NINKE baalunku, heeꞌnoommohu konni “goofimarchu barra” Yihowa mannasi massaganninna ayyaanaamittetenni towaatanni noota ammanneemmo. (2 Xim. 3:1) Ikkollana, ninke mittu mittunku Yihowara hajajammeemmoronna teꞌee doodha dandiineemmo. Ninke heeshsho, hunda halalla heedhino Israeele gedeeti. Insa xurumbu huuro macciishshitanno woyite fula hasiissannonsa.

Yihowa, Muse birra daashshine seekkinoonniha lame xurumba qixxeessanno gede kulinosi; kuni xurumbi ‘manna woshshe gamba assatenna kakkayisate’ kaaꞌlannoho. (Kir. 10:2) Kakkalaasine mannu maa assa hasiissannonsaro kulate, xurumba babbaxxino garinni ufuuffanno. (Kir. 10:3-8) Xaa yannarano Maganu manni addi addi doogganni biddishsha afiꞌranno. Hanni kuri giddo, hunda Israeelete waro ufuunfanni xurumba qaagiissitannonketa sase doogga laꞌno. Xaa yannara Maganu manna jajjabbu gambooshshira koyinsanni; cimeeyyete qajeelsha uyinanni, hattono baalante songuwara uyinanni biddishsha haaroonsinanni woy biddi assinanni.

Yihowa “mannu baalunku” xaadooshshu dunkaanira soojjaatoonni noo xullicho daanno gede hasiꞌriro, kakkalaasine lamenka xurumba ufuuffanno. (Kir. 10:3) Shoole gaamo ikkite xaadooshshu dunkaani qooxeessira dukkaꞌnitino gaꞌre baalanti, hattenne xurumbu huuro macciishshitanno. Xullichu mule dukkaꞌnitinori, bayichonko daggannoha ikkara dandaanno. Fafowa noori kayinni, hakkira dagge iillate lowo yannanna wolqa hasiissannonsaha ikkara dandaanno. Yihowa, muleno ikko fafowa heeꞌrannohu baalunku gamba yaaranna biddishshasi macciishshara hasiꞌranno.

Xaa yannara xaadooshshu dunkaaniwa gamba yineemmokkiha ikkirono, Maganu manni ledo gamba yinammora koyinsanninke. Lawishshaho, qoqqowunna wolu baxxino gambooshshira koyinsanni woyite kaaꞌlanno rosonna biddishsha afiꞌneemmo. Alamete doyichora heeꞌrannohu Yihowa mannira mittu gari pirogiraame shiqqanno. Konnira, koyishsha adhite daggannori baalu, Maganu manni ledo mitteenni hagiidhitanno. Insa giddo mitu xeertotenni dagganno. Ikkirono, koyishsha adhite daggannori, daansanni horo digaabbitanno.

Jajjabba gambooshshe assiꞌnanni qooxeessinni xeertidhe heedhannori konni gambooshshinni horo afiꞌra dandiitanno? Yannate daggino tekinooloje widoonni, xeertote heeꞌrannohu batinyu manni togoo pirogiraamenni horo afiꞌra dandaanno; wole agurina insa roduuwu ledo mitteenni gamba yitinoha lawannonsa. Lawishshaho, mitte yannara qara  biiro riqiwaanchi Beniini gobbata sinu biiro towaatanni heeꞌreenna, tenne pirogiraame Nijeri gobbara noohu Erleeti katamira viidiyotenni sayinsoonni; kuni Sahaara Barahira nooho shiilo ummanni katamaati. Hakkiicho 21 roduuwinna hasatto noonsa manni gamba yitino. Insa heedhannohu fafowa ikkirono, konni gambooshshira gamba yiinohu 44,131 manni ledo gamba yitinoha lawinonsa. Mittu rodii togo yee borreessino: “Tenne pirogiraame sayissinoonninke daafira, lowo geeshsha galaxxineemmoꞌne. Xaano ninke mageeshshi geeshsha baxxinanninkero leellishshinoonni.”

Israeelete kakkalaasine mitto xurumba calla ufuuffanno woyite, “Israeelete roorrooti callu” xaadooshshu dunkaaniwa gamba yitanno. (Kir. 10:4) Hakkiicho insara Muse biddishshanna qajeelsha aannonsa. Tini gaꞌre gaꞌrensa giddo, uyinoonninsa looso danchu garinni loossanno gede kaaꞌlitannonsa. Ati hakkuri roorrooti wido ikkoottoro, hatte woshshatto marte biddishshanna qajeelsha afiꞌrate dandaamihere baala diassatto?

