1, 2. Tini alame noo geeshsha buxane hooggannokkihu mayiraati?

 YANNANKEHU ikonoomete gari bushahonna taashsho nookkiho. Wedellu looso hasiꞌrannoha ikkirono hasiꞌri gede diafiꞌranno. Lowo manni dureette gobbuwa haꞌrate yee heeshshonsa nafa huꞌnate geeshsha iillanno. Dureette gobbuwara nafa lowo buxane no. Qoleno, dureeyyetenna buxanete mereero noo badooshshi lexxanni haꞌranni no. Mitte muli yanna xiinxallo yitanno gara ikkiro, uullate aana noo dureeyye giddo xibbunni mitte angara noonsa jiro, gatino manni baalaho noonsa jiro ledo taaltanno. Tini xiinxallo adda ikkase gunde buuxa dandiinannikkiha ikkirono, mitu manni beettu beettira ikkitannota lowo jiro afiꞌre heeꞌreenna, lowo biliyoone ikkanno manni lowo geeshsha buxe noota moromannohu dino. Yesuusi, ‘buxane woꞌmanka wote kiꞌne ledo no’ yaasi konne dadillisanno coye leellishshannote. (Maq. 14:7) Kuni taashsho xeino coyi noohu mayiraati?

² Yesuusi Maganu Mangiste dagga geeshsha ikonoomete gari woyyaawannokkita afino. Qullaawu Maxaafi poletiku, ammaꞌnotenna Yohaannisi Ajuuja 18:3 aana “daddalaasine” yinoonniti hafuurtannoti daddalu dirijjituwa Sheexaanu alame wido ikkitinota kulanno. Maganu manni poletikunna kaphu ammaꞌnowiinni woꞌmunni woꞌma baxxe fulinoha ikkirono, lowo roduuwi Sheexaanu alame wido ikkitinote daddalu dirijjituwawiinni woꞌmunni woꞌma baxxe fula didandaanno.

3. Aanchine hiikkuri xaꞌmuwa dawaro afiꞌneemmo?

 ³ Addu Kiristaana ikkinoommo daafira, yannankera noote daddalu alamera noonke lao afate ninkeneeto togo yine xaꞌma hasiissannonke: ‘Jajjaꞌya Maganoho ammaname heeꞌreemmota leellishate horoonsiꞌra dandeemmohu hiittoonniiti? Daddalu alame xaaxxe amaddannoekki gede assiꞌra dandeemmo hiittoonniiti? Maganu manni, bushu ikonoomete amanyooti noo alamera heeꞌre woꞌmunni woꞌma iso addaxxannota leellishinohu hiittoonniiti?

4, 5. (a) Yesuusi coyiꞌrino lawishshira kulli manchira hiittoo coyi iillinosi? (b) Yesuusi harunsaanosi mayyee amaalino?

⁴ Luqaasi 16:1-9 nabbawi. Yesuusi coyiꞌrinohu ammanaminokki loosiisaanchi lawishshi dhagge ikkannoho. Isi woxe billaalisino yinoonni daafira, loosu aaninni hoollannisi wote kaaꞌlitannosi ‘jaalla kalaqiꞌrate’ mala maꞌlino. a Yesuusi rosaanosi heeshshote hasiissannonsare afiꞌrate ammanama baino coye assa hasiissannonsa yaanni nooha diꞌꞌikkino. Togoo assooti, “tenne gobba manni” amanyoote ikkinota coyiꞌrino; ikkollana isi yaara hasiꞌrinore xawisate konne lawishsha horoonsiꞌrino.

⁵ Yesuusi harunsaanosi hakkuyi qarru iillisi manchi gede, taashsho nookkite daddalu alame giddo hasiissannonsare afiꞌrate sharrama hasiissannonsata afino. Konnira isi rosaanosi togo yiino: “Bunshete woxinni jaalla kalaqidhe; hatto assitiniro woxiꞌne goofeenna mulla anganni gattinanni yannara, jaallaꞌne [Yihowanna Yesuusi] haadhe geedote mine wortannoꞌne.” Yesuusi amaalino amaalenni maa ronseemmo?

