1-2. Mittu manchi cuuamihu gedensaanni afiꞌranno atooti maati?

 CUUAMME Yihowa maate wido ikka lowo geeshsha hagiirsiissanno. Tenne qoosso afidhinori faarsaanchu Daawiti coyiꞌrino hedora sumuu yitanno; isi togo yiino: “Ati dooroottohura, Qullaawa Darga heeꞌrara woshshoottosihura tashshi yoosi.”—Far. 65:4.

² Yihowa minisira woshshannohu baalanka manna diꞌꞌikkino. Sai birxichira ronsummonte gede, Yihowa isi ledo jaalooma kalaqiꞌra hasidhannoriwa shiqqi yaanno. (Yai. 4:8) Heeshshokki Yihowara sayisse uyitto woyitenna cuuamitto woyite Yihowawa baxxino garinni shiqootto. Hakkunni gedensaanni isi ‘dancha atootesi batise aannoheta’ addaxxa dandaatto.—Mil. 3:10; Erm. 17:7, 8.

3. Heeshshonsa Yihowara sayisse uyite cuuantinori assa hasiissannonsahu shota ikkinokki coyi maati? (Rosiisaancho 5:4, 5)

³ Hige cuuama Yihowara soqqamate hanafotella. Cuuamittohu gedensaanni, guficho ikkannori woy ammanakki fonqolannori iillihero nafa cuuamitto woyite eootto qaale agadhite heeꞌrate dandiittore baala assa hasiissannohe. (Rosiisaancho 5:4, 5 nabbawi.) Yesuusi rosaancho ikkootto daafira, dandiitto deerrinni isi lawishsha harunsanna hajajosi seekkite agadha hasiissannohe. (Mat. 28:19, 20; 1 Phe. 2:21) Kuni birxichi tenne assatto gede kaaꞌlannohe.

 QARRUNNA FONQOLU HEEꞌRIRONO YESUUSA HARUNSA AGURTINOONTE

4. Yesuusi rosaano, ‘masiqala’ woy qarru haqqa duqqitannohu ma garinniiti? (Luqaasi 9:23)

⁴ Cuuamittohu gedensaanni qarru nookki heeshsho heeꞌratto yaa diꞌꞌikkino. Isinni Yesuusi, rosaanosi ‘qarru haqqa’ duqqa hasiissannonsata xawise kulino. Insa qarru haqqa duqqa hasiissannonsahu ‘barru barrunkunniiti.’ (Luqaasi 9:23 nabbawi.) Yesuusi hatto yaasi harunsaanosi woꞌmanka woyite qarrantanno yaateni? Hatto yaa diꞌꞌikkino. Hatteentenni isi afidhanno atooteno agurranna qarru iillannonsata luphi asse kulanni no. Iillannonsa qarri giddo mitu lowo geeshsha xissiisannonsaha ikkara dandaanno.—2 Xim. 3:12.

5. Yesuusi uminsa horo agurtannori mayi atoote afidhannota kule qaale eino?

⁵ Minikki manni giwinoheha woy Maganu Gashshoote balaxisiisate yite mito maalaamittete coye aguroottoha ikkara dandaanno. (Mat. 6:33) Hatto ikkiro, Yihowa isira yite assoottore baala laꞌꞌannota addaxxa dandaatto. (Ibi. 6:10) Aante nooti Yesuusi coyiꞌrino hedo halaale ikkase umikki heeshshonni laoottoha ikkara dandaanno; isi togo yiino: “Aneranna danchu duduwira yee labballo roduuwa woy meya roduuwa woy ama woy anna woy ooso woy gate agurannohu baalu, xa tenne yannara dartu ledo mine, labballo roduuwa, meya roduuwa, amuuwa, oosonna gate xibbe ero afiꞌranno; dagganno alamera qole hegere heeshsho afiꞌranno.” (Maq. 10:29, 30) Afiꞌrootto atooti agurootto coye baala lowo geeshsha rooranno.—Far. 37:4.

