YIHOWA isiwa higatto wote anga fane haarannoheta huluullantooti. Isi yaachishannohere qeelatto gedenna xissiisinohe coye tiratto gede kaaꞌlannohe; qoleno keeraancho tiia afidhe wodanunna surrete salaame afiꞌratto gede assannohe. Hakkiinnino bashshokkinte gede ammanate roduuwikki ledo Yihowara soqqamate kaꞌꞌattora dandaatto. Atino umi xibbi diri Kiristaani gede ikkatto; hawaariya Pheexiroosi insara togo yee borreessino: “Kiꞌne konni albaanni ballehino geꞌreewi gedeeti; xa kayinni lubboꞌne allaalaanchiwanna agaraanchiwa higginoonni.”—1 Pheexiroosi 2:25.

Ee, Yihowawa higa lowo geeshsha hasiissannote. Mayira? Higittoro Yihowa wodana hagiirsiisatto. (Lawishsha 27:11) Afittonte gede, ninke assineemmori Yihowa hagiirsiisara woy dadillisara dandaanno. Hige Yihowa banxeemmosinna soqqammeemmosi gede digiddeessannonke. (Marro 30:19, 20) Mittu Qullaawu Maxaafi fullahaanchi tenne xawisanni togo yiino: “Mannu wodani, gobbaanni heeꞌne amande fannannire afiꞌrinokki saanqi gedeeti. Konne saanqa fana hasiissannohu giddoonni heeꞌneeti.” Yihowa woꞌmu wodaninkenni banxe magansiꞌneemmosiha ikkiro, wodaninke saanqa fannoommosi yaate. Konne assine, isira muxxe coye aa, yaano isira ammanammoommore ikka dandiineemmo; tini wodanisi baasa hagiidhanno gede assitanno. Ee, Yihowa magansiꞌne afiꞌnanni hagiirri ledo taalamannori dino.—Hawaariyaatete Looso 20:35; Ajuuja 4:11.

Hakkiinni saeno, galagalte Magano magansiꞌrattoha ikkiro ayyaanaamittete hasattokki woꞌmitanno. (Maatewoosi 5:3) Hiittoonni? Alamete aana batinyu manni, ‘Kalaqammoommohu isi mayiraati?’ yee xaꞌmanno. Heeshshote heeꞌnoommohu mayiraatiro afa lowo geeshsha hasiꞌranno. Mannu ooso hatto yite heddannohu Yihowa tenne hasatto wore kalaqinonsa daafiraati. Yihowa, isira soqqamme hagiirre afiꞌneemmo gede asse kalaqinonke. Yihowa baxillunni magansiꞌnanni heeꞌnoommota afate geeshsha hagiirsiisannonkeri woluri dino.—Faarso 63:1-5.

Yihowa isiwa higattora hasiꞌrannota ballo deꞌooti. Tenne afa dandaattohu hiittoonniiti? Hanni konne coye hedi: Tini biroshere duucha hinge huuccatto assiꞌne, lowore hende kaꞌne qixxeessinoonnite. Qoleno tenne biroshere nabbawatto gede mittu songote cimeessi woy wolu ammanate rodiikki uyinoheha ikkara dandaanno. Hakkiinnino ise nabbawatenna yitannore assate kaitto. Kuni baalunkuri Yihowa hawinohekkita leellishannoreeti. Isi sununni asse isiwa higatto gede goshooshanni noohe yaate.—Yohaannisi 6:44.

Yihowa halaalu mininni xeertidhino soqqamaanosi hawannokkita afanke sheshifachishshannonke. Daana yinanni rodoo tenne huwattino. Ise togo yitino: “Halaalu mininni sunu sununni ikke fulumma; kayinni woꞌmanka wote Faarso 139:23, 24 yitannore hiinceemma; kuni qummeeshshi togo yaanno: ‘Magano, qonqolchite laie, wodanaꞌyano afi. Seekkite laie; giddoꞌya noo yaaddono afi. Giddoꞌya bunshete hedo nooro lai, hattono hegere doogo aana massagie.’ Alamennita ikkoommakkita afoomma; qoleno alame horo diꞌꞌinjiitinoe. Heeꞌra hasiissannoehu Yihowa dirijjite giddo ikkinota afoomma. Yihowa agurinoekkita gale hosanni huwatumma; assa hasiissinoe coyi isiwa higa callate. Qoleno, isiwa higoomma daafira lowo geeshsha hagiidhoomma!”

Atino galagalte “Yihowa hagiirre” afiꞌratto gede Yihowa huuccineemmo. (Nehimiya 8:10) Yihowawa higittoro horonta digaabbatto.