Mitu 3,500 diri albaanni, Maganu Yihowa iso magansidhannori teesse heeꞌrate maa assa hasiissannonsaro kulanni togo yiino: “Doodhitinanni gede heeshshonna reyo, maassonna rumo albaꞌneenni woroommo. . . . Lubbotenni heedhinanni gede heeshsho doodhe.”—Marro 30:19.

Hakkawaro iso magansidhannori, dancha heeshsho heeꞌrate gara ikkinore doodha hasiissinonsa. Xaa yannara ninkeno gara ikkinore doodha hasiissannonke. Qullaawu Maxaafi albillitte dancha heeshsho heeꞌra doodhineemmo gara kulanni, “Maganoꞌne Kaaliiqa baxxe; isira hajajamme” yaanno.—Marro 30:20.

QULLAAWA MAXAAFA XIINXALLI: Yihowa baxate, balanxe Qullaawu Maxaafinni isire rosa hasiissannonke. Tenne assatto woyite, isi ninkera danchare halchannoha baxillaancho Magano ikkinota huwatatto. Isi ‘atere malannoha’ ikkino daafira, huuccatto assiꞌrattora koyisinohe. (1 Pheexiroosi 5:7) Qullaawu Maxaafi, ati Yihowawa shiqate dandaamihere assittoro ‘isino atewa shiqqi yaannota’ kulanno.—Yaiqoobi 4:8.

ROSOOTTO ROSI GARINNI HEEꞌRI: Maganoho hajajamate yaa, isi Qullaawu Maxaafi giddo uyinonke biddishshi garinni heeꞌrate yaate. Hatto assittoro, “baalunku coyi danchu garinni qinaannohe.”—Iyyaasu 1:8.