6. Yannankera nooti daddalu alame Maganu hedinore ikkinokkita leellishannori maati?

⁶ Yesuusi konni lawishshi giddo jiro “bunshete jiro” yiinohu mayiraatiro xawisinokkiha ikkirono, Qullaawu Maxaafi Maganu hafuurre woꞌmitinoti daddalu alame heedhara hedinokkita kulanno. Yihowa Edenete giddo Addaamiranna Heewanira hasiissannonsare baala uyinonsa. (Kal. 2:15, 16) Gedensaanni umi xibbi diro Kiristaanu qullaawu ayyaaninni buurami yannara “kuni aneho” yaannori noonsakkitanna ‘afiꞌrinore baala guto’ ikkinohu gede asse laꞌꞌannota kulloonni. (Soq. 4:32) Masaalaanchu Isayaasino mannu ooso baala maalaamittete coye afidhe qawaaxxidhe heedhanno yanna daggannota masaalino. (Isa. 25:6-9; 65:21, 22) Hakka geeshsha kayinni, Yesuusi harunsaano Maganu baxannore assitanni heedhenni “bunshete woxinni” heeshshote hasiissannonsare afiꞌrate “egenno” woy hayyo afiꞌra hasiissannonsa.

7. Luqaasi 16:10-13 mayine amaalloonni?

⁷ Luqaasi 16:10-13 nabbawi. Yesuusi coyiꞌrino lawishshi giddo qummi assini manchi jaalla kalaqiꞌrate kainohu umisi hororaati. Ikkollana, Yesuusi harunsaanosi Yihowanna isi ledo dancha hedonni kaꞌe jaaloontara amaalino. Konni lawishshinni aante noo qummeeshshuwa giddo ‘bunshete woxe’ Maganoho ammanamate ledo xaadinse kulloonni. Yesuusi jajjanke Maganoho ‘ammanammeemmota’ leellishanno garinni horoonsiꞌra dandiineemmo gara rosiisa hasiꞌrino. Tenne assa dandiineemmohu hiittoonniiti?

8, 9. Roduuwu bunshete woxe Maganoho ammanantinota leellishate horoonsidhino gara leellishanno lawishshuwa kuli.

⁸ Jajjanke horoonsiꞌneemmo wote Maganoho ammanammeemmota leellisha dandiineemmo doogga giddo mitte, Yesuusi masaalotenni  kulinoha alame woꞌmate loonsanniha wongeelu looso woxunni kaaꞌlate. (Mat. 24:14) Hindete gobbara mitte shiima qaaqqo baankoonete woxe codha hanaffino; ise togo assate yite ashangulliite nafa hidha agurtino. Woxu baankoone woꞌmita wongeelu loosira horoonsiꞌnanni gede uyitino. Tenne gobbara heeꞌrannohu kokonaate yinanni laalo loosiꞌrannohu wolu rodii no. Isi Malayalami yinannite tirote biirora tenne laalo haaꞌre massino; isi hatto assinohu tini tirote biiro tenne laalo hidhitannohura woxe fushshantenni laalo massummoro woyyanno yee hedinohuraati. Togo assasi hayyote. Giriikete heedhanno roduuwino gobbansara heedhannote Beeteelete maatera zayite, burbuxxonna wole sagale ganyite massitanno.

⁹ Xa wole gobbara heeꞌrannohu mittu Sirilaanku gobba rodii, qaesi songotenna jajjabba gambooshshe assiꞌnanni gede hattono woꞌma yanna soqqamaasine galtanno gede uyino. Isi togo assinohu afiꞌranno woxe agureeti; ikkirono hatto assasi qooxeessaho heedhannote anga ajjino halashshaanora lowore kaaꞌlitino. Wongeelu loosonke agamboonni gobbuwara roduuwinke minensa Gambooshshu Addaraashe gede assine horoonsiꞌnanni gede fajjino; tini lowo suwisaanonna angate anje amaddinonsa roduuwi woxe baaxxitukkinni gambooshshe assidhanno base afidhanno gede assitino.