Xaa yannara nooti songote cimeeyye ‘roorroota’ diꞌꞌikkitino; woy insa Maganu hoshshara annattannore diꞌꞌikkitino. (1 Phe. 5:1-3) Hatteentenni hoshsha allaalate wolqansa assitu geeshsha sharrantanno. Konnira, qajeelshaho koyinsanninsa woyite lawishshaho, Mangistete Soqqansho Rosi Minira woshshinanninsa woyite hagiirrunni maahoyye yitanno. Tenne yannara, cimeeyye songote haja danchu garinni tira dandiitanno gara qajeeltanno. Togoo qajeelshi songo woꞌma ayyaanaamittetenni baasa kaaꞌlanno. Ati konni rosi minira eꞌe qajeeloottokkiha ikkirono, konne qajeelsha adhitino roduuwiwiinni horo afiꞌra dandaatto.

Israeelete kakkalaasine mito woyite xurumba babbaxxino garinni ufuuffanno. Tini, Yihowa mannu baalu dukkaꞌninowiinni kae haꞌrara hasiꞌrannota leellishshanno. (Kir. 10:5, 6) Mannu dukkaꞌninowiinni kae haꞌrannohu qinaawino garinni ikkirono, tini lowo looso afidhino. Togoo woyite mitu manni isinni lame wodana ikkara dandaanno. Mayira?

Mitootu lame wodana ikkitannohu, ‘Hedeweelcho kaꞌne xaa xaa hadhe yinanninkehu mayiraati?’ yite ikkara dandaanno. “Mito mito woyite gomichu hawarronni soodo geeshsha calla keeshshanno.” Wole woyite kayinni “mitto barra woy mitto agana woy mitto diro” keeshshara dandaanno. (Kir. 9:21, 22) Israeelete daga dukkaꞌnitinowiinni meꞌꞌe higge kaꞌino? Kiiro fooliishsho 33, Israeelete dagga dukkaꞌnitinoha 40 meddi yaanno bayicho kultanno.

Insa giddo mitu caalu noowa dukkaꞌnitanno woyiti nooha ikkara dandaanno. ‘Waajjishshannote halallite gobbara’ hattoo bayicho afiꞌra loworeeti. (Mar. 1:19) Konnira, wolewa kaꞌne haꞌnummoro injonke hoongeemmo yite heddara dandiitanno.

Insa kaꞌe haꞌra hanaffanno woyite, mitootaho taransa agadha qarra ikkitansara dandiitanno. Baalunku addi addi garinni ufuunfannita xurumbu huuro macciishshitannoha ikkirono, woꞌmanti gaꞌre mitte yannara kaꞌe dihadhanno. Addi addi garinni xurumba ufuunfanni woyite, umo soojjaatoonni dukkaꞌnitinori yaano, Yihudu, Yisakoorinna Zaabilooni gaꞌre kaꞌe hadhanno. (Kir. 2:3-7; 10:5, 6) Insa kaꞌe hadhuhu gedensaanni, kakkalaasine layinkimeeshsho addi addi garinni xurumba ufuuffanno woyite, wodiidoonni dukkaꞌnitinori sase gaꞌre mitteenni kaꞌe hadhanno. Baalanti gaꞌre hadhe kaꞌa geeshsha kakkalaasine xurumba konni garinni ufuuffanno.

Dirijjitete giddo mito coye biddi assinanni woyite, tenne adha qarrissahera dandiitanno. Mayira? Hedeweelcho biddi assinanniri batiꞌrino yite hedattoha ikkara dandaanno. Woy mitu coyi injiinohe daafira, mayi tenne gedeennilla heeꞌra yite hedattoha ikkara dandaanno. Togoo yannara cincanna haarote biddi assinoonnire rosa qarra ikkitinoheha ikkara dandaanno. Ikkollana, maahoyye yaa hasiissannonketa huwante hajajamate sharrammummoro, Maganu maassiꞌrannonke gara laꞌnammora dandiineemmo.

Muse waro, Yihowa miliyoonetenni kiirranni labballo, meentonna qaaqquulle halalla massagino. Yihowa massaganna towaata hoogoommensaro insa digattanno. Ninkeno xaa yannara Yihowa biddishsha harunsinummoro ayyaanaamittete gawajjonni ganteemmo. Hattono ayyaanaamittetenni lante heeꞌneemmo! Konnira hunda ammanantino Israeele xurumba addi addi garinni ufuunffanni woyite macciishshite fultannonte gede, ninkeno Yihowara hajajamate murciꞌno!