Hanni tenne ikkito hedi: Daawiti hashsha xiꞌmu tunsichinni lekkatenni haꞌranni noohu gede assite hedi. Gobba tunsitino daafira, doogo baꞌinosi. Hakko balla isi doogo soꞌrinota huwati. Isira doogo baꞌinosi.

Ati Daawiti ikkoottoro ma assatto?

Haammatu doorshi noohe:

1. Wole manna doogo xaꞌma.

2. Caabbicho hasidhe horoonsiꞌra.

3. Marummowa mare doogo afeemmollana yite sammi yite haꞌra.

Afittonte gede, C Doorshi kaaꞌle yaannori dino.

Umi doorshinni B Doorshi woyyanno. Qoleno caabbicho woy wirsa anga adhite xawisidhanni haꞌra dandaatto daafira haꞌrattowi leellannahe haꞌratto.

Qullaawu Maxaafino konni garinni kaaꞌlannohe!

Kuni maxaaffa baalantenni roore hiramanno maxaafi:

• heeshshokki giddo qarru iillannohe yannara biddishsha ikkannohe

• ayimmakki badde afatto gedenna roore dancha beetto ikkatto gede kaaꞌlannohe

• baalantenni roortino heeshsho heeꞌratto gara afate kaaꞌlannohe

Ninke mannu ooso afoo dadhinanni heeꞌnenni xaꞌmo xaꞌma hananfeemmo.

• Gordu qasiꞌrinohu hiikkooti?

• Beeddahe soodiro hiikkira higganno?

Lophinanni haꞌneemmo wote kayinni hakkiinni saꞌino xaꞌmuwa xaꞌma hananfeemmo.

• Bushu coyi ikkannohu mayiraati?

• Mannu reyannohu isi mayiraati?

Tenne xaꞌmuwa dawaro Qullaawu Maxaafi giddo noohalla ikki?

Lowo manni Qullaawa Maxaafa maattotenna masalote maxaafaati, yannankera kaaꞌlannori dinooho, hattono yaannori dileellanno yaanno. Ikkina, qarru noohu Qullaawu Maxaafiwaatinso mannu hedowaati? Woy Qullaawu Maxaafi daafira gara ikkinokkire macciishshinohalla ikka?

Lawishshaho, mitu mannira Qullaawu Maxaafi alamete gashshaanchi Maganoho yee rosiisannoha lawannonsa. Kayinni kuni hiitto ikke ikkanno? Tini alame horo kande amandanniwa baꞌino! Xissonna rakko, xibbunna reyo, hattono buximanna dano woꞌmitino. Shaqqadu Magani togoo coye hiitto ikke assanno?

Kuri xaꞌmuwa dawaro afa hasiꞌratto? Qullaawu Maxaafi alamete gashshaanchi daafira kulannori dhagge ikkahera dandaanno!

Tenne biroshere giddo noo amaale Qullaawu Maxaafi giddonni haaꞌnoonnita huwatittokki digatootto. Yihowa Farciꞌraasine Qullaawu Maxaafi addaxxinanni biddishsha aannota dihuluullantanno. Korkaatuno, “Qullaawa Borro baala Maganunnihu Qullaawu Ayyaani kulanna borreessinoonnite. Tini borro halaale rosiisate, sodhinore seejjate, soꞌro hoolate” kaaꞌlitanno. (2 Ximootewoosi 3:16, 17) Lowo diri albaanni borreessinoonniha ikkirono, yannankerano kaaꞌlannoha konne maxaafa nabbawittoro horo digaabbatto!