DOORIINI minaannise Weseli 54 dirihu heeꞌreenna surrete muje dhibbi noosita kullita lowo geeshsha massino. a Hakimootu isi lubbote heeꞌrannohu boode agana calla ikkinota kultinosi. Dooriini togo yitino: “Macciishshoommari ammanate qarrisinoe. Boode lamala geeshsha kade amadeemmari bainoe. Kuni coyi ninkera ikkikkinni wolu mannira iillinori gede asse hedoomma. Tini dihedoommate.”

Togoori iillinoseti Dooriini calla diꞌꞌikkitino; tini dadillissannote. Buutote dhibbi aye manchono aye yannarano amadara dandaanno. Lowo manni buuto dhiwaminoha mininsa manna dhiwansiisanno; tini hagiirsiissannote. Togoo manna dhiwansiisa kayinni shota diꞌꞌikkitino. Maatete miilla buuto dhiwaminoha mininsa manna sheshifachishatenna towaatate maa assa dandiitanno? Dhiwansiissannori dhibbunni kainohunni macciishshamannonsare dandiite saꞌꞌate kaaꞌlannonsari maati? Dhiwamino manchi reyanno yanna gambissanno wote mayi ikkara dandaanno? Hanni balanxe, xaa yannara buuto dhiwamino manna dhiwansiisa qarrissannota ikkitinohu mayiraatiro laꞌno.

Hikkiminnu sayinse mannu xiwamanni heeꞌrenni reyannokki gede assitino. Xibbu diri albaanni, lophitino gobbuwara nafa mannu mereerimunni heeꞌranno diri lowo geeshsha shiimaho. Mannu hakkawaro shiimu dhibbinni woy danotenni reyanno. Akimete mini halaꞌlinokki daafira, rooru manni manna dhiwansiisiꞌrannohu minensaati; qoleno mannu reyannohu mine heeꞌreeti.

Xaa yannara, xaginsanni gari halaꞌlasi akimootu dhibba gargarte mannu heeꞌranno diro seedisa dandiitanno gede assino. Alba manna amadanni heeꞌrenni shaanno dhibba gargarre xa mannu lowo diro heeꞌranno gede assa dandiinoonni. Ikkollana, seeda diro heeꞌranno manni heeꞌrannohu dhibbinsa ledooti. Duucha wote buuto dhiwamino manni wolqa baꞌꞌanno daafira, insaneeto towaaxxe diafanno.  Hattoo manna dhiwansiisa shota diꞌꞌikkitino; qoleno lowo woxi, wolqanna yanna hasiissanno.

Konni daafira, rooru manni reyannohu minensa heeꞌre ikkikkinni hospitaaleteeti. Yannankera rooru manni mannu reyanno wote hiitto ikkannoro diafino, hattono mannu reyanna laꞌꞌanno manni shiimaho. Konnira, maatensa miila dhiwansiisiꞌranno manni waajjanno daafira, dhiwansiisiꞌnanni gari baꞌꞌansara woy wolqa hoogara dandaanno. Ikkina tennera kaaꞌlannonsari maatiyya?

Dooriini lawishshi leellishannonte gede, batinyu manni mininsa manna hurannokki dhibbi amadinota afanno wote lowo geeshsha masanno. Yaaddo, waajjanna dadillu heeꞌrirono, albillitte ikkannorira qixxaawa dandaattohu hiittoonniiti? Mittu ammanaminohu Maganu soqqamaasinchi togo yee huucciꞌrino: “Egennaamma ikkineemmo gede, dirinke harancho ikkinota rosiisinke.” (Faarso 90:12) Maganu Yihowa ‘dirikki harancho ikkinota’ rosiisannohe gede jaatte huucciꞌrakki, gattino yanna maatekki miili ledo danchu garinni sayisa dandaatto gede kaaꞌlitannohe.

Tennera balanxe qixxaawa hasiissanno. Maatekki miili coyiꞌra dandaannohanna hasaawa hasiꞌrannoha ikkiro, isi coyiꞌre kuꞌla hooganno wote, iso riqiwe mittore ayi assasira hasiꞌrannoro xaꞌma hayyote. Dhiwamino manchi, akimootu kaaꞌlonni reyotenna heeshshote mereero heeꞌra woy hospitaale ea hasiꞌrannoronna teꞌee, hattono hiittee dhagga adha hasiꞌrannoro xawinse hasaawa, dhiwamino mancho riqiwe mittore assanno manchi daafira gara ikkinokkire hendannikki gedenna ganaanni gaabbinannikki gede assitara dandiitanno. Yannantenni fanne hasaawa maate dhiwamino mancho ille worte towaattanno gede kaaꞌlitanno. Qullaawu Maxaafi “Malu hoogiro hendoonniri ikkikkinni gatanno” yaanno.—Lawishsha 15:22.