6. Cuuamittohu gedensaannino “maalu yorto” qeeꞌlate sharrama hasiissannohehu mayiraati?

⁶ Cuuamittohu gedensaannino “maalu yorto” qeeꞌlate sharrama hasiissannohe. (1 Yoh. 2:16) Hatto assattohu guuntete xeꞌne nooheha Addaami sircho ikkoottohuraati. Mito woyite, Soqqamaasinchu Phaawuloosira qarra ikkinosi coyi aterano qarra ikkahera dandaanno; isi togo yee borreessino: “Giddoyidi mannimmaꞌya Maganu Seerinni hagiidhitanno. Ikkollana wodaniꞌya seeri ledo gaaramannohu, mannimmaꞌya widoonni cubbu seeri usuranya assannoehu wolu seeri mannimmaꞌya giddo noota afoommo.” (Rom. 7:22, 23) Busha yorto qeeꞌlate sharrama hexxo mudhatto gede assitahera dandiitanno. Ikkirono heeshshokki Yihowara sayisse uyitto woyite eootto qaale hedakki, fonqolo ikkannore gargadhate albinni roore murciꞌratto gede kaaꞌlitannohe. Heeshshokki Yihowara sayisse uyitto woyite eootto qaali fonqolo ikkannori iillannohe woyite kaaꞌlannohe. Hiittoonni?

7. Heeshshokki Yihowara sayisse aakki isira ammanante heeꞌratto gede kaaꞌlitannohehu hiittoonniiti?

⁷ Heeshshokki Yihowara sayisse uyitto woyite umokki kaadootto. Hatto yaa Yihowa dadillissannota umikki hasatto giwa doodhootto yaate. (Mat. 16:24) Hakko daafira fonqolu tuncu yaannohe woyite maa assattoro heddanni yaada dihasiissannohe. Wonanni baalanka coye agurte Yihowara ammanante heeꞌrate murcidhe kaootto. Iyyoobi gede Yihowa hagiirsiisate murcidhe heeꞌratto. Isi buutote qarri iillisirono, “Keeraanchimmaꞌya diagureemmo” yiino.—Iyo. 27:5.

8. Huuccatto assidhe heeshshokki Yihowara sayisse oottota hiincakki iillannohe fonqolo gargadhate kaaꞌlitannohehu hiittoonniiti?

⁸ Huuccatto assidhe heeshshokki Yihowara sayisse oottota hiincakki iillannohe fonqolo baala gargadhate jawaante ikkitannohe. Lawishshaho wolu manchi galtera gara ikkinokki baxille leellishattoni? Hatto assattokkiti egennantinote! Togoo coye assattokki gede wonanni Yihowara qaale eootto. Konni garinni gara ikkitinokki yorto wodanikkira rumuxxitannokki gede assiꞌrittoro, gedensaanni  iillannohe qarrinni gatatto. ‘Bushuullu doogowa higge dihaꞌratto.’— Law. 4:14, 15.

9. Huuccatto assidhe heeshshokki Yihowara sayisse oottota hiincakki, ayyaanaamittete coye balaxisiisatto gede kaaꞌlitannohehu hiittoonniiti?

⁹ Gambooshshe ganyite haꞌrattokki gede assannohe loosolla afiꞌritto? Togoo woyite maa assattoro afootto. Togoo looso afiꞌrattora albaanni wonanni konni loosira maahoyye yaa hoogate murciꞌrootto. Hakko daafira konne looso loossanni heedhenni Yihowa hagiirsiisa dandaattoronna teꞌee heda dihasiissannohe. Yesuusi Annasi hagiirsiisate murciꞌrino gara qaagakki, heeshshokki sayisse ootto Magano dadillissannoha aye coyeno bayichonko giwatto gede kaaꞌlitannohe.—Mat. 4:10; Yoh. 8:29.

10. Yihowa cuuamittohu gedensaanni Yesuusa harunsa agurattokki gede kaaꞌlannohehu hiittoonniiti?

¹⁰ Qarrunna fonqolu woꞌmanka woyite Yesuusa harunsate murciꞌroottota leellishatto faro fanannohe. Hatto assatto woyite Yihowa kaaꞌlannoheta addaxxa dandaatto. Qullaawu Maxaafi togo yaanno: “Maganu ammanaminoho; wolqaꞌnera aleenni ikkitino jifama iillitaꞌnera wore dilaꞌꞌanno. Jifantinanni woyite cincitine saꞌꞌa dandiitinanni gede, fultinanni doogo qixxeessannoꞌne.”—1 Qor. 10:13.

WOꞌMANKA WOYITE YESUUSA HARUNSATE MAA ASSA DANDAATTO?

