1-2. Wodo maati? Hasiissannonkehu mayiraati?

GUUTU manchi Addaami cubbo loosi woyite hegerera heeˈrate hexxo huˈnino; isi sirchisino hegere heeshsho hooganno gede assino. Addaami loosino cubbira kuˈle gatannori dino. Isi cubbo loosinohu afanni heeˈrenniiti. Isi sirchina? Sirchisi hakka woyite ilama nafa diˈˈilamino. (Rom. 5:12, 14) Addaami loosino cubbira reyo hasiissinosi; ikkina sirchosi tenne reyonni gatisa dandiinanni gari nooyya? Ee no! Addaami cubbo loosanni heeˈreennanni, Yihowa Addaami sircho cubbunna reyote rumonni gatisanno gara deerru deerrunni xawisino. (Kal. 3:15) “Lowo manna wode gatisate lubbosi sayise” aanno gede, Yihowa yannasira Beettosi iiminni soyanno.—Maq. 10:45; Yoh. 6:51.

² Wodo maati? Giriikete Afiite Qullaawa Borro giddo wodo yaanno qaale horoonsiˈnoonnihu, Yesuusi Addaami huninore qolate baatino waaga kulateeti. (1 Qor. 15:22) Wodo hasiissannonkehu mayiraati? Muse Seeri giddo kulloonninte gede, Yihowahu taashshote seeri garinni lubbote bayicho lubbo qola hasiissanno daafiraati. (Ful. 21:23, 24) Addaami guuta ikkitino heeshsho huˈnino. Maganu taashsho wonshate guutu manchi Yesuusi heeshshosi kakkalo asse uyino. (Rom. 5:17) Konni garinni Yesuusi, wodo ammantannota leellishshannorira baalaho “Hegere Anna” ikkino.—Isa. 9:6; Rom. 3:23, 24.

3. Yohaannisi 14:31 nna 15:13 kultanno garinni, Yesuusi guuta heeshshosi mannu oosora sayise aate maahoyye yiinohu mayiraati?

³ Yesuusi iimi Annasinna ninke lowo geeshsha baxanno daafira heeshshosi sayise aate maahoyye yiino. (Yohaannisi 14:31; 15:13 nabbawi.) Kuni baxilli jeefote geeshsha ammanaminoha  ikkatenna Annisi fajjo wonshate murciˈranno gede assinosi. Isi reyote geeshsha ammaname tenne wonshino. Tini, Yihowa umo mannu oosoranna uullate hedinori woˈmanno gede assitanno. Konni birxichira Yihowa, Yesuusi reyara albaanni lowo geeshsha qarramara fajjinohu mayiraatiro ronseemmo. Qoleno wodote kakkalora lowo galati noosihu mittu soqqamaasinchi lawishsha haransine laˈneemmo. Jeefote, wodote kakkalora galatu noonketa leellisha dandiineemmo garanna Yihowanna Yesuusi qixxeessitinonke kakkalora noonke galati lexxanno gede assiˈra dandiineemmo gara ronseemmo.

4. Yesuusi reyinohu hiittoonniiti?

⁴ Hanni Yesuusi reyi barra mayi ikkinoro hendo. Isi hasiˈroommore, agartannosi gede lowo sokkaano woshshiˈra dandaanno; ikkirono, Roomu olanto amadde gantanni beebba assidhannasi laˈˈanni heeˈrenni sammi yiino. (Mat. 26:52-54; Yoh. 18:3; 19:1) Insa biso madiissitanno lichenni gantusi. Gedensoonni qole wonaa wonayi madidhino badhera dawe duhisiissusi. Yesuusi tenne dawe suntannisiwa duhe boode geya haˈrihu gedensaanni, olanto dawe mittu doogaanchi duhanno gede hajajju. (Mat. 27:32) Yesuusi sunte shinannisiwa iillita, sutate qixxaabbe noori angasinna lekkasi dawete qolte misimaaretenni gantu. Dawe gotti assinanni woyite mannimmasi gudisante rarraˈinohu gannoonni misimaare aanaati. Jaallasi lowo geya dadillitino, amasi wiˈlitanni qurtitanni no; Yihudu gashshaasine kayinni Yesuusa buseessitanni no. (Luq. 23:32-38; Yoh. 19:25) Isi shete heeˈreenna haammata saate saˈu. Sutaminowa wodanunna shombu gawajjamino daafira, foola qarra ikkitusi. Foolu fulara kae heeˈreenna jeefote huuccatto assiˈri. Hakkiinni umo qulcu yee heeshshosi sayise uyi. (Maq. 15:37; Luq. 23:46; Yoh. 10:17, 18; 19:30) Konni garinni Yesuusi qarramenna sholle reyino!

