AANIIDI QOOLIHA COYI UMO | IIMIRE XAWISSANNO AJUUJA
Ayyaanaame Alamera Heedhannori Ayeooti?
Ati ayyaanaame alamerenna hakko heedhannori daafira hedde egennootto? Hatto ikkiro, togo yite hedattohu ate calla diˈˈikkootto. Lowo diro, mannu tenne hajo daafira babbaxxinore yaanni keeshshino. Mitu manni ayyaanaame alame, ayirrisa hasiissannohu biˈree manni heeˈrannowaati yaanno. Wolu manni kayinni ayyaanaame alame, sokkaanonna reyinohu danchu manni haˈre heeˈrannote hagiirru woˈmino baseeti woy iimaati yaanno. Ayyaanaame alame lowo miliyoone ikkitanno maganna qae assidhe heedhanno base lawannonsa mannino no.
Hakkiinni saeno, batinyu manni ayyaanaame alamere kulannonkehu iimira haˈre dayinohu nookkihura, tenne hajo daafira tenne teˈe yaa didandiinanni yee heewisamanno. Ikkollana, togo yee heda digaraho. Korkaatuno, Yesuusi Kiristoosi uullara daara albaanni iima ayyaanaame alamera heeˈrino. Isi umi xibbi dirite ammaˈnote sooreeyyera tenne xawise coyiˈrino; togo yiino: “Ani gordunni dayoommohu, soyinoehu hedinore wonshammoraati ikkinnina, umiˈya hedo wonshate diˈˈikkino.” Konni daafira, Yesuusi soqqamaasinesira, “Anniˈya mine lowo dargi no” yii wote, isi hakko laˈe dayinore coyiˈranni no.—Yohaannisi 6:38; 14:2.
Yesuusi Anni Maganoho; suˈmisi Yihowaati; Yihowa ‘mini’ woy heeˈranno bayichi iimaati. (Faarso 83:18, NW) Konni daafira, Maganu Yihowanna Yesuusi Kiristoosi geeshsha ayyaanaame alamere xawisa dandaannohu horo dino. Insa ammanamino mannira leellishshinote dhagge ikkitanno ajuuja widoonni, ayyaanaame alamere lowore kultinonke.
Aananno birxichira, babbaxxitino ajuuja kulannoha mito Qullaawu Maxaafi gafa laˈneemmo. Tenne ajuuja nabbawatto wote, ayyaanaame alame kisa woy laˈˈa dandiinannirichi heeˈranno base ikkitinokkita deˈooti. Maganu ayyaanaame alamenna hakko heedhannore ayyaanu kalaqo calla huwattanno garinni kula agure, ninkera huwatate kaaˈlannonke garinni addi addi ajuujanni xawisino. Tini babbaxxitino ajuuja, ‘lowo darga’ yinite ayyaanaame alamera heedhannori ayeootiro huwanteemmo gede kaaˈlitannonke.
