1. Batinyu manni looso ma garinni laꞌꞌanno?

 ATI heeꞌratto qooxeessira mannu looso ma garinni laꞌꞌanno? Duucha gobbuwara heeꞌranno manni albinni roore diinaggaawenna seeda yanna loosanno. Duucha woyite loosu batiꞌrannonsa manni, fooliishshiꞌrate, maatensa ledo yanna sayisate, hattono ayyaanaamittete hasattonsa wonshiꞌrate yanna diafiꞌranno. (Ros. 2:23) Wole widoonni kayinni mitu manni looso loosa ceeꞌmanno; hattono looso loosa giwate yee korkaata shiqishanno.—Law. 26:13, 14.

2-3. Yihowanna Yesuusi looso loosate daafira dancha lawishsha ikkitinonkehu hiittoonniiti?

² Yihowaranna Yesuusira loosoho noonsa lao alamete mannira noonsate gara ikkitinokki laonni baxxitinote. Yihowa looso loosa baxannoti dihuluullissannote. Yesuusi tenne xawisanni togo yiino: “Anniꞌya techo geeshsha loosanni no; anino loosanni noommo.” (Yoh. 5:17) Maganu kiirre gundannikkita ayyaanaame kalaqonna kalqete alame kalaqi woyite loosinore hanni hendo. Qoleno, Maganu heeꞌnoommote biifado uulla aana batinyere kalaqino. Faarsaasinchu tini gara ikkitinota xawisanni togo yiino: “Kaaliiqa, ati lowore kalaqootto; baalanka ogimmakkinni seekkootto; baattote ati kalaqoottori woꞌmino.”—Far. 104:24.

³ Yesuusi Annisi lawishsha harunsino. Maganu iimanna uulla kalaqi yannara Yesuusi ledosi loosino. Isi Yihowa ledo qara loosaasincho ikke loosino. (Law. 8:27-31) Yesuusi uullate aana heeꞌri yannarano dhagge ikkanno looso loosino. Kuni loosi isira sagalete gedeeti; hattono Maganu soyinosita leellishannoho.—Yoh. 4:34; 5:36; 14:10.

4. Yihowanna Yesuusiwiinni fooliishshote daafira maa ronseemmo?

 ⁴ Yihowanna Yesuusi diinaggaabbe loosse dancha lawishsha ikkitinonke; hatto yaa kayinni fooliishsho dihasiissannonke yaatenni? Hatto yaa diꞌꞌikkitino. Yihowa horonta daafurannokki daafira ninke gede fooliishsho dihasiissannosi. Qullaawu Maxaafi Yihowa iimanna uulla kalaqihu gedensaanni ‘fooliishshiꞌrino’ yaanno. (Ful. 31:17) Hatto yinoonnihu Yihowa loosino looso taxxi yee lae hagiidhinota xawisate ikkinoti dihuluullissannote. Yesuusino uullate aana heeꞌri yannara diinaggaawe loosinoha ikkirono, fooliishshiꞌratenna jaallasi ledo sagale itate yanna dihoogino.—Mat. 14:13; Luq. 7:34.

5. Lowo mannira mayi qarra ikkannonsa?

⁵ Qullaawu Maxaafi Maganu manni jawaate loosanno gede amaalanno. Soqqamaanosi diinaggaabbe loosa hasiissannonsa ikkinnina ceeꞌmaleeyye ikka dihasiissannonsa. (Law. 15:19) Maatekkira hasiisannore shiqishate looso loosattoha ikkara dandaanno. Yesuusi harunsaano baalantera dancha duduwo sabbakate qeechi noonsa. Qoleno fooliishshiꞌra hasiissannonke. Loosoho, soqqanshotenna fooliishshote gari yanna noohekkiha lawannohe? Mageeshsha loosanna mageeshsha fooliishshiꞌra hasiissannonkero afa dandiineemmohu hiittoonniiti?

6. Maarqoosi 6:30-34 noo hedo Yesuusira loosohonna fooliishshote gara ikkitino lao noosita leellishshannohu hiittoonniiti?