5. Sholle reyasinni roore Yesuusa yaachishinosiri maati?

⁵ Yesuusa roore yaachishshinositi sholle reyasi diˈˈikkitino. Kassansoonnisi kisse roore yaachishshinosi. Iso ‘Magano xonino’ yine yaano ‘Maganono suˈmasino diayirrisannoho’ yine kassansoonnisi. (Mat. 26:64-66) Tini Yesuusa lowo geeshsha yaachishshinosi daafira, Annisi konni shollinyinni gatisasira hasiˈrino. (Mat. 26:38, 39, 42) Ikkina Yihowa Beettisi qarramannonna reyanno gede fajjinohu mayiraati? Hanni sase korkaata laˈno.

6. Yesuusi qarru haqqira sutama hasiissinosihu mayiraati?

⁶ Umihunni, Yihudu manna rumote giddonni fushshate Yesuusi haqqaho sutama hasiissinosi. (Gal. 3:10, 13) Tini rumo, insa Maganoho hajajammeemmo yite qaale eˈinoha ikkirono hajajama gibbino daafira iillitinonsate. Konnira Addaamiwiinni ragidhino cubbono agurranna tinino wole barshe abbitinonsa. (Rom. 5:12) Maganu Israeelete uyino Seeri, reyote iillishanno cubbo loosino mancho shaa hasiissannota kulanno. Shinihu gedensaanni reeshshasi haqqu aana suntara dandiinanni. * (Mar. 21:22, 23; 27:26) Konnira Yesuusi haqqu aana sutame, iso gibbannori nafa wodote kakkalonni horo afidhanno faro faninonsa.

7. Maganu Beettisi qarrame reyara fajjinohu layinki korkaati maati?

⁷ Yihowa Beettisi qarrame reyanno gede fajjinoha layinki korkaata laˈno. Hatto assinohu, Yesuusi Kakkalaanote Biilo ikkanno woyitira qajeelsateeti. Yesuusi lowo qarri giddo  heeˈne Maganoho hajajama shota ikkitinokkita laino. Isi lowo geeshsha shetino daafira, kaaˈlo afiˈrate “qoonqosi naggi asse wiˈle lowo hindiiddonni [huucciˈrino].” Yesuusira hinciicammanni gede assanno qarri iillinosi daafira, qarrinke leellannosi, hattono ‘qarru jifannonke woyite kaaˈlankera dandaanno.’ Yihowa shoominonkehu Kakkalaanote Biili maarannoho; qoleno “wolqanke anjera kaaˈle afannokkiha diˈˈikkino”; konnira Yihowa galaxxineemmosi.—Ibi. 2:17, 18; 4:14-16; 5:7-10.

8. Yihowa Beettisira buutote fonqoli iillanno gede fajjinohu sayikki korkaati maati?

⁸ Yihowa, Yesuusi qarrame reyanno gede fajjinohu sayikki korkaati, mitte lowo geeshsha hasiissanno xaˈmora dawaro qolateeti; tini xaˈmo, ‘Mannu ooso buutote fonqoli iillinsaro nafa Maganoho ammanantanno?’ yitannote. Sheexaanu ‘Diammanantanno!’ yiino. Isi ‘Mannu Maganoho soqqamannohu mitore afiˈrate yee callaati’ yaanno. Qoleno Sheexaanu mannu ooso anninsa Addaami gede Yihowa dibaxxanno yee hedanno. (Iyo. 1:9-11; 2:4, 5) Yihowa Beettisi ammanamannota addaxxino daafira, Yesuusi reyote geeshsha fonqolamanno gede fajjino. Yesuusi jeefote geeshsha ammanaminoha ikke, Sheexaanu kaphaancho ikkinoti leeltanno gede assino.