10. Shaqqillunni uyinummoro mayi atoote afiꞌneemmo?

¹⁰ Aleenni qummi assini roduuwi lawishshi, Maganu manni ‘shiimu coyira ammanaminoha’ ikkitinota, yaano ayyaanaamittete jiro ledo heewisiinsiro gariꞌre ikkitinokkita maalaamittete jiro danchu garinni horoonsiꞌrannota leellishannoho. (Luq. 16:10) Yihowa ledo jaalooma kalaqidhinori kuri roduuwi uminsa horo agurtinotera mayite heddino? Insa, aa halaalaancho “jiro” afiꞌnanni gede assitannota affino. (Luq. 16:11) Maganu Mangiste loosira woxe ganyite fushshitannoti mitte rodoo afidhino atooti daafira togo yitino: “Maalaamittete coye shaqqillunni aaꞌya dhagge ikkanno coye laeemma gede assitinoe. Albinni roore shaqqillunni uumma kiiro, mannu ledo nooe aante albinni roore seekkino. Shaqqillunni gatona yuumma kiiro, albinni roore cinceemmata, koffi assanno coye dandee saeemmatanna amaale adha qarrissannoekkita ikkoomma.” Lowo manni aate shaqqadda ikka ayyaanaamittete atoote afiꞌnanni gede kaaꞌlitannota huwatino.—Far. 112:5; Law. 22:9.

11. (a) Shaqqillunni aa hayyo ikkitinohu hiittoonniiti? (b) Maganu manni mereero qiniitu noonsa manni woxi wolu manni hoonge wonshanni noohu hiittoonniiti? (Hanafote noo misile lai.)

¹¹ Maalaamittete coye Maganu Mangiste looso halashshate horoonsiꞌrano hayyote. Tini woloota kaaꞌlineemmo gede assitannonke. Tenne alame jiro noonsari woꞌma yanna soqqansho eꞌꞌe woy wole gobba hadhe soqqama dandaa hooggurono jironsanni soqqanshote assinannire kaaꞌla dandiitanno. (Law. 19:17) Lawishshaho meessi fajjonni fushshineemmo woxi borro shiqishatenna halaale macciishshanno manni noota ikkiturino buxima noo gobbuwara loonsanniha wongeelu looso irkisate kaaꞌlanno. Hattoo gobba giddo mite lawishshaho Kongo, Madagaskaarinna Ruwaandu gedee gobbuwara roduuwu maatensara sagale  hidhatenna Qullaawa Maxaafa hidhate giddo mitte doodhitanno; kuri gobbuwara Qullaawu Maxaafi waagi lamalate woy aganunni loonse afiꞌnanni damoozi ledo taaloho. Yihowa dirijjite roduuwu fushshanno woxinni hattono afiꞌrino manni woxi, anga ajino manni hoonge wonshanno gede assite Qullaawa Maxaafa tirtanno; konni garinni mitte mittenti maatenna Qullaawa Maxaafa xiinxallanno manni Qullawa Maxaafa afiꞌranno gede assitanni no. (2 Qorontoosi 8:13-15 nabbawi.) Konni garinni aannohuno adhannohuno Yihowa ledo jaalooꞌmanno faro afiꞌranno.

12. Abirihaami Magano addaxxannota leellishinohu hiittoonniiti?

¹² Yihowa ledo jaala ikkate kaaꞌlitannoti wole doogo, daddalu sakaale amadannonkekki gede assiꞌratenna addu ‘jiro’ afiꞌneemmo gara hasiꞌrate. Kaajja ammana noosihu Abirihaami, Yihowa jaala ikkate yee Uuri yinannite dureette gobbanni haꞌre dunkaanaho heeꞌrino. (Ibi. 11:8-10) Isi halaalaancho jiro aannoha Yihowa addaxxino ikkinnina iso addaxxannokkihu gede maalaamittete coye afiꞌrate didodamino. (Kal. 14:22, 23) Yesuusi togoo ammana heedhannonke gede assiꞌneemmo gede rosiisino; isi mittu dureessu beettira togo yiino: “Coꞌonta guuta ikka hasiꞌrittoro, hadhe afiꞌroottore baala hirte woxe buxanete beehi; gordoho jiro afiꞌrattona. Hakkunni gedensaanni hoodeꞌya amo!” (Mat. 19:21) Konni manchira Abirihaamite gedee ammana dinosi; wolu manni kayinni woꞌmu wodaninni Magano addaxxannota leellishino.