⁶ Loosoho gara ikkitino lao heedhannonke gede assiꞌra hasiissannonke. Moote Salamooni qullaawu ayyaaninni “baalunkurira yanna no” yee borreessino. Isi kaasa, mina, wiꞌla, osoꞌla sirbanna wole coyibba xawisino. (Ros. 3:1-8) Loosunna fooliishsho heeshshonke giddo lowo geeshsha hasiissannote. Yesuusira loosohonna fooliishshote gara ikkitino lao noosi. Mitte yannara Yesuusi soqqamaasine sabbakkanni hossinowiinni daafurtinori higgino; insa “sagale ittanno gara” nafa hooggino. Yesuusi togo yiino: “Ane ledo kaꞌa shiqqi yitine, shiima geeshsha fooliishshidhe.” (Maarqoosi 6:30-34 nabbawi.) Yesuusinna harunsaanosi duucha woyite hasidhino geeshsha fooliishshiꞌra dandiitinokkiha ikkirono, Yesuusi kayinni baalunkura fooliishsho hasiissannota afino.

7. Sambatu seera xiinxallanke kaaꞌlitannonkehu hiittoonniiti?

⁷ Mite yannara baalunkura fooliishsho woy barru baala assiꞌneemmore soorra hasiissannonke. Maganu hundi Israeelera qixxeessinoti lamalate Sambati qixxaawo tenne leellishshanno. Ninke Muse Seerinni galleemmore ikka hoongummorono, kuni seeri Sambatu daafira kulannore xiinxallanke kaaꞌlitannonke. Konni seerinni ronseemmori, loosohonna fooliishshote noonke lao biddi assiꞌrate kaaꞌlannonke.

8. Fulo 31:12-15 kultanno garinni Sambatu mayi barraati?

⁸ Qullaawu Maxaafi kalaqonnihu lewu ‘barri’ gedensaanni Maganu uullate aana kalaqannore uurrisinota kulanno. (Kal. 2:2) Ikkirono, Yihowa looso baxanno; hakko daafira isi wolu garinni “techo geeshsha loosanni no.” (Yoh. 5:17) Yihowa qixxeessinoti lamalate Sambati qixxaawo, Kalaqamu maxaafi giddo xawinsoonnihu Yihowahu fooliishshote barri ledo mittu garite. Maganu Sambatu Israeeletenna isi mereero malaate ikkinota coyiꞌrino. Kuni barri woꞌmunni woꞌma fooliishshote  barraati; hattono Yihowara “qullaawa barraati.” (Fulo 31:12-15 nabbawi.) Konne barra qaaqquulluno borojjuno, wole agurina saada nafa fooliishshidhe hossanno. (Ful. 20:10) Kuni barri mannu ayyaanaamittete coye roore illachishanno gede kaaꞌlannonsa.

9. Yesuusi yannara Sambatu barri daafira mitu mannira hiittooti quwa saꞌino lao noonsa?

⁹ Sambatu barri Maganu mannira danchaho; ikkollana Yesuusi yannara noori batinye ammaꞌnote massagaano uminsa wodho ledde Sambatu barri seera agadha qarra ikkitanno gede assitino. Insa Sambatu barra shoye tattayinse ita woy dhiwamino mancho hursa seeru difajjanno yitanno. (Maq. 2:23-27; 3:2-5) Insa yitannori Maganu hedinore diꞌꞌikkino; Yesuusi macciishshannosi mannira tenne xawisino.