9. Soqqamaasinchu Yohaannisi dancha lawishsha ikkinonkehu hiittoonniiti?

⁹ Wodote kakkalo daafira kulanno rosi, lowo Kiristaani ammana kaajjishino. Insa gimbinsarono sabbaka diagurtino; hattono heeshshonsa diro woˈma iillinonsa qarra baala dandiite saˈino. Hanni soqqamaasinchu Yohaannisi lawishsha laˈno. Isi Kiristoosinna wodote daafira kulanno halaale ammaname sabbakino; isi sabbakinohu 60 saˈˈanno diro ikkikki digatino. Yohaannisira 100 diri balla ikke heeˈreennasi, Roomu Gashshooti qarra qalanno yee huluullamino daafira Fiximo yinanni giddichora usurinosi. Isi usuraminohu mayiraati? ‘Maganu Qaalinna Yesuusi daafira’ farciˈrinohuraati. (Aju. 1:9) Yohaannisi ammanatenni kaajje dancha lawishsha ikkino!

10. Yohaannisi borreessino maxaaffa wodote kakkalora galatu noosita leellishshannohu hiittoonniiti?

¹⁰ Yohaannisi qullaawu ayyaaninni borreessino maxaaffa giddo, Yesuusa lubbora baxannotanna wodote kakkalora galatu noosita xawisino. Isi borreessino maxaaffa giddo wodote woy tenne wodonni afiˈra dandiinannihu danchu coyi daafira xibbe saˈˈanno bayicho qummi assino. Lawishshaho Yohaannisi togo yee borreessino: “Ayino cubbo loosiro . . . Maganu Annunniwa ninkera sae coyiˈramannohu noonke; isino keeraanchu Yesuusa Kiristoosaati.” (1 Yoh. 2:1, 2) Qoleno Yohaannisi borreessino maxaaffa giddo “Yesuusi daafira farciˈra” hasiissannota luphi asse xawisino. (Aju. 19:10, NW) Addanko, wodote kakkalora Yohaannisira lowo galati noosi! Ninkeno isi lawishsha harunsa dandiineemmohu hiittoonniiti?

11. Fonqolo qeelleemmo gede kaaˈlankera dandaannori maati?

¹¹ Cubbo loosatto gede assannori iillihero giwi. Wodote kakkalora galatu noonkeha ikkiro, ‘Fonqolu iillannoe woyite qeelate shelleggama dihasiissannoe. Cubbo loose kae maaro ea dandeemmo’ yine dihendeemmo. Hatteentenni cubbo loonseemmo gede assannori tuncu yaannonke woyite, ‘Dihasiˈreemmo! Yihowanna Yesuusi kageeshshi coye assite heedheennae konne coye mayyee asseemmo!’ yineemmo. Tennera Yihowa jawaante aannonke gede, ‘Jifameemmo gede assitootie’ yine huucciˈra dandiineemmo.—Mat. 6:13.

12. Umi Yohaannisi 3:16-18 noo amaale harunsa dandiineemmohu hiittoonniiti?

 ¹² Ammanate roduuwaˈne baxxe. Roduuwanke banxeemmoha ikkiro, wodote kakkalora galatu noonketa leellinshanni heeˈnoommo. Mayira yiniro, Yesuusi heeshshosi ninkera calla ikkikkinni wolu roduuwinkerano sayise uyino. Yesuusi insara reyate maahoyye yiino daafira, lowo geeshsha baxannonsati dihuluullissannote. (1 Yohaannisi 3:16-18 nabbawi.) Roduuwinke ledo noonke aante insa banxeemmota leellishshanno. (Efe. 4:29, 31–5:2) Lawishshaho dhiwanturo woy buutote qarri iillinsaro, coyi gedera kalaqamu dano iillitunsaro kaaˈlineemmonsa. Kayinni ammanate rodiinke hanqisannore assiro woy coyiˈriro maa assa hasiissannonke?

13. Woloota gatona yaa hasiissannonkehu mayiraati?

¹³ Ammanate rodiikkira koma amada rakkannohe? (Lew. 19:18) Hatto ikkiro togo yitanno amaale harunsi: “Kiˈne kiˈneneewa koffi yitinoonni coye baala cincatenni agurre. Kiristoosi [“Yihowa,” NW] agurinoˈnente gede, kiˈneno mimmitiˈnera agurre.” (Qol. 3:13) Roduuwanke gatona yinummo kiiro, wodote kakkalo naandeemmota iimi Anninkera leellinshanni heeˈnoommo. Ikkina Maganu qixxeessinote wodote kakkalora noonke galati lexxanno gede assiˈra dandiineemmohu hiittoonniiti?