13. (a) Phaawuloosi Ximootewoosi mayyee amaalino? (b) Phaawuloosi amaale harunsa dandiineemmohu hiittoonniiti?

¹³ Ximootewoosino kaajja ammana noosiho. Phaawuloosi Ximootewoosi “Kiristoosi Yesuusiha dancha olamaancho” ikkinota coyiꞌrihu gedensaanni togo yiino: “Olaho fulanno manchi, hajajaanchosi hagiirsiisara qixxaawa hasiissannosi ikkinnina wole haja giddora dieanno.” (2 Xim. 2:3, 4) Yannankera mitte miliyoone saꞌannota woꞌma yanna soqqamaasine ledo,Yesuusi harunsano heeshshonsa gari fajjinsa deerrinni tenne Phaawuloosi uyino amaale harunsitanni no. Insa egensiishshu dirrijjittanna alame doggannonsakki gede qorophitanno; qoleno togo yaannoha xintu seera dideꞌanno: “Liqiiꞌrannohu liqiissannohura borojjicho ikkanno.” (Law. 22:7) Sheexaanu, daddalu alame yannankenna wolqanke gudisse adhitanno gede assa hasiꞌranno. Doodhineemmohu mitu doorshi woxeho lowo diro borojje ikkineemmo gede assara dandaanno. Mitu manni minenna kaameela hidhate, woxe baate rosate, wole agurina adhamate barra lowo jila jilate liqoote giddora eanno. Bikku heeshsho heeꞌneemmoha hattono asalu giddora eꞌneemmokkihanna fushshineemmo woxe ajinsheemmoha ikkiro daddalu alamera borojje ikkantenni Maganu borojje ikkine hayyo noonketa leellisha dandiineemmo.—1 Xim. 6:10.

14. Maa assate murciꞌra hasiissannonke? Lawishshuwa kuli.

¹⁴ Bikku heeshsho heeꞌrate balaxisiisa hasiissannonke coye buuxa hasiissanno. Mittu minaanninna minaamara dancha gede tirfitannoti daddalu dirijjite noonsa. Ikkollana, insa woꞌma yanna soqqansho galagale ea hasiꞌrino daafira, daddalu dirijjitensa, yowolchonsanna wole jajjansa hirino. Hakkiinnino insa Wooriwiki, Niwu Yorke haꞌre qara biiro minate looso kaaꞌla hanafi. Insa tini soqqansho beettonsanna beettonsa beetti ledo hakko Beeteelete soqqamate faro fantinonsa daafira lowo geeshsha hagiidhino; qoleno insa boode lamala geeshsha isi anninna amano ledo Wooriwiki qara biiro minate looso ledonsa loosino. Koloraado, U.S.A. giddo heedhannoti mitte suwisaancho baankete mine gama yanna loossanno. Loosiissannoseri ise loossanno gara baxxino daafira, woꞌma yanna loossanno gede assate heddinotanna damooza albinni sase ero assite baattannoseta kultuse.  Ise kayinni kuni loosi soqqanshote injaannosekkita affino daafira, konne lowo woxe afiꞌnanni gede assanno looso loosate sumuu yaa gibbu. Kuriuu lawishshuwa Yihowa soqqamaasine uminsa horo agurte soqqantannota leellishshanno lawishshuwa giddo shiimatella. Konni garinni Maganu Mangiste looso balaxisiisate murciꞌranke, Maganu ledo noonke jaaloomanna ayyaanaamittete jiro yannankera noote daddalu alamenni roorsine laꞌneemmota leellishshanno.

