Qarra abbannohu Magano ikka hoogina, hudete, buximate, olaho, dhibbahonna kalaqamu danora xaꞌmamannohu ayetiyya? Maganu Qaali mannu ooso qarrantanno gede assannoha sase qara qara korkaata kulanno.

1. Meessaneeto Calla Baxa, Hafuurrenna Gibbo. “Mittu woloota kade gashshanno.” (Rosiisaancho 8:9) Duucha woyite mannu qarramannohu guuntete xeꞌne noonsahu, umonsa calla baxannohunna kaajjadu manni miicannonsa daafiraati.

2. Yannanna Hedeweelcho. Duucha woyite mannaho qarru iillannonsahu “yannanna hendoonnikki coyi” iillannonsa daafiraati. (Rosiisaancho 9:11, NW) Hatto yaa mannu gara ikkitinokki yannara gara ikkinokki bayicho haꞌransanni, danotenni, woy mannu loosino soꞌronni qarru iillansara dandaanno.

3. Busha Alamete Gashshaancho. Qullaawu Maxaafi mannu oosora iillanno qarrira qaru kaimi Sheexaane ikkinota kulanno. Maganu Qaali, “Alame gudisidhe mittu bushu anga no” yaanno. (1 Yohaannisi 5:19) “Bushu” yinihu wolqaataamo ayyaanu kalaqo ikkinoho Sheexaane Daawuloosiiti; isi biꞌreera sokkaasinchoho; ikkollana “halaalu giddo kaajje diuurrino.” (Yohaannisi 8:44) Wole sokkaasineno uminsa yorto wonshiꞌrate yite Sheexaneho halante Maganoho finqiltino, hattono agaaninte ikkitino. (Kalaqama 6:1-5) Sheexaanunna agaanintesi finqiltu yannanni kayisse tenne alame assiꞌnannikkita assitanni keeshshitino. Roorenkanni yannankera insa hatto assitanni no. Sheexaanu aaraawe hanqino daafira, “alame woꞌma soꞌrisiisanni no”; tini qolte lowo shetto abbitino. (Yohaannisi Ajuuja 12:9, 12) Ee, Sheexaanu kaajjadohonna haxawarraho. Isi mannu ooso qarrantanna laꞌꞌanno woyite hagiidhanno. Konnira qarraho kaimu Magano ikkikkinni Sheexaneho.

HANNI HEDI: Beebbaataamu manni qarramanno gede assannohu kaajjadonna busha ikkinoho Daawuloosiiti. Qullaawu Maxaafi kayinni “Maganu baxilleho” yaanno. (1 Yohaannisi 4:8) “Woꞌmanka dandaanno Magani” baxillaancho ikkino daafira, “busha coye diassanno.”—Iyyoobi 34:10.

Ikkollana ‘Woꞌmanka Dandaanno Magani Sheexaanu qarrise gashshara fajjinohu mayiraati?’ yite hedattoha ikkara dandaanno. Sai birxichira ronsummonte gede, Maganu bunshe giwanno; hattono qarru iillannonke woyite dadillanno. Ikkollana Qaalisi, “Kiꞌnere malannohu isootina, qarrisannoꞌnere baala isi aana tuqqe” yaanno. (1 Pheexiroosi 5:7) Maganu baxannonke, hattono isira qarra baalanna taashshote xeꞌne hunate wolqa noosi; aananno birxichi tenne xawisanno. a