Beeteelete maate mitte gobbara woy haammata gobbara loonsanniha sabbakate looso kaaꞌlate addi addi dippaartimentera loossanno. Insa tirote looso loossanno, metseetta attantanno, maxaaffa xarrazzanno, borrote magaaziinera loossanno, borro qoonqotenna viidiyote qoltanno, woy hasiisannoha wole looso loossanno.

Sinu Biiro Komite looso qineessitanno. Aliidi Bisi mitte mittente sinu biirora loosamanno looso qineessitanno gede Sinu Biiro Komite shoomanno; ayyaanaamittetenni lowonta gikki yitinori sase woy hakkiinni saꞌanno cimeeyye Sinu Biiro Komite ikkite loossanno. Mitte mittente gobbara nooti sinu biiro komite, hatte gobbara noo loosi ma garinni nooronna mayi qarri nooro Aliidi Bisira yannate kiiro rippoorte sokkanno. Togoo rippoorte, Aliidi Bisi albillitte borronke giddo, songote gambooshshira, hattono jajjabbu gambooshshira hiittoo rosi shiqiro woyyannoro muranno gede kaaꞌlitanno. Aliidi Biso riqibbe soqqantanno roduuwa addi addita sinu biiro towaattanno gede yanna yannante sonkanni; kuri roduuwi Sinu Biiro Komite loosonsa danchu garinni loossanno gede biddishsha uyitannonsa. (Lawishsha 11:14) Togoo yannara hattee sinu biiro qooxeessira noo roduuwa jawaachishate baxxitino pirogiraame qixxeessinanni; hatte pirogiraame yannara qara biiro riqiwaanchi lallawo shiqishanno.

Sinu biiro qoqqowisera noo songuwa kaaꞌlitanno. Sinu biiro giddo shoomantino roduuwi haaro songo kalaqantanno gede assitanno. Qolteno kuri roduuwi qoqqowinsa giddo noo suwisaanora, misiyoonera, hattono woradu aliidi laꞌꞌaanora biddishsha uyitanno. Hakkiinni saeno, jajjabba gambooshshe qineessitanno, haaro Gambooshshu Addaraashe minate looso biddi assitanno, hattono addi addi borro songuwate iillitanno gede assitanno. Sinu biirora loonsannihu baalunku loosi, sabbakate loosi qinaawino garinni loosamanno gede kaaꞌlanno.—1 Qorontoosi 14:33, 40.

• Sinu Biiro Komite Aliidi Biso kaaꞌlitannohu hiittoonniiti?

• Sinu biiro giddo maa maa assinanni?