14. Wodote kakkalora galatu noonketa leellinsheemmo doogga giddo mitte hiitteeti?

¹⁴ Wodote kakkalora Yihowa galaxxi. Mitte Hindete heedhannoti 83 diriti Johaana yinanni rodoo togo yitino: “Huuccatto assiˈreemma woyite barru baala wodote kakkalo qummi asse Yihowa galaxxa hasiissannoeta huwatoomma.” Huuccatto assiˈratto woyite barru giddo loosootto soˈro hedde Yihowa gatona yaannohe gede huucciˈri. Jawa cubbo loosittoro kayi, cimeeyyete kaaˈlo afiˈra hasiissannoheti egennantinote. Insa kulattonsare macciishshitanno, hattono Maganu Qaale horoonsidhe shaqqillunni amaaltannohe. Qoleno Yesuusi kakkalonni horo afidhe ayyaanaamittetenni ‘huratto’ gede kaaˈlahera Yihowa huuccitanno.—Yai. 5:14-16.

15. Wodote daafira nabbawatenna hiincate yanna gaaˈma hasiissannonkehu mayiraati?

¹⁵ Wodote kakkalo daafira hiinci. Raajimaani yinanniti 73 diro ikkannose rodoo, “Yesuusi  qarramino gara kultanno xagge nabbaweemma woyite hindiiddo qalxitannoe” yitino. Atino Maganu Beetti shetino gara hedatto woyite xissiisiˈrattoha ikkara dandaanno. Kayinni Yesuusi baatino kakkalo daafira hiincitto kiiro, isiranna Annisira noohe baxilli lexxanni haˈranno. Wodote kakkalo daafira hiincate, tenne hajore seekkite xiinxalla dandaatto.

16. Mannaho wodote daafira rosiisa kaaˈlitannonkehu hiittoonniiti? (Aaniidi qoolira noo misile lai.)

¹⁶ Wolootaho wodote daafira rosiisi. Wolootaho wodote daafira kullummo kiiro, ninkerano wodote kakkalora noonke galati lexxanni haˈranno. Yesuusi reyinohu mayiraatiro mannaho xawisate horoonsiˈra dandiineemmohu kaajju uduunni noonke. Lawishshaho, Maganuwiinni Dayinoha Dancha Duduwo! yitanno biroshereha roso 4 horoonsiˈra dandiineemmo. Konni rosira “Yesuusi Kiristoosi Ayeti?” yaanno birxichi no. Woy Qullaawu Maxaafinni Maa Ronseemmo? yaanno maxaafa fooliishsho 5 horoonsiˈra dandiineemmo. Tini fooliishsho “Wodo Elto Baala Roortannote Maganu Eltooti” yaanno birxicho afidhino. Qoleno diru kiiro Yesuusi Reyo Qaagooshshe ayirrinseemmonna manna konni ayyaanira diinaggaambe koyinseemmo woyite wodote kakkalora noonke galati lexxanno. Yihowa mannaho Beettisi daafira rosiinseemmo gede asse ayirrisinonke!

17. Wodote kakkalo Maganu mannu oosora uyino elto baala roore eltooti yineemmohu mayiraati?

¹⁷ Addanko, wodote kakkalora noonke galati lexxanno gede assiˈranke garankolla! Wodote kakkalo, guuntete xeˈne noonkere ikkinummorono Yihowa ledo danchu jaaloomi heeˈrannonke gede kaaˈlitannonke. Qoleno wodote kakkalo Daawuloosi loosi woˈmunni woˈma diigamanno gede assitanno. (1 Yoh. 3:8) Hattono Yihowa umo mannahonna uullate hedinori woˈmanno gede assitanno. Uulla woˈma gannate ikkitanno. Hatte yannara xaandeemmo manni baalu Yihowa baxannohonna isira soqqamannoho. Konnira, barru baala Maganu mannu oosora uyino elto baalanta roortanno elto yaano wodote kakkalora galatu noonketa leellinsho!