10. Maatewoosi 12:9-12 Yesuusira Sambataho noosi lao leellishshannohu hiittoonniiti?

¹⁰ Yesuusinna Yihudu wido ikkitino harunsaanosi Muse seerinni galtannore ikkitino daafira Sambata ayirrissanno. b Yesuusi assinorinninna coyiꞌrinorinni Sambata lainohunni quwa saꞌꞌa hasiissannokkitanna shaqqillunni woloota kaaꞌla soꞌro ikkitinokkita leellishino. Isi togo yee coyiꞌrino: “Fooliishshote Barra danchare loosa fajjinoonni.” (Maatewoosi 12:9-12 nabbawi.) Yesuusi Sambatu barra shaqqillunni woloota kaaꞌla seera diigate gede asse dilaino. Isi assinori Yihowa Sambata qixxeessinohu mayiraatiro leellishanno. Maganu manni hakko barra loosunni  fooliishshiꞌre hosanno daafira ayyaanaamittete coye illachisha dandaanno. Yesuusi lophino maate Sambatu barra roore ayyaanaamittete coye illachishshannoti dihuluullissannote. Yesuusi lophino gobbara Naaziretete assinorinni tenne buuxa dandiineemmo; isi “albinte gede Ayihudete Fooliishsho Barra xaadu minira eꞌꞌe, nabbawara” kaino.—Luq. 4:15-19.

11. Yesuusi loosu daafira dancha lawishsha ikkinonkehu hiittoonniiti?

¹¹ Yooseefi, lossiꞌrino beettisira Yesuusira hanaatsimma rosiisisi woyite Yihowara loosoho noosi laono rosiisinositi egennantinote. (Mat. 13:55, 56) Yesuusi Yooseefi lowo maatesira hasiisannonsare wonshate barru baala diinaggaawe loosanna laino. Gedensaanni Yesuusi rosaanosira ‘loosinohura daafurisi gumi hasiisannota’ kulinonsa. (Luq. 10:7) Yesuusi diinaggaambe loonsanni gara afino.

12. Diinaggaawe loosa jawaachishshanno qummeeshshuwa hiikkuriiti?

¹² Soqqamaasinchu Phaawuloosino diinaggaawe loosino. Isihu qaru loosi, Yesuusi daafira farciꞌratenna sokkasi duduwate. Ikkirono, Phaawuloosi hasiisannosire wonshiꞌrate loosono loosino. Teselonqe Kiristaani Phaawuloosi ‘ayerano duha ikkannokki gede hashshanna barra daafuranni diinaggaawe’ loosannota afino. (2 Tes. 3:8; Soq. 20:34, 35) Phaawuloosi hatto yiinohu dunkaana gowate loososi kulate ikkikki digatino. Isi Qorontoosi noo yannara Aqiilanna Phirisqila ledo heeꞌrino; ‘isino insante gede dunkaana gowannoha ikkinohura, ledonsa loosiꞌrino.’ Phaawuloosi ‘hashsha barra loosino’ yaa horo fooliishshiꞌrikkinni loosino yaa diꞌꞌikkino. Lawishshaho, isi Sambatu barra dunkaana digowanno. Isi konne barra Yihudu mannira farciꞌranno; insano Sambatu barra looso diloossanno.—Soq. 13:14-16, 42-44; 16:13; 18:1-4.

13. Phaawuloosi lawishshinni maa ronseemmo?

¹³ Soqqamaasinchu Phaawuloosi dancha lawishsha ikkinonke. Isi umisi looso loosiꞌrannoha ikkirono, Maganunniha “dancha duduwo” diinaggaawe sabbakino. (Rom. 15:16; 2 Qor. 11:23) Isi wolootuno hatto assitanno gede jawaachishino. Aqiilanna Phirisqila “Kiristoosi Yesuusi soqqanshora ledosi” soqqantino. (Rom. 12:11; 16:3) Phaawuloosi Qorontoosi Kiristaana ‘Mootichu loosi’ batiꞌrinonsare ikkitanno gede jawaachishinonsa. (1 Qor. 15:58; 2 Qor. 9:8) Qoleno, isi qullaawu ayyaaninni “loosa baxannokkihu itoonke” yee borreessino.—2 Tes. 3:10.

