummo. Dhudhuufano amade kumu diri geeshsha usurisi. Kuni dhudhuufino Durriisa, woy Sheexaane yinannihu albi hamashshooti. Kumu diri goofa geeshsha konni kaꞌira daga soꞌrisiisannokki gede, sokkaanchu dhudhuufa qile bale giddora tugi; cufeno malaate malaatisi. Kumu diri gedensaanni shiima yannara tidhama hasiissannosiˈ yiino. (Ajuuja 20:1-3) Hakkonni gedensaanni Sheexaanunna durriissasi hegerera baꞌanno.—Ajuuja 20:10.

Hattonni bushuullu mannino uullate aaninni baꞌꞌanno.—Faarso 37:9, 10; Luqaasi 13:5.

Sheexaanunna durriissa baꞌu gedensaanni Yihowa mannu oosora batinynye atoote aannonsa. Reyitinori heeshshote nookkitanna, affannori nookkita rosoottota qaagatto. Yesuusi, reyo haaqe nookki takkinaatu goxichchi ledo lawisino. (Yohaannisi 11:11-14) Yesuusi togo yinohu reyitinori galagalte heeshshote heedhanno yanna daggannota afinohuraati. Konnira: ‘Waammate giddo noori qaalesi macciishshitanno yanna daggannonaˈ yiino.—Yohaannisi 5:28, 29; Soqqamaanote Looso 24:15 ledo heewisiisi.

Reyitinori kaꞌe heedhannohu tenne uulla aanaati. Hattee yannara mannu reyino yine lassante, reyitinori kaꞌinota egensiisannoha hagiirsiisanno duduwo macciishshinanni! Banxeemmori reyitinori waammate fultanna koyiisa baete hagiirreeti!