15. Addu hagiirre afiꞌnanni gede assitanno jiro hiitteeti?

¹⁵ Mittu manchira maalaamittete coyi noosi daafira calla Maganu maassiꞌrinosi yaa diꞌꞌikkino. Yihowa maassiꞌrannohu ‘danchu loosinni dureeyye’ ikkino mannaati. (1 Ximootewoosi 6:17-19 nabbawi.) Lawishshaho Luuchiya b yinanni rodoo Albaaniyaho sabbakkannori roore hasiissannota affuti, 1993nni Ixaaliyunni hatte gobba hadhino; ise hakka hadhu yannara looso afidhinokkiha ikkirono woꞌmunni woꞌma Yihowa addaxxitino. Ise Albaaniyu Afoo rosse 60 saꞌꞌanno manni insaneeto Maganoho sayise aanno gede kaaꞌlitino. Ninke soqqammeemmohu lowo manni halaale macciishsha hasiꞌrannokki qooxeessiꞌra ikkara dandaanno; ikkirono mannu halaale macciishshannonna hegere heeshsho doogo aana haꞌranno gede kaaꞌlate assineemmori baalu hegere geeshsha hawamannokkiho.—Mat. 6:20.

16. (a) Daddalu alame albillittete hiikkitanno? (b) Maalaamittete jiro baꞌannota afanke ma assineemmo gede assitannonke?

¹⁶ Yesuusi daddalu alame baꞌannota leellishannore coyiꞌrino. Isi ‘woxiꞌne goofannoha ikkiro’ yiinoha ikkikkinni “woxiꞌne goofeenna” yiino. (Luq. 16:9) Yannankera baankenna lowo gobba ikonoome wolqa ajjino; tini albillittete kawiinni sainohu ikonoomete qarri heeꞌrannota leellishshannote. Sheexaanu alame gudisidhe yaano poletiku, ammaꞌnotanna daddalu alame baꞌꞌase digattanno. Masaalaano Hiziqeelinna Sofooniyaasi culkunna birru, yaano daddalu dirijjituwa lowo geeshsha naaddanni keeshshitinori waagiweelo ikkitannota masaaltino. (Hiz. 7:19; Sof. 1:18) Tenne alame giddo “bunshete jiro” duuꞌninummoronna hatte jiro afiꞌnoommohu addu jiro agurre ikkinota heeshshonke goofimarchira anfummoro hiikkineemmo? Mittu manchi daafure lowo woxe gamba assire kaihu gedensaanni gamba assiꞌrino woxi kaphunniha ikkinota afanno wote dadillannohu gede dadillinammora dandiineemmo. (Law. 18:11) Ee, maalaamittete jiro jeefote baꞌannote; hakko daafira tenne jironni gordoho “jaalla kalaqidhe.” Yihowa Mangiste halashshate assineemmori baalu ayyaanaamittete jiro afiꞌrate kaaꞌlannonke.

17, 18. Albillittete Maganu jaalla afidhannori maati?

¹⁷ Maganu Mangiste dagganno wote mannu kira dibaaxxanno woy diliqiiꞌranno; qoleno falakkino sagale mulla itanno, hattono akime woy xagichu diheeꞌranno. Yihowati uulla heedhanno maate uullate aana noore danchare hasidhu gede afidhanno. Culku, birrunna inqu daddaꞌlinannita woy duuꞌninannita ikkitukkinni seesaho horoonsiꞌnannita ikkitanno. Mine miꞌninannita sigiiga haqqe, isilancho kinnanna siwiila hasiꞌni gede afiꞌnanni. Jaallanke woxeho ikkikkinni mulla kaaꞌlitannonke; tini hagiidhinanni gede assitanno. Haaro alamera uullate aana noori baalu baalunkura taalo ikkanno.

¹⁸ Gordoho jaalla kalaqidhannori afidhannohu taalle afiꞌrinokki atooti giddo kuni shiimaholla. Albillitte uullate aana heedhe Yihowa magansidhannori, Yesuusi togo yaannonsa wote baasa hagiidhitanno: “‘Kiꞌne Anniꞌya maassiꞌrinoꞌneri! Amme! Alame kalaqantuhunni kayise qixxaawinoꞌneha Gordu Gashshoote [“Mangiste,” NW] ragidhe!’”—Mat. 25:34.