Togoori kalaqamanno yannara songo hakku manchi wole galte adhiro albi adhamasi diigantinohu gedenna gedensiidi adhamasi seerunnita ikkitinohu gede assite laˈanno. Togo yaa dandiineemmohu mayiraatiro huwatate Yesuusi galte diigatenna wirro adhamate daafira coyiˈrino hedo laˈno.

Yesuusi Maatewoosi 19:9te galte diinganni gede assara dandaannoha Qullaawa Borro fajjitannoha mitticho korkaata kulino. Isi togo yiino: “Mittu manchi galtesi foorretenni kainohunni ikka hoogiro, hakkuyi kaˈa galtese haˈrise wole adhiro foorinoho yaate.” Yesuusi coyiˈrinorinni lame coye huwanteemmo: (1) galte diinganni gede assara dandaannohu Qullaawa Borro fajjitannohu mittichu korkaati foorrete; (2) mittu manchi Qullaawa Borro ledo sumuu yaannokki garinni galtesi haˈre wole adhiro tini soorrote. a

Yesuusi hatto yaasi mittu manchi foore kae minaamasi fushshe haˈrisiro Qullaawa Borro wole adhara fajjitannosi yaateni? Hatto yaa diˈˈikkino. Mittu minaanni soorriro baddalantino minaamasi iso gatona yaate woy yaa hoogate doodha dandiitanno. Ise gatona yaa hoogate doodhituronna seeru garinni adhamansa diigguro, coyi goofihu gedensaanni lamunku wolu ledo wirro adhama dandiitanno.

Wole widoonni kayinni, baddalantino minaama adhamansa diigantara hasidhannokkiha ikkara dandaanno; hakko daafira ise minaannase gatona yaate maahoyye yitara dandiitanno. Ikkirono soorrino minaanni minaamasi iso gatona yaate maahoyye yiturono, isi kayinni giwe adhamansa diigirona? Minaamasi iso gatona yaatenna adhamansa diigantannokki gede assate maahoyye yitino daafira, Qullaawa Borro isi wirro wole adhanno gede difajjitannosi. Minaanni gara giwe Qullaawa Borro fajjitukkinni wole galte adhiro xaano wirro soorranni no yaate; isi bohaminokkiha ikkiro, tenne hajo laˈˈate songote cimeeyye wirro yoote komite xintitanno.—1 Qor. 5:1, 2; 6:9, 10.

Mittu manchi Qullaawa Borro fajjitusikki wirro adhiro, songo albi adhamasino ikko gedensiidita ma garinni laˈanno? Qullaawa Borro garinni albi adhamansa xaano didiigantino yaateni? Isi wole adhihu gedensaannino baddalantino minaamasi iso gatona yaate woy gatona yaa giwate doodha dandiitanno? Songo gedensiidi adhamasi soorrote gede assite laˈanno?

Baddalantino minaama lubbote heedheenna mine assidhukki hattono foortukki albi minaannise wole adhiro, bashshora songo gedensiidi adhama soorrote gede assite laˈanno. Ikkollana Yesuusi adhama diigatenna wirro wolu ledo adhamate daafira coyiˈri woyite, baddalamino minaanni woy minaama daafira dikayisino. Hatteentenni isi, mittu manchi Qullaawa Borro fajjitannokki  garinni adhamasi diige wole adhiro, tini soorro ikkitinota xawisino. Kuni manchi adhamasi diige wole adhasi Yesuusi yiino garinni soorrate ledo taalo ikkitino daafira albi adhamasi diigantanno.

Mittu manchi adhamasi diige wole galte adheenna, adhamansa diiganturo baddalantino minaama gatona yaa woy gatona yaa giwa didandiitanno. Hakko daafira ise albi minaannase gatona yoonso giwo yite heddanni diqarrantanno. Qoleno baddalantino minaama lubbotenni heedhono hooggono, mine assidhono assiˈrano hooggo woy foortono foorano hooggo songo gedensiidi adhama soorrote gede assite dilaˈanno. b

Aleenni laˈnummo lawishshira, adhamansa diigantinohu minaanni soorreennaati. Kayinni minaanni soorrinokkiha ikkirono, adhamansa diige wirro wolella adhi? Woy hanni minaanni adhamansa diigantara albaanni foorinokkiha ikkirono diigantuhu gedensaanni kayi foorino yine hendo; minaamasi gatona yaate maahoyye yite heedheenna isi wirro wolella adhi? Minaanni adhamansa diige wole adhasi soorro ikkitino daafira, tini albi adhamansa diigantanno gede assitanno. Gedensiidi adhama seerunni kaajjitinote yaa dandiinanni. Bocaasa 15, 1979ti Agarooshshu Shae qoola 32 kultanno garinni “xa isi wole galte adhino daafira tenne galte diige bashshotewa higa didandaanno; adhamasi diiginohura, soorrinohuranna wirro wole adhinohura albi adhamansa diigantino.”

Tini biddi assinoonni hedo adhanna adhama qullaawa ikkitinota, woy soorro jawa cubbo ikkitinota deˈneemmo gede diassitannonke. Mittu manchi Qullaawa Borro fajjitannokki garinni galtesi fushshe haˈrisironna Qullaawa Borro fajjitusikki wole adhiro tini soorro ikkitino daafira songote cimeeyye yoote komite xintitanno. (Gedensoonni adhinoti Kiristaancho ikkituro iseno soorritino daafira yoote komite albira shiqqanno.) Gedensiidi adhama soorrote gede assine laˈnannikkiha ikkirono, isi lowo diri geeshsha songote giddo baxxitinota soqqanshote qoosso diafiˈranno; mannu isi assino bunshera koffi yiinota agura geeshsha woy wolootu ayirrissannoha ikka geeshsha togoo qoosso diafiˈranno. Isi konni albaanni albi minaamasi woy oososi baddalinoha ikkara dandaanno daafira, cimeeyye isira aye qoossono uyitara albaanni albi galtesino ikko qaaqquullisi xa ma garinni nooro seekkite heddanno.—Mil. 2:14-16.

Qullaawa Borro fajjitannokki garinni adhama diiganna wirro wole adha lowo qarra abbitanno daafira Kiristaanu adhanna adhama Yihowa gede qullaawa asse laˈˈa hasiissannonsa.—Ros. 5:4, 5; Ibi. 13:4.