14. Yesuusi Yohaannisi 14:12 noo hedo coyiꞌrinohu mayyaate hedeeti?

¹⁴ Tenne goofimarchu yannara lowo geeshsha hasiisanno loosi sabbakatenna manna rosaano assate loosooti. Qoleno, Yesuusi rosaanosi isi loosinohunni roorino looso loossannota masaalino. (Yohaannisi 14:12 nabbawi.) Yesuusi hatto yiinohu isi gede maalale loonseemmota kulate diꞌꞌikkino. Hatteentenni harunsaanosi isi sabbakinonna rosiisinohunni roore batinyu qoqqowira, lowo mannira hattono seeda yanna sabbakkannota kulateeti.

15. Ninkeneeto hiikkuri xaꞌmuwa xaꞌma hasiissannonke? Mayira?

¹⁵ Looso loosattoha ikkiro, ateneeto togo yite xaꞌmi: ‘Loosu basera diinaggaawe looseemmo? Loosoꞌya danduummo deerrinni danchu garinni loose yannante gudeemmo?’ Hatto assattoha ikkiro, loosiisaanchikki ammanannohe. Qoleno, tini ledokki loosanno manni dancha duduwo roore macciishsha hasiꞌranno gede assitara dandiitanno. Sabbakatenna rosiisate loosi daafirano ateneeto togo yite xaꞌmi: ‘Konne looso diinaggaawe  looseemmo? Manna umo mare hasaawisate seekke qixxaaweemmo? Hasatto noonsa manna keeshshummokki wirro mare hasaawiseemmo? Duuchunku gari soqqansho ganye soqqameemmo?’ Kuri coyibba assattoha ikkiro, soqqanshokkinni hagiirre afiꞌratto.

16. Yesuusiranna soqqamaasinera fooliishshote noonsa lao yannankera noohu batinyu mannitenni baxxitinohu hiittoonniiti?

¹⁶ Yesuusi, isirano ikko soqqamaasinesira fooliishsho hasiissannonsa woyiti noota afino. Ikkollana, hakkawarono ikko xaa yannara batinyu manni Yesuusi lawishshunni kuli manchi gedeereeti. Hakku manchi isonooto “xaate fooliishshidhe ittanninna agganni hagiidhi” yiino. (Luq. 12:19; 2 Xim. 3:4) Isi fooliishshonna umisi qiniite calla illachishino. Yesuusinna soqqamaasinesi kayinni uminsa hagiirre calla diꞌꞌillachishshino.

17. Fooliishshote yannanke ma garinni horoonsiꞌra dandiineemmo?

¹⁷ Ninkeno Yesuusi lawishsha harunsine noonketa fooliishshote yanna fooliishshiꞌrate calla ikkikkinni dancha looso loosate lawishshaho, dancha duduwo duduwatenna Kiristaanu gambooshshe haꞌrate horoonsiꞌneemmo. Manna rosaano assanna Kiristaanu gambooshshe haꞌra ninkera lowo geeshsha hasiissannota ikkitino daafira, tenne qullaawa soqqansho ganyine soqqamate dandiinummore baala assineemmo. (Ibi. 10:24, 25) Fooliishshote wolewa haꞌneemmo yannara nafa ayyaanaamittete rosichonke assa lawishshaho, marroommowa gambooshshe haꞌranna xaandeemmo mannira farciꞌra diagurreemmo.—2 Xim. 4:2.

18. Mootenke Yesuusi Kiristoosi ma assinammora hasiꞌranno?

¹⁸ Mootenke Yesuusi Kiristoosi quwa saꞌꞌannokkiha ikkinohura, hattono loosohonna fooliishshote gara ikkitino lao heedhannonke gede kaaꞌlannonke daafira lowo geeshsha galanteemmosi! (Ibi. 4:15) Isi fooliishsho hasiissannonke woyite fooliishshiꞌnammora hasiꞌranno. Qoleno, hasiisannonkere afiꞌrate jawaante loonsammoranna hagiirsiisannoha manna rosaano assate looso loonsammora hasiꞌranno. Aananno birxichira Yesuusi ninke gadadissanno borojjimma giddonni fushshate assinore ronseemmo.