Umi xibbi diro Yerusaalamete heedhannoti shiima “soqqamaasinetenna cimeeyyete” gaamo aliidi biso ikkite soqqantino; tini gaamo buuramino Kiristaani songo woꞌma riqibbe hasiisanno coye murtanno. (Soqqamaanote Looso 15:2) Insa sumuu yite mitto coye murtannohu, Qullaawa Borro yitannore seekkite hasaabbenna Maganu ayyaani aanno biddishsha harunsiteeti. (Soqqamaanote Looso 15:25) Yannankera noohu Aliidi Bisino insa lawishsha harunsanno.

Maganu, Aliidi Biso fajjosi assanno gede horoonsiꞌranni no. Aliidi Biso ikkite soqqantannori buurantino roduuwi Maganu Qaale biddishsha assite horoonsidhanno; qolteno ayyaanaamo looso massagatenna Qullaawu Maxaafi xaꞌmuwa dawarate woꞌnaalshu noonsareeti. Insa alamete doyichora noo roduuwira mayi hasiisannoro amaalamate lamalate kiiro gamba yitanno. Umi xibbi dirinte gede, Aliidi Bisi Qullaawu Maxaafi aana xintamino biddishsha sokka borreesse, woradu aliidi laꞌꞌaano widoonni woy wolu garinni songuwate soyanno. Tini qolte Maganu manni hedotenninna loosunni mitto ikkanno gede kaaꞌlitanno. (Soqqamaanote Looso 16:4, 5) Aliidi Bisi ayyaanaamittete sagale qixxaabbanno gede assanno, baalunku Maganu Mangisteha sabbakate looso diinaggaawe loosanno gede jawaachishanno, hattono roduuwu addi addi loosira shoomantanno gede assanno.

Aliidi Bisi Maganu ayyaani aanno biddishsha bayichonko harunsanno. Aliidi Bisi biddishsha afiˈrate, Kalqete Alamera Aliidi Mootichiwa Yihowawanna Songote Umo ikkinohuwa Yesuusiwa alba higanno. (1 Qorontoosi 11:3; Efesooni 5:23) Aliidi Bisi miilla ikkite soqqantanno roduuwi insaneeto Maganu mannira mootuulle ikkitino gede assite diheddanno. Insa wolu buuramino Kiristaani ledo “Geꞌrecho [yaano Yesuusa] haꞌriwa baala harunsitanno.” (Ajuuja 14:4) Aliidi Bisi insaranna loossanno loosira assineemmo huuccatto lowo geeshsha naadanno.

• Umi xibbi diro aliidi biso ikkite soqqantinori ayeooti?

• Yannankera Aliidi Bisi Maganu biddishsha hasiꞌrannohu hiittoonniiti?