Dhiwansiisanno mannihu qaru loosi dhiwaminoha sheshifachishate. Buuto dhiwamino mancho banxannisitanna callichosi ikkinokkita kulle jawaachisha hasiissanno. Tenne assa dandiinannihu hiittoonniiti? Dhiwamino manchira jawaachishshannotanna isi baxanno borro doorte nabbawisi; woy baxanno faarso faarsisi. Batinyu manni, maatensa miili angansa amade awu afiinni hasaawisannonsa wote sheshifatanno.

Duucha wote dhiwamino manchi xaꞌmasira dayino manna bade afasi danchate. Mitte rippoorte togo yite xawissino: “Ontente huwatote bisi kifilla giddo jeefote geeshsha loosa agurtannokkiti maccate yine hendanni. Xiwamino manchi goxirono macciishsha agurannokki daafira, goxino yitine  baqqi yee heeꞌreenna coyidhinannikkire coyidhinoonte.”

Dandaamannoha ikkiro, mitteenni huuccatto assidhe. Qullaawu Maxaafi mitte yannara soqqamaasinchu Phaawuloosiranna jaallasira heeshshonsa nafa qarru giddo ubbanno gede assannohu buutote qarri iillinonsata kulanno. Hatte yannara insa ma garinni kaaꞌlinansara xaꞌmidhuyya? Phaawuloosi ammanate roduuwisira ‘Magano huuccenke’ yiino. (2 Qorontoosi 1:8-11) Yaachishannori iillannonkenna buutote dhibbi amadannonke wote giddonni huucciꞌra lowo geeshsha kaaꞌlitanno.

Mininke manni reyannota ammane adha lowo geeshsha qarrissannote. Kalaqammoommohu reyinammora ikkinokkiti egennantinote. Konni daafira, reyo heeshshonke kifile ikkitinohu gede asse heda qarrissannonke. (Roomu Sokka 5:12) Maganu Qaali reyo ‘diinaho’ yaannohu iseraati. (1 Qorontoosi 15:26) Konni daafira, mininke manchi reyanno yine heda nafa shota ikkitinokkiti dihuluullissannote.

Ikkollana, maatete miilla ikkara dandaannore balaxe hedansa, waajjishannonsare ajishatenna dandaaminsa deerrinni coye biddi assate kaaꞌlitannonsa. Mittu manchi reyara kaꞌꞌanno wote ikkannori giddo gama “Reyate Boode Lamala Gattanno Wote” yitanno saaxine giddo xawinsoonni. Ikkirono dhiwamino manchi baalu hatto ikkanno woy hakko kulloonniri aante garinni ikkanno yaa diꞌꞌikkino. Kayinni roore dhiwamino manni reyara kaꞌꞌanno wote hatto ikkanno.

Maatete miili reyi gedensaanni, konni albaanni kaaꞌlate sumuu yiinohuwa muli jaaliwa aana dancha ikkitara dandiitanno. Dhiwansiisidhanni keeshshitinote maatete miillara, shiidhino manchihu qarrisi kainotanna xaate qarramannokkita kule sheshifachishannonsahu hasiisannonsa. Manna kalaqino Magani ‘reyitinori mittoreno affannokkita’ kulinonke.—Rosiisaancho 9:5.

Maatete miili buuto dhiwamanno wote calla ikkikkinni shiiꞌne dadillinanni woteno Magano addaxxa hasiissanno. Maganu wolootu coyidhannonna assitannori widoonni sheshifachishaꞌnera dandaanno. Dooriini togo yitino: “Wolootu kaaꞌlitannoe kaaꞌlo adha hasiissannoeta rosoomma. Qoleno wolootu baasa kaaꞌlitinonke. Minaanniꞌyanna ani, Yihowa ‘Kiꞌne kaaꞌlate muleꞌne noommo’ yiinonkehu gede assine hendoommo. Assinonkere horo dihaweemma.”

Ee, towaatate Maganu Yihowa geeshsha ikkannohu dino. Kalaqaanchonke ikkino daafira xissonkenna dadillinke leellannosi. Isi qarra dandiine saꞌneemmo gede ninke kaaꞌlanna jawaachisha hasiꞌranno, hattono tenne assate wolqa noosi. Isi konninni roorinore assankera yaano lowo biliyoone ikkannoha reyino manna kayise reyo hegerera hunara qaale einonke. (Yohaannisi 5:28, 29; Yohaannisi Ajuuja 21:3, 4) Hakkiinni baalunku manni soqqamaasinchu Phaawuloosi gede, “Tee reyo qeellekki hiikko no? Tee reyo gawajjattati wolqakki hiikko no?” yee coyiꞌra dandaanno.—1 Qorontoosi 15:55.