11. Woꞌmanka woyite Yesuusa harunsineemmo gede kaaꞌlitannonketi kaajja doogo hiittenneeti? (Misileno lai.)

¹¹ Yesuusi Yihowara diinaggaawe soqqamino; hattono huuccatto assiꞌre isiwa gamba yee heeꞌrino. (Luq. 6:12) Cuuamittohu gedensaanni Yesuusa harunsa agurattokki gede kaaꞌlitannoheti kaajja doogo, woꞌmanka woyite Yihowawa shiqatto gede kaaꞌlannohere assate. Qullaawu Maxaafi, “Kulloonninke garinni heeꞌnoommowiinni alba hinge qaanfo” yaanno. (Fil. 3:16) Yannate kiiro, soqqanshonsa  halashshiꞌrate fushshidhino mixo wonshidhino roduuwi woꞌnaalsha macciishshatto. Kuri roduuwi Maganu Mangiste Sawaakooti Rosi Mine eꞌꞌe rossinoha woy sabbakkannori roore hasiissannowa hadhinoha ikkara dandaanno. Dandaattoha ikkiro, atino togoo mixo fushshiꞌrakki danchate. Yihowa manni isira albinni roore soqqamate quqquxamanno. (Soq. 16:9) Kayinni xa hatto assa dandaattokkihalla ikki? ‘Ani wolootu assitanno geeshshire assa didandeemmoho’ yite heddooti. Qaru coyi goofimarchu geeshsha Yihowara kaajjite soqqamate. (Mat. 10:22) Isira soqqamate dandiittore baala assitto geeshsha Yihowa hagiidhannota deꞌooti. Cuuamittohu gedensaanni woꞌmanka woyite Yesuusa harunsa dandaattoti qara doogo tenneeti.—Far. 26:1.

12-13. Albi gede diinaggaabbe soqqantanni noottokkiha ikkiro maa assa dandaatto? (1 Qorontoosi 9:16, 17) (“ Qolchanshote Giddonni Fultooti” yitanno saaxineno lai.)

¹² Albi gede giddokkita fushshite huuccidhanni noottokkitanna soqqanshokkinni hagiirraamo ikkoottokkita huwatittoro maa assa dandaatto? Qullaawa Maxaafa nabbawa albi geeshsha baxisanni noohekkihalla ikki? Cuuamittohu gedensaanni togoo coyi tuncu yiihero Yihowa ayyaana hoogoottohu gede assite heddooti. Guuntete xeꞌne nooheha ikkootto daafira, yannate kiiro hedatto gari soorramara dandaanno. Albi gede diinaggaabbanni noottokkiha ikkiro, soqqamaasinchu Phaawuloosi lawishsha hiinci. Isi Yesuusi faale haꞌrate woꞌnaalinoha ikkirono, mito woyite assa hasiꞌrinore assate hasatto heedhannosikkita afino. (1 Qorontoosi 9:16, 17 nabbawi.) Isi togo yiino: “Gadadinseennae kuleemmoha ikkiro kayinni, yinoonni wogalla wonshanni noommo yaate.” Phaawuloosi mito woyite hasatto heedhannosikkiha ikkirono, diinaggaawe soqqanshosi umo fushshate murciꞌrino.

 ¹³ Hatteente gede atino guuntete xeꞌne nooheha ikkootto daafira, hedattori gara ikkinokkire doodhatto gede assahera wodhitooti. Hasatto heedhannohekki woyite nafa gara ikkinore assate murciꞌri. Woꞌmanka woyite gara ikkinore assate sharramattoha ikkiro, gale hose hedatto garino soorramara dandaanno. Ganyite ayyaanaamittete coye assakki cuuamittohu gedensaannino woꞌmanka woyite Yesuusa harunsatto gede kaaꞌlitannohe. Woꞌmanka woyite tenne assakki ammanate roduuwakkino jawaachishshanno.—1 Tes. 5:11.

“KIꞌNENEE QONQOLCHITINE . . . FONQOLTINE LAꞌE”

14. Ganyite maa layiꞌra hasiissannohe? Mayira? (2 Qorontoosi 13:5)

¹⁴ Cuuamittohu gedensaanni ateneeto ganyite layiꞌrakkino kaaꞌlitannohe. (2 Qorontoosi 13:5 nabbawi.) Barru baala huuccatto assidhanni noottoro, Qullaawa Maxaafa nabbabbanninna xiinxallitanni noottoro, gambooshshe hadhanni noottoronna soqqansho fultanni noottoro yannate kiiro ateneeto seekkite layiꞌrakki danchate. Yihowa magansiꞌrate assattoti kuri coyibba roore baxissannohe gede assiꞌrate woꞌnaali. Lawishshaho ateneeto aante noo xaꞌmuwa xaꞌmi: ‘Xinta ikkinoha Qullaawu Maxaafi roso wolootaho xawise kula dandeemmo? Soqqanshoꞌya roore hagiirsiissannota assiꞌra dandeemmo gari no? Mitto mittonka coye bade kule huucciꞌreemmo? Hattono huuccattoꞌya Yihowa woꞌmunni woꞌma addaxxeemmota leellishshanno? Gambooshshe ganye haꞌreemmo? Gambooshshunniwa seekke macciishshanna qoleemmo dawaro woyyeessiꞌra dandeemmohu hiittoonniiti?’

15-16. Fonqolo dandee saꞌꞌate daafira mittu rodii woꞌnaalshinni maa rosootto?

¹⁵ Laanfekki maatiro afate ateneeto seekkite layiꞌrakkino danchate. Rooberti yinanni rodii woꞌnaalshi tenne leellishanno; isi togo yiino: “Lemuu diri balla ikke nooe yannara darate barra looso looseemmo. Mitto barra loosu gedensaanni, ledoꞌya loossanno beetto minisera koyissue. Ise, ‘Wolu noohu nookki daafira hasiꞌnummota ikka dandiineemmo’ yitinoe. Umi qara tidhinokki korkaata shiqishoommo; gedensoonni kayinni dihasiꞌreemmo yee hasiꞌreemmokkihu mayiraatiro xawise kuloommose.” Rooberti fonqolo dandee saino; tini danchate. Ikkirono gedensoonni isi hakkawarita qaage, hatte yannara iillinosi fonqolo hakkiinni woyyino garinni qeele saꞌꞌa dandaannota wodanchino. Isi lede togo yiino: “Yooseefi Phoxifaari minaamara qoli garinni kaajjishe bayichonkonni dihasiꞌreemmo  yee diqoloommo. (Kal. 39:7-9) Isinni ise koyissinoe koyishsha dihasiꞌreemmo yaa qarra ikkitinoe gari dhagge ikkannoe. Hakku iillinoe coyi Yihowa ledo nooe jaalooma kaajjishiꞌra hasiissannoeta wodancheemmo gede assinoe.”

¹⁶ Rooberti assinte gede ateneeto seekkite layiꞌrakki kaaꞌlitahera dandiitanno. Fonqolo dandiite saoottoha ikkiro nafa, ateneeto, ‘Konne fonqolo bayichonkonni giwoommo?’ yite xaꞌmi. Woyyeessiꞌratto coyi noota afittoro hexxo mudhitooti. Xa laanfekki afootto daafira hagiidha dandaatto. Tenne hajo daafira huuccatto assiꞌri; hattono albinni roore Yihowa fushshinohu amanyootu seeri garinni heeꞌrate kaaꞌlannohere assi.—Far. 139:23, 24.

17. Rooberti assinori Yihowa suꞌmi ayirranno gede assinohu hiittoonniiti?

¹⁷ Rooberti woꞌnaalshinni ronseemmori wolurino no. Isi togo yiino: “Ledoꞌya loossanno beetto koyissinoe koyishsha giwummohu gedensaanni, ise ‘Fonqolo saootto!’ yitinoe. Hakkiinni mayyaate? yee xaꞌmummose. Isera, alba Yihowa Farciꞌraasincho ikkino jaalise, ‘Baalunku Yihowa Farciꞌraasine ikkitino wedelli coyi dagatinsaro mannu afikkinni gara ikkinokkire assitanno’ yee kulinose. Hakko daafira ise jaalisera ane fonqolte laꞌannota kultinosi. Anino Yihowa suꞌmi ayirranno gede assoommota afummoti lowo geeshsha hagiidhoommo.”

18. Cuuamittohu gedensaanni maa assate murciꞌrootto? (“ Kaaꞌlannoheha Lame Birxicho” yitanno saaxineno lai.)

¹⁸ Heeshshokki Yihowara sayisse uyite cuuamitto woyite, dayirino dayiro Yihowa suꞌmi qullaawanno gede assa hasiꞌrattota leellishootto. Yihowa iillannohe qarranna dandiite saꞌꞌatto fonqolo afannota addaxxa dandaatto. Yihowa isira ammanante heeꞌrate assattore maassiꞌranno. Isi tenne assatto gede qullaawu ayyaanisi widoonni jawaante aannoheta addaxxi. (Luq. 11:11-13) Yihowa kaaꞌlonni cuuamittohu gedensaannino woꞌmanka woyite Yesuusa harunsa dandaatto.