IILLINOE qarra dandee saeemmo gede kaaꞌlannoehu dino yite hedde egennootto? Heeꞌnoommohu ‘qarrissannote goofimarchu yanna’ giddooti; tini hexxo mudhineemmonna callantoommohu gede assine hendeemmo gede assitankera dandiitanno. (2 Xim. 3:1) Ikkirono heeshshonke giddo iillannonke qarra dandiine saꞌꞌate wolootu kaaꞌlitannonke. Qullaawu Maxaafi “qarru barra iillanno” jaali kaaꞌlannota luphi asse kulanno.—Law. 17:17.

Soqqamaasinchu Phaawuloosi misiyoone ikke haꞌri yannara ledosi hadhinori jaallasi kaaꞌltinosi. (Qol. 4:7-11) Phaawuloosi Roomaho usurame noo yannara isi assiꞌra dandaannokkire jaallasi assite kaaꞌlitinosi. Lawishshaho, Afiroodiixu Filiphisiyuusi songora heedhanno roduuwi sokkinosire iillishinosi. (Fil. 4:18) Tikiqoosi qole Phaawuloosi borreessino sokka addi addi songuwara iillishino. (Qol. 4:7) Phaawuloosi jaallasi kaaꞌlitinosihura, usurroonnisihanna mininni fula dandiinokkiha woy callisi nooha ikkirono soqqanshosi umo fushsha dandiino. Xaa yannara atino addu jaala ikka dandaattohu hiittoonniiti?

Yannankera noo lawishshi addu jaala ikka kaaꞌlitanno gara leellishanno. Hanni Ispeenete woꞌma yanna suwisaancho ikkite soqqantannote Elsaabeexira, mitte rodoo addu jaalase ikkitinota leellishshino gara laꞌno. Elsaabeexi, amase kaanserete dhibbi amadeenna xiwansiisidhanni noo yannara, tini rodoo Qullaawu Maxaafi aana xintantinota batinye jawaachishshanno sokka sokkinose. Elsaabeexi togo yitino: “Tini sokka calla noommahu gede asse hedummakkinni barru barrunku iillannoe qarra dandee saꞌꞌate wolqa ikkitinoe.”—Law. 18:24.

Ammanate roduuwinke soqqansho fultanno gede woy gambooshshe hadhanno gede kaaꞌline insa ledo noonke jaalooma kaajjishiꞌra dandiineemmo. Lawishshaho, mitte woy mitto jawa rodoo gambooshshe woy soqqansho haadhe haꞌra dandaatto? Hatto assattoha ikkiro mimmito jawaachishshinanni. (Rom. 1:12) Ikkirono mitu Kiristaani mininsanni fula didandaanno. Insara addu jaala ikka dandiineemmohu hiittoonniiti?

Mitu ammanate roduuwinke dhiwannonsa daafira woy wolu korkaatinni kainohunni gambooshshe haꞌra didandiitanno. Hanni kaanserete dhibbi amadinosihu Deevidi yinanni rodii woꞌnaalsha laꞌno. Isi lee agana saꞌanno yanna xagisiꞌranni keeshshino. Deevidi xagisiꞌranni noo yannara isinna minaamasi Liidiya gambooshshe interneetete widoonni eanno.

Insa songote giddo noo jaallansa kaaꞌlitinonsahu hiittoonniiti? Gambooshshu gedensaanni woꞌmanka woyite addaraashete noori mitu roduuwi,  viidiyote widoonni Deevidinna Liidiya ledo hasaawate woꞌnaaltanno. Qoleno Deevidinna Liidiya dawaro qolturo roduuwu jawaachishshanno sokka borreessite galattannonsa. Tini mayi guma abbituyya? Deevidinna Liidiya calluwu noohu gede asse heda agurino.

Mininsanni fula dandiitannokki roduuwi ledo soqqama dandiineemmo? Insa ledo soqqamate mito coye biddi assiꞌne kuri roduuwa deꞌnoommokkita leellisha dandiineemmo. (Law. 3:27) Kuri roduuwi ledo silketenni woy borrote sokka borreessite soqqamate pirogiraame fushshiꞌra dandaatto. Mininsanni fula dandiitannokkiri qanchu soqqansho gambooshshira viidiyotenni ea dandiitannoha ikkara dandaanno. Deevidinna Liidiya tenne qixxaawo lowo geeshsha naadanno. Deevidi togo yiino: “Soqqanshote gaamonke ledo harancho hasaawa hasaawanna huuccatto assiꞌra nafa lowo geeshsha jawaachishshinonke.” Qoleno dandaamannoha ikkiro, mito mito woyite Qullaawu Maxaafi rosaanokki mininni fula dandiitannokki roduuwiwa abbite insa ledo xiinxallisa dandaatto?

Mininni fula dandiitannokki roduuwi ledo loonseemmo woyitenna dancha akattansa laꞌneemmo woyite, insawa roore gamba yineemmo. Lawishshaho, insa ledo soqqammeemmo woyitenna insa Maganu Qaale mannu wodanira coanno garinni rosiissanna laꞌneemmo woyite insawa albinni roore shinqeemmo. Ammanate roduuwikki ayyaanaamittete coye assitanno gede kaaꞌlattonsa woyite wole batinye haaro jaalla kalaqiꞌra dandaatto.—2 Qor. 6:13.

Phaawuloosi jaalisi Tiito ledosi noo daafira sheshifatino. (2 Qor. 7:5-7) Tini xagge, kaaꞌlo hasiissannonsare mararreemmota leellishannore coyiꞌne calla ikkikkinni insa ledo heeꞌnenna insa kaaꞌlate dandiinummore assine insa sheshifachisha dandiineemmota qaagiissitannonke.—1 Yoh. 3:18.

Ruusiyaho noo roduuwinke mimmito kaaꞌlate dancha lawishsha ikkitannonke. Hanni Sergeyinna minaamasi Tayitaana woꞌnaalsha laꞌno. Polise dagge minensa qonqolchituhu gedensaanni, insa qortara haadhe hadhino. Tayitaana balaxxe fushshiteennase qaera higgino. Sergeyi togo yiino: “Tayitaana qaera martanni heedheennanni mitte worba rodoo xaꞌmitankera minira daggu. Wolu roduuwino dagge polise qonqolchitanni billaallisino uduunnenke raga raga qoltino.”

Sergeyi lede togo yiino: “Lawishsha 17:17 lowo geeshsha baxeemmo; qummeeshshu ‘Jaalu woꞌmanka woyite jaalaholla; roduuno qarru barra iillanno’ yaanno. Kuni qummeeshshi, iillanni nooe darte umiꞌyanni qeele saꞌꞌa dandeemmokkite tenne yannara lowo geya kaaꞌlinoe. Yihowa waajjitukkinni kaaꞌlitannoe jaalla qixxeessinoe.” a

Kawiinni roorino qarri iillannonke woyite addaxxinanni jaalla hasiissannonke. Insa quuxxote qarri yannara roore hasiissannonke. Hakko daafira addu jaalla ikkate xaanni dandiinummore baala assino!—1 Phe. 